Read saamia Yowaana 21 Bible Online

Yowaana 21 - saamia bible

Yowaana 21

¹Luunyuma lwa bino, Yesu haandi yabonehera abeeki bae hu lwaasi lw'Enyaanja ya Tibberia. Yababonehera mu ngeri yino.

²Simooni Petero, Tomasi olaangwa Ehwaana, Natanaeli owa Kaana mu Galilaaya, abaana ba Sebbedaayo, neende abeeki bae baandi babiri, bali nibebuusire alala.

³ Simooni Petero yababoolera ati, “Njia ohunaaba.” