Read saamia Yowaana 2 Bible Online

Yowaana 2 - saamia bible

Yowaana 2

¹Hu ludaalo lwohudatu, waliwo obweeya bwali Kana mu Galilaaya; ng'ina Yesu yaliyo.

²Yesu yesi bamulaanga hu sidyaalo alala neende abeeki bae.

³Efiini niyawa, ng'ina Yesu yamuboolera ati, “Efiini yibaweereho.”

⁴Nae Yesu yamuboolera ati, “Muhasiing'ene, ndehe mbe! Esiha syaange sisiiri ohwoola.”

⁵Ng'ina yaboolera abahalaabani ati, “Muhole buli siindu sy'ababoolera syoosi.”

⁶Bulaanu waliwo esyoongo ch'amaachi chisaasaba echali nichiteerwe ao hulw'omusiro kwohweelabya kw'Abayudaaya, buli syoongo niyirimo amaachi koola elita emia ndala.

⁷Yesu yababoolera ati, “Yichuse amaachi mu syoongo echo.” Mani baachiichusira elalira.

⁸Yesu yababoolera ati, “Bulaanu dayeho amaachi kaandi, mukayirire omuhuluundu w'esidyaalo.” Mani nibamuyirira.

⁹Omuhuluundu w'esidyaalo niyahoombaho amaachi ako akali bulaanu kakaluhaane kali efiini, haba siyamanya yi yitusiirwe (ohutusaho abahalaabani badaya amaachi ako nibo abali bamanyire). Omuhuluundu w'esidyaalo yalaanga owali adehiisye

¹⁰mani yaamuboolera ati, “Buli muundu ataangiraanga ohukabula efiini ndai; abaandu nibaba nibamalire ohung'wa nibeekuute, hu yeemao aleeta efiini njalaafu; nae ewe obiihire efiini ndai ohwoola bulaanu buti.”

¹¹Mu bulolero bu Yesu yahola, aho niho ahalolero hataangira. Yaholera Kana mu Galilaaya, niyeekesa oluyaali lwae; mani abeeki bae nibamufukiiriramo.

¹² Ebyo nibyawa, Yesu yachia Kaperanaumu, alala neende ng'ina, bamwaanang'ina neende abeeki bae; mani nibamalayo endaalo njeraanu.

¹³ Esidyaalo sya Paasaka sy'Abayudaaya syali aambi ohwoola, mani Yesu n'achia Yerusalemu.

¹⁴Niyeengira mu Nyuumba ya Nasaae, yanyoolamo abaandu nibakusa eng'oombe ndaawu, amakoondi, amabburuuku, neende abafuunjisi b'eseende nibali hu mulimo kwaabwe.

¹⁵Yesu yabukula omukoye, y'aakuluhamo olubbariki lw'endereechi, mani yaaberusamo boosi, alala neende amakoondi neende eng'oombe ndaawu chosi, baatula mu Nyuumba ya Nasaae; haandi yaabbwomoola erwaanyi eseende ch'amatoongolo ch'abafuunjisi b'eseende, haandi yaafuumamya emeesa chaabwe.

¹⁶Mani n'aboolera abakusaanga amabburuuku ati, “Mutuse muno ebiindu bino; mutahola enyuumba ya Laata ohuba enyuumba y'obuhala.”

¹⁷ Abeeki bae nibeechulisa bati syali syandiikwa mu byandiiko byoolerefu siti, “Ohudaha enyuumba yao hwahandyeemo omwooyo.”

¹⁸Ao Abayudaaya nibamuteeba bati, “Halolero siina h'otweekesa ahakera n'ohola bino.?”

¹⁹ Yesu yabakobolamo ati, “Mukwiise Enyuumba ya Nasaae yino, nae mu ndaalo chidatu njia ohuyisiingisa yeeme.”

²⁰Abayudaaya baboola bati, “Byayira emyaaka amahumi kane neende chisaasaba ohwoombaha Enyuumba ya Nasaae yino, nae ewe ochia ohuyisiingisa mu ndaalo chidatu?”

²¹Nae Yesu yali alomaloma hu Nyuumba ya Nasaae eyali omubiri kwae.

²²Niyamala ohusyuuha ohutula mu bafu, abeeki bae mani nibeechulisa bati yali amalire ohusilomalomaho; mani nibafukiirira ebyaandiikibwa byoolerefu neende mu mboosi yi Yesu yali n'alomaloome.

²³Nae bulaanu niyali Yerusalemu hu sidyaalo sya Paasaka, abaandu baangi bafukiirira muno mu liita lyae, nibabona obulolero bu yahola.

²⁴Nae Yesu haba siyabeesika muno,

²⁵olwohuba yali n'amanyire buli muundu koti lu ali, haandi siyadaha omuundu wuundi amuboolere ebibadiiraho; olwohuba omweene yali amanyire ebiri mu mwooyo kw'abaandu.