Read saamia Yowaana 15 Bible Online

Yowaana 15 - saamia bible

Yowaana 15

¹“Ese ndi omusabbiibbu kwadyeeri, Laata niye omulimi.

²Buli saga eliri hweese elitaamaho ebyaamo alyaakulaangaho, nae buli saga lyaamaho ebyaamo alihaliirira hu linyale ohwemeeda ohwaamaho ebyaamo biingi.

³Bulaanu eng'we mwamala ohulaswa hulw'emboosi chi mbabooleere.

⁴Mudoong'e mweese, haandi syesi ndoong'e mweeng'we. Koti lu saga litanyala ohwaama ebyaamo hulwalyo lyoong'ene nilitaali hu musabbiibbu, nilwo lu mwesi mutanyala ohwaama ebyaamo, nimutaali mweese.

⁵Ese ndi omusabbiibbu, eng'we niing'we amasaga. Oyo oba mweese, mani syesi ndaamubaamo, niye owaama ebyaamo biingi, olwohuba siwumao si munyala ohuhola nitaali naang'we.

⁶Oyo otali mweese, yahasukunwe erwaanyi koti esaga mani yoomerera. Amasaga kali katyo, kabuuswaangwa alala mani kasukunwa mu muliro, kasaambwa.

⁷Nimuba mweese, haandi emboosi chaange chosi chaababaamo, musabeenge esiindu syoosi si mudaha, mani sichia ohubaholerwaanga.

⁸Nimwaama ebyaamo biingi, mani mweekesa muti muli abeeki baange badyeeri, Laata achia ohunyoola oluyaali.

⁹Koti lu Laata yaaheera, nilwo lu syesi ndabaheera. Mubecheenge mu buheeri bwaange.

¹⁰Nimudiira amalako kaange, munabechaanga mu buheeri bwaange, koti lu syesi ndiira amalako ka Laata, mani ndaaba mu buheeri bwae.

¹¹Mbabooleere ebyohu sangaalo lyaange linyale ohuba mweeng'we, haandi hu sangaalo lyeeng'we linyale ohuba eliichufu.

¹² “Elako lyaange nilyo lino, muheeraneenge abeene-na-beene, koti lu ese ndabaheera.

¹³Abulao oli neende obuheeri buhira obw'oyo owayaanayo obulamu bwae hulw'aabo ba yaheera.

¹⁴Eng'we muli abeecha baange nimuhola bi mbalagira.

¹⁵Ese haba sisiibalaanga abahalaabani daawe, [21] olwohuba omuhalaabani [22] haba saamanyire bi mwaami wae adaha. Nae mbalaanga abeecha baange, olwohuba ebyo byoosi bi ndawulira ohutula eyiri Laata, ndabeekesa mwaabimanya.

¹⁶Haba siniing'we abandoola daawe, nae ese niise owabadoola haandi ndabatuma endi muchie mwaame ebyaamo, haandi endi ebyaamo byeeng'we biyiindire. Mani buli siindu syoosi si munaasabeenge Laata mu liita lyaange, achia ohusibaberesaanga.

¹⁷Mbalagira sino endi muheeraneenge abeene-na-beene.

¹⁸“Esyaalo nisibasyuulaanga, mumanyeenge muti syataangira ohuusyuula nisisisiiri ohubasyuula.

¹⁹Muba nimuli abohu syaalo huno, esyaalo syahabaheerere koti abasyo. Nae olwohuba ese ndabadoola, haba simuli abohu syaalo daawe. Sakira esyaalo sibasyuula.

²⁰ Mwiichuliseho emboosi yi ndababoolera endi, ‘Omuhalaabani [23] haba saahira omwaami wae.’ Nikali mbwe baasaandya, mwesi bachia ohubasaandya. Nikali mbwe badiira emboosi chaange, bachia ohudiiraanga echeeng'we chosi.

²¹Nae ebyo byoosi bachia ohubiholaanga hulwaange, olwohuba owaanduma haba sibamumanyire daawe.

²²Mba nindahaya ohwiicha ndaababoolera, haba sibahabeere neende esyonoono daawe. Nae bulaanu sibulao esibamalaho omusaango kw'esyonoono syaabwe.

²³Oyo owusyuula, asyuula neende Laata yesi.

²⁴Mba nitabaholeramo ebiholwa biholwaanga neende omuundu wuundi, haba sibahabeere neende esyonoono daawe. Nae bulaanu babibweene, mani nibasyuula, ese neende Laata.

²⁵ Nae esyandiikwa mu malako kaabwe siti, ‘Baasyuula ataali esifune’, sy'ohwoosereswa.

²⁶Nindahachie eyiri Laata, njia ohubatumira Omukeraki, niye Mwooyo w'obwadyeeri, otula mu Laata. Oyo niyaheechie, niye owaheekese ebindiiraho.

²⁷Haandi eng'we mwesi muli abaloli baange, olwohuba mubeere naange ohutula hu njaako.