Read saamia Yowaana 11 Bible Online

Yowaana 11 - saamia bible

Yowaana 11

¹ Bulaanu, omuundu olaangwa Lasaaro, owali yamenya Bbetani yali omulwaae. Bbetani syali esiko sya Maria neende Marita mwaanang'ina bali bamenya.

² Maria wuno, niye owabaha hu makulu k'Omwaami amafuta k'esing'aari siingi, haandi yakapaangusa neende efwiiri lyae, haandi niye mboochoong'ene Lasaaro owali omulwaae.

³Bamboochoong'ene bano mani nibatumira Yesu emboosi nibaboola bati, “Omwaami, omwiicha wao yi waheera muno, alwaalire.”

⁴Yesu niyawulira atyo, yaboola ati, “Obulwaae buno haba sibuchia humaliirihira mu hufwa; nae bw'oluyaali lwa Nasaae, hu Omwaana wa Nasaae anyale ohukinisirwamo.”

⁵Yesu yali yaheera muno Lasaaro, Marita neende Maria.

⁶Nae Yesu niyawulira ati Lasaaro alwaalire, yadoong'a abuundu yi yali endaalo chibiri chiindi.

⁷Luunyuma Yesu mani n'aboolera abeeki bae ati, “Hukoboleyo mu Yudea haandi.”

⁸Abeeki bae mani nibamuteeba bati, “Rabbi, Abayudaaya bano babeere nibahukiiya ohuhubba amakina, haandi odaha ohukobolayo?”

⁹Yesu yabakobolamo ati, “Esaa ch'esideete haba sichiri ehumi neende chibiri? Omuundu n'akeenda esideete, haba siyegumula, olwohuba abona obulafu bw'esyaalo sino.

¹⁰Nae oyo okeenda esiro, yegumula olwohuba obulafu bumubulamo.”

¹¹Yesu yalomaloma atyo mani n'ababoolera ati, “Lasaaro omwiicha weefwe akonere, nae haanjie musimuse mu ndoolo.”

¹²Mani abeeki bae nibamuboolera bati, “Omwaami, n'aba n'akonereho, achia ohusiingira.”

¹³Yesu yali alomaloome hu hufwa hwae, nae nabo babaasa bati, alomaloma hu hukona endoolo.

¹⁴Mani Yesu n'ababoolera alafu ati, “Lasaaro afwiire;

¹⁵nae hulw'obulai bweeng'we, sangaalire olwohuba haba sindaliyo daawe, mani muchia ohufukiirira. Mani lehe huchie yi ali.”

¹⁶Tomasi, olaangwa Ehwaana, yeecha yaboolera abeeki baasye ati, “Lehe fwesi huchie, mani hufwiire alala nae.”

¹⁷Yesu niyoolayo, yanyoola Lasaaro n'amalire endaalo chine mu ng'ani.

¹⁸Bbetani syali aambi neende Yerusalemu, koti ekilomiita chidatu ohutula Yerusalemu.

¹⁹Abayudea baangi bali eyiri Marita neende Maria ohubagumya emyooyo, olw'ohufwa hwa mboocho yaabwe.

²⁰Marita niyawulira ati Yesu ali ohwiicha, yacha ohumubukaanira. Maria nae yadoong'a niyehaale mu nyuumba.

²¹Marita yaboolera Yesu ati, “Omwaami, oba niwali ano, mboocho yaange haba siyahafwiire.

²²Nae kata bulaanu, manyire endi, syosi-syoosi sy'oba osabire Nasaae, Nasaae achia ohuhuberesa sa.”

²³Yesu yamuboolera ati, “Mboochoo achia ohusyuuha haandi.”

²⁴Marita yamuboolera ati, “Manyire endi yahasyuuhire mu husyuuhira ohw'oludaalo lw'enjakamo.”

²⁵Yesu yamuboolera ati, “Ese Niise ohusyuuha haandi Niise obulamu. Oyo yeesi owufukiiriramo kata neende n'afwa, yahabe omulamu.

²⁶Haandi buli mulamu owufukiirira, haba siyahafwe endaalo choosi. Esyo osifukiirira?”

²⁷Marita yamukobolamo ati, “Eee, Omwaami; ese fukiirira endi niiwe Kristo, Omwaana wa Nasaae, ow'ohwiicha mu syaalo.”

²⁸Marita niyamala ohuboola atyo, yacha mani yalaanga Maria mwaanang'ina n'amuboolera mu bweekisi ati, “Omweekesa nguno ano ali ohuhulanga.”

²⁹Maria niyawulira atyo, yasiingiraniramo bwaangu, yaachia ohubukaanira Yesu.

³⁰Yesu yali asisiiri ohwoola mu siko, nae yali n'asisiiri abuundu yi Marita yali n'amubukaaniremo.

³¹Abayudaaya bali neende Maria mu nyuumba nibabona n'asiingira bwaangu n'atula erwaanyi, bosi bamuloondaho, nibabaasa bati, yali achia hu siriindwa ohulirira eyo.

