Read saamia Yowaana 16 Bible Online

Yowaana 16 - saamia bible

Yowaana 16

¹“Mbabooleere ebyo byoosi, hu muhaye ohuwaamo omwooyo.

²Bachia ohubeerusaanga mu Sinagoogi; bwadyeeri, esiha sichia ohwoola, buli obeeta abaaseenge ati ali ohuhalaabanira Nasaae.

³Ebyo bachia ohubiholaanga olwohuba haba sibamanyire Laata, kata syesi haba sibaamanyire daawe.

⁴Nae ebyo mbabooleere, hu bulaanu esiha syabyo nisyahoole, munyale ohwiichulisa muti ndamala ohubibaboolera. “Bino haba sindababooleraho muhuchaaka, olwohuba ndali siisiiri naang'we.

⁵Nae bulaanu ndi ohuchia eyiri oyo owaanduma; nae abulao mulala hweeng'we owuundeebaho ati, ‘Ochia yeena?’

⁶Nae olwohuba mbabooleere ebiindu bino, emyooyo kyeeng'we kichuulemo esibeera.

⁷Kata katyo ese mbaboolere obwadyeeri buno; sihoonya eng'we ese ohuwaao, olwohuba nitawaao, Omukeraki haba siyaheechie yi muli daawe. Nae nimbwaao, njia ohubamutumira.

⁸Mani niyaheeche, yahoolobye[24] esyaalo hulw'ebyonoono, neende hulw'obuluungifu, neende hulw'ohuheengerwa omusaango.

⁹Ohweema hulw'ebyonoono, olwohuba haba sibafukiiriramo daawe;

¹⁰ohweema hu buluungifu, olwohuba ndi ohuchia eyiri Laata, mani haba simuchia ohuumbonaho haandi;

¹¹ohweema hu heenga y'emisaango, olwohuba omutuki w'esyaalo sino, yamala hale ohuheengerwa omusaango.

¹²“Ese siisiiri neende ebiindu biingi muno eby'ohubaboolera, nae eng'we haba simunyala ohubyesimiirisira bulaanu buti daawe.

¹³Nae Mwooyo ow'obwadyeeri oyo niyaheechie, achia ohuboosa hu bwadyeeri bwoosi koti lu bwaaka; olwohuba oyo haba s'achia ohulomaloma hulw'obunyala bwae omweene, nae buli sy'acha ohuwuliraanga nisyo sy'acha ohubabooleraanga. Haandi yahababoolereenge ebiindu byahakweeo.

¹⁴Oyo achia ohuunjisamo oluyaali, olwohuba yahabukuleenge hu byaange, mani ababoolera.

¹⁵Ebyo byoosi bi Laata ali nabyo byaange nibyo; sakira mboolere endi, yahabukuleenge hu byaange mani ababoolera.

¹⁶“Mu siha sidiidi haba simuchia ohuumboneraho elalira; haandi mu siha sidiidi, haandi muchia ohuumbona.”

¹⁷Abeeki bae baandi bachaaka ohuboolanira abeene-na-beene bati, “Siina esyo sy'atuboolera ati, ‘Mu siha sidiidi haba simuchia ohuumboneraho elalira, haandi ati, mu siha sidiidi, haandi muchia ohuumbona’; haandi ati, ‘Ndi ohuchia eyiri Laata’?”

¹⁸Mani nibateebana bati, “Yeekesa siina syeene n'aboola ati, ‘Mu siha sidiidi’? Efwe haba sihumanyire syali ohweekesa daawe.”

¹⁹Yesu yamanya ati bali nibadaha ohumuteeba; mani n'ababoolera ati, “Sino nisyo si muli ohuteebanaangaho abeene-na-beene, si mboolere endi, ‘Mu siha sidiidi haba simuchia ohuumboneraho elalira, haandi mu siha sidiidi muchia ohuumbona’?

²⁰Mbaboolera obwadyeeri bweene endi, eng'we muchia ohulira haandi muchereenjese, nae esyaalo sichia ohusangaala; eng'we muchia ohuba mu sibeera, nae esibeera syeeng'we sichia ohweehola esangaalo.

²¹Omuhasi n'alumwa naali aambi ohwiibula, aba neende obuchuuni muno, olwohuba esiha syae siba simalire ohwoola; nae n'amala ohweehoonya, yeebiriraanga obuchuuni obwo, hulw'esangaalo mbwe omuundu aba yebuulwe mu syaalo muno.

²²Mani sakira eng'we muli neende esibeera esiha sino, nae ndahababone haandi mani emyooyo kyeeng'we kisangaale, abuleo omuundu yeesi onyala ohubatusaho esangaalo lyeeng'we elyo.

²³Hu ludaalo olwo simwahabeeho neende esiindu syoosi si musaba. Mbaboolera obwadyeeri bweene endi, Laata achia ohubaberesa buli siindu si mwahasabe mu liita lyaange.

²⁴Ohwoola buti mutaasabaho esiindu syoosi mu liita lyaange. Musabe, mani muchia ohunyoola, hu sangaalo lyeeng'we linyale ohuba eliichufu.

²⁵“Ebyo mbabooleere mu ngaado. Nae esiha sichia ohwoola, haye ohulomalomaanga naang'we mu ngaado, ohutusaho mbaboolere tiiri ebidiira hu Laata.

²⁶Hu ludaalo olwo, muchia ohusaba mu liita lyaange. Nae haba si ndi ohubabooleraanga endi njia ohubasabira eyiri Laata daawe.

²⁷Laata mweene yabaheera, olwohuba eng'we mwesi mwaaheera, haandi mufukiirira muti ndatula eyiri Laata.

²⁸Ndatula eyiri Laata, mani ninjicha hu syaalo. Bulaanu ndeha esyaalo, ndi ohuchia eyiri Laata.”

²⁹Abeeki bae mani nibamuboolera bati, “Bulaanu mbao oli ohulomaloma tiiri, ataali mu ngaado daawe!

³⁰Bulaanu humanyire huti omanyire ebiindu byoosi, haandi huti abulao omuundu yeesi ohoyere ohuhuteebaho esiindu syoosi daawe. Sakira bulaanu hufukiirira huti watula eyiri Nasaae.”

³¹Yesu yabakobolamo n'abateeba ati, “Bulaanu mufukiirira?

³²Mani esiha siri aambi ohwoola, haandi simalire ohwoola, musalaane, buli muundu akobole engo wae, muundehe syeeng'ene; nae haba si ndi syeeng'ene daawe, olwohuba Laata ali naange.

³³Mbabooleere ebyo, hu munyale ohuba neende omuleembe ohuumbitiramo. Hu syaalo huno muchia ohuba neende ebidinyu; nae mugume, ese malire ohuyiingira esyaalo.”