Read saamia Yowaana 17 Bible Online

Yowaana 17 - saamia bible

Yowaana 17

¹Yesu niyamala ohulomaloma emboosi chino, yatingaala aakulu Muukulu mani yaaboola ati, “Laata, esaa yahoola; yiisa oluyaali mu Mwaana wao, hu Omwaana wao yesi ahwiisemo oluyaali,

²olwohuba wamuberesa obunyala hu buli muundu yeesi; hu anyale ababerese obulamu butaakama bu wamuberesa.

³Obulamu butaakama nibwo buno, abaandu boosi ohuhumanya ewe Nasaae mulala owadyeeri weeng'ene neende Yesu Kristo, yi watuma.

⁴Ese ndahwiisamo oluyaali hu syaalo. Maliriise omulimo ku waamberesa ohuhola.

⁵Laata, bulaanu njisemo oluyaali lwao mu moni wao, oluyaali lu ndalimo naawe esyaalo nisisisiiri ohuloongwa.

⁶“Eliita lyao ndalyeekesa abaandu ba wamberesa noobatusa mu syaalo. Bali abaandu bao beene, mani wabaamberesa, haandi badiirire emboosi yao.

⁷Bulaanu bamanyire bati buli siindu syoosi si wamberesa situla y'oli;

⁸olwohuba ndababoolera, mani bulaanu bamanyire mubwadyeeri bweene bati, ndatula y'oli, haandi bamalire ohufukiirira bati, niiwe owaanduma.

⁹Ese mbasabira abo; haba siindi ohusabira esyaalo daawe, nae ndi ohusabira abo ba wamberesa, olwohuba bao nibo.

¹⁰Byoosi bi ndi nabyo byao nibyo, haandi ebyao byaange nibyo, haandi njiswaamo oluyaali mu beene abo.

¹¹Bulaanu ese haba sisiisiiri hu syaalo daawe, nae abo basiisiiri hu syaalo, nae ese ndi ohwiicha y'oli. Laata Mwoolerefu, baliindire mu liita lyao, li wamberesa omweene, banyale ohuba silala, koti lu efwe huli silala.

¹² Nindali nisiisiiri nabo, ndabaliindiraanga mu liita lyao li wali wamberesa omweene; mani nimbaliinda, haandi hu abo abulao kata mulala owakotaho daawe, ohutusaho oyo yeeng'ene owali owohukota, hu byandiiko byoolerefu byoolerere abweene.

¹³Nae bulaanu ese ndi ohwiicha y'oli; haandi ebiindu bino mbilomalomera mu syaalo muno, hu sangaalo lyaange linyale ohubeechulamo.

¹⁴Mbabereese emboosi yao; mani esyaalo nisibasyuula olwohuba haba sibasiisiiri abohu syaalo daawe, koti lu ese taali owohu syaalo.

¹⁵Ese haba siindi ohuhusaba endi obatuse mu syaalo muno, nae endi obawonie ohutula hu musuku Sitaani.

¹⁶Abo haba sibali abohu syaalo daawe, koti lu syesi taali owohu syaalo huno.

¹⁷Balabisirye mubwadyeeri bweene; olwohuba emboosi yao niyo obwadyeeri.

¹⁸Koti lu waanduma mu syaalo, mani syesi ndi ohubatuma mu syaalo.

¹⁹Ese ndeyaanayo omweene y'oli hulwaabwe, hu bosi abeene banyale ohweyaanayo mubwadyeeri.

²⁰“Haba siindi ohusabira bano boong'ene daawe, nae sabira neende abo abafukiiriramo ohweema hu mboosi cha bano.

²¹Boosi bahoyere babe silala; koti lu ewe Laata oli mweese, haandi syesi ndi mweewe, endi nabo bosi babecheenge mweefwe, hu bulaanu esyaalo sifukiirire siti ewe niiwe owaanduma.

²²Oluyaali lu wamberesa, syesi mbabereese, hu banyale ohuba silala koti lu efwe huli silala,

²³ese nimbalimo, ewe n'oli mweese, hu banyale ohweeholera elalira silala, hu bulaanu esyaalo simanye siti hane niiwe owaanduma, haandi wabaheera koti lu waaheera.

²⁴Laata, abo ba wamberesa, ndaha bosi babecheenge yi ndi, banyale ohubona oluyaali lu wamberesa. Olwohuba waaheera esyaalo nisisiisiiri ohuloongwa.

²⁵Eee, Laata Muluungifu, esyaalo haba sisyahumanya daawe, nae ese humanyire; haandi bano bamanyire bati niiwe owaanduma.

²⁶Ndabeekesa eliita lyao, haandi njia ohumeeda ohubeekesa bamanye eliita lyao, mani obuheeri bu waaheereramo, bubabeemo, haandi syesi mbabeemo.”