Read saamia Yowaana 20 Bible Online

Yowaana 20 - saamia bible

Yowaana 20

¹Hu ludaalo lutaangira mu juma, Maria Magidalena yeecha hu ng'ani, obwiire nibusisiiri ohuhya bulai, mani n'abona ati ekina lyali nilitusirwe hu siriindwa.

²Yeeruha embiro, yaachia eyiri Simooni Petero neende omweeki wuundi, oyo yi Yesu yali yaheera muno, yaababoolera ati, “Batusire Omwaami mu siriindwa, haba sihumanyire yi bamuteere daawe.”

³Mani Petero n'atulaniramo embiro alala neende omweeki wuundi wula, nibachia hu ng'ani.

⁴Boombi bachia nibeeruha, nae omweeki wuundi wula yahira Petero embiro, yaataangirira ohwoola hu ng'ani.

⁵Yaguunama ohulingaala mukati, mani naabona engubo ch'elaasi chira nichikwiire ao, nae haba siyeengira mukati daawe.

⁶Simooni Petero yoola n'amuloondaho yeengira mu ng'ani; mani yaabona engubo ch'elaasi chira nichikwiire ao,

⁷nae esitaambaya esyali siteerwe hu mutwe kwae, sisyali nisiri alala neende engubo ch'elaasi chira daawe, nae syali nisyefuumbire nisyekabuule syoong'ene.

⁸Omweeki wuundi wula, owali naatangiire ohwoola hu ng'ani, yesi niyeengiramo, yabona atyo mani yaafukiirira;

⁹olwohuba bali bataamanya ebyandiiko byoolerefu biboola biti, yali owohusyuuha ohutula mu bafu.

¹⁰Mani abeeki abo beekobolerayo mu madaala kaabwe.

¹¹Nae Maria yali yeemere erwaanyi w'eng'ani, n'aliraanga. Niyali n'alira, yaguunama ohulingaala mu ng'ani;

¹²mani n'abona malaika babiri nibafwaalire engubo charachaari, nibehaale mulala enamutwe, nae owuundi enamakulu abuundu yi mubiri kwa Yesu kwali kwaliiswe.

¹³Bamuteeba bati, “Muhasiing'ene, lwasiina olira?” Nae yabakobolamo ati, “Olwohuba babukuule Omwaami waange, nae haandi haba siimanyire yi bamuyirire daawe.”

¹⁴Niyali naasilomalomaanga atyo, yakaluuhana ohutingaala emukoongo, mani yaabona Yesu niyeemere ao, nae haba siyamanya ati niye Yesu.

¹⁵Yesu yamuteeba ati, “Muhasiing'ene, lwasiina oli ohulira? Okoonyaanga wiina?” Maria yabaasa ati omuundu oyo, niye omweene ndalo, mani n'amuboolere ati, “Omuhuluundu, nikali mbwe niiwe omutusiremo, mboolere y'omuteere, mani njie mutuseyo.”

¹⁶Yesu yamuboolera ati, “Maria.” Maria yakaluuhana yamutingaala, mani n'amuboolera mu Luibburania ati, “Rabboni” (esyeekesa siti Omweekesa).

¹⁷Yesu yamuboolera ati, “Otandiiraho daawe, olwohuba siisiiri ohuniina eyiri Laata; nae chia eyiri bamwaanaama obaboolere oti, ndi ohuniina eyiri Laata haandi Laata yeeng'we, eyiri Nasaae waange, haandi Nasaae weeng'we.”

¹⁸Maria Magidalena yachia yaaboolera abeeki ati, “Mbweene Omwaami”; haandi yaababoolera ati, yali amubooleere ebiindu ebyo.

¹⁹Mani engoloobe y'oludaalo olwo, oludaalo lutaangira mu juma, yi beeki bali, enjiki chali chiikaalwe hulw'ohutya Abayudaaya. Yesu yeecha yeema akati waabwe, mani naababoolera ati, “Omuleembe kube naang'we.”

²⁰Niyamala ohuboola atyo, yabeekesa amahono kae neende mu mbafu wae. Abeeki basangaala muno ohubona Omwaami waabwe.

²¹Yesu haandi yababoolera ati, “Omuleembe kube naang'we. Koti lu Laata yaanduma, syesi mbatuma.”

²²Niyamala ohuboola atyo, yabayeereraho omuuya, naababoolera ati, “Munyoole Mwooyo Mwoolerefu.

²³ Ebyonoono by'abaandu bi munaleheraangamo, bichia ohuleherwaangamo; ebyonoono bi mutachia ohuleheraangamo, haba sibichia ohuleherwaangamo daawe.”

²⁴Bulaanu Tomasi, mulala hu ehumi-na-babiri, owali alaangwa ati Ehwaana, haba siyali alala neende abaasye Yesu niyeecha.

²⁵Abeeki baasye nibamuboolera bati, “Hubweene Omwaami weefwe.” Nae yababoolera ati, “Ese nitaabonaho amahono kae, ndaabonaho ebinyubuluuhe by'emisumaari, mani ndaata olwaala lwaange mu mbala ch'emisumaari omwo, haandi ndaata omuhono kwaange mu mbafu wae omwo, haba siinja ohufukiirira daawe.”

²⁶Luunyuma lw'endaalo chitaanu-na-chidatu, abeeki bae haandi bali mu nyuumba, Tomasi yesi yali ali neende abeeki baasye. Enjiki haandi chali nichiikaalwe. Yesu haandi yeecha yeema akati waabwe, mani yaaboola ati, “Omuleembe kube naang'we.”

²⁷Niyamala ohuboola atyo, yaboolera Tomasi ati, “Leeta ano olwaala lwao, mani obone amahono kaange. Haandi leeta omuhono kwao, okute mu mbafu waange. Leha ohuba otafukiirira, nae fukiirira.”

²⁸Tomasi yakobolamo ati, “Omwaami waange, haandi Nasaae waange!”

²⁹Yesu yamuboolera ati, “Ofukiirira olwohuba wuumbwene? Bali neende ehabi abo abafukiirira nibasisiiri ohubonaho.”

³⁰Haandi biluwo eby'amayia biingi bi Yesu yahola mu moni w'abeeki bae, ebitaandiikwa mu sitabo sino;

³¹nae bino byandiikwa hu munyale ohufukiirira muti Yesu niye Kristo, Omwaana wa Nasaae, haandi nimufukiirira, muchia ohunyoola obulamu mu liita lyae.