³²Maria niyoola eyiri Yesu, yamukwa mu makulu, mani n'amuboolera ati, “Omwaami, oba niwahabeere ano, mboocho yaange wuno haba siyahafwiire.”

³³Yesu niyabona Maria n'alira, neende Abayudaaya bali nibeechere nae bosi nibalira, esibeera siingi muno syamudiira;

³⁴mani n'abateeba ati, “Mwaamusiihire yeena?” Bamuboolera bati, “Omwaami, yichia oboneyo.”

³⁵Yesu yalira muno.

³⁶Mani Abayudaaya abo nibaboola bati, “Boneho koti lu yabeere niyamuheera!”

³⁷Nae abaandi nabo baboola bati, “Owaliimbusa emoni ch'omuundu wali omuwofu wuno, haba siyanyalire ohukayirira Lasaaro ohufwa?”

³⁸Yesu yadiirwa neende esibeera siingi muno, mani yakeenda yaachia ena siriindwa. Syali eng'uungu yali niyiikaliirwe ekina.

³⁹Yesu yaboola ati, “Mutuseyo ekina elyo.” Marita mboochoong'ene mufu, yaboolera Yesu ati, “Omwaami, bulaanu awunya, olwohuba amalire endaalo chine ohutula naafwa.”

⁴⁰Yesu yamuboolera ati, “Haba sihuboolereho endi, n'ohufukiirira, ochia ohubona oluyaali lwa Nasaae?”

⁴¹Mani nibatusayo ekina. Yesu yalingaala aakulu, mani n'aboola ati, “Laata, hweebasa olwohuba wumbuliire.

⁴²Manyire endi wumbuliraanga buli ludaalo. Nae ebyo mbilomaloome hu baandu bandebodohaanie ano bano, banyale ohufukiirira bati niiwe owaanduma.”

⁴³Mani niyamala ohuboola atyo, yahuumulira mu kono ly'aakulu n'aboola ati, “Lasaaro, tula erwaanyi!”

⁴⁴Owali n'afwiire oyo yatulayo amahono kae neende amakulu nibiboyerwe neende esibiro, neende esitaambaya nisiboyerwe hu obweeni bwae. Yesu yababoolera ati, “Mumukaangulule, mumulehe akeende.”

⁴⁵Ao abaangi mu Bayudaaya abali neende Maria haandi abali nibabweene bi Yesu yahola, bamufukiiriramo.

⁴⁶Nae abaandi nabo bachia eyiri Abafarisaayo mani nibababoolera bi Yesu yali aholere.

⁴⁷Mani abalaamisi bahuluundu alala neende Abafarisaayo nibalaanga oluhiiho, nibaboola bati, “Hunaahole siina syeene? Olwohuba omuundu wuno ali ohuhola ebilolero biingi.

⁴⁸Nihumuleha yaachiiririra atyo, buli muundu achia ohumufukiiriramo, mani Abarooma baba bachia ohwiicha basihirise Abuundu Woolerefu ano [15] neende esyaalo syeefwe.”

⁴⁹Nae mulala hu nibo, olaangwa ati Kayaafa, owali omulaamisi muhuluundu mu mwaaka okwo, yababoolera ati, “Eng'we sibulao si mumanyire.

⁵⁰Haba simubona muti silai omuundu mulala ohufwiira abaandu boosi, ohuhira esyaalo syoosi ohusihiriswa.”

⁵¹Esyo haba siyasilomaloma hulwae omweene, nae koti lu yali omulaamisi muhuluundu omwaaka okwo, yalaangirira ati Yesu yali achia ohufwiira esyaalo esyo,

⁵²haandi haba si syaalo esyo syoong'ene, nae neende ohubuusa alala abaana ba Nasaae abasalaana.

⁵³Bulaanu ohutula hu ludaalo olwo ohwemeeda mu moni, Abayudaaya nibahola oluhobo lw'ohwiita Yesu.

⁵⁴Sakira Yesu haba siyakeenderaanga mu Yudea alafu, nae yatula ao, yatula mani n'achia mu situundu sisibiraane neende esiparara, silaangwa Efuraimu, mani naaba eyo neende abeeki bae.

⁵⁵Esidyaalo sy'Abayudaaya esya Paasaka syali aambi muno ohwoola. Abaandu baangi nibatula mu byaalo, bachie Yerusalemu bahole omuduunga kw'esinadiini okw'ohweelabya, esidyaalo sya Paasaka nisisisiiri ohwoola.

⁵⁶Mani nibakoonya Yesu. Haandi nibebuusiire mu Nyuumba ya Nasaae, bateebana abeene-na-beene bati, “Mubaasa mutye, wuno achia ohwiicha hu sidyaalo sihuluundu oba haba s'aneechie daawe?”

⁵⁷Bulaanu abalaamisi bahuluundu neende Abafarisaayo bali batusire omunwa bati omuundu yeesi omanyire yi Yesu yi ali, ababoolere, hu banyale ohumudiira.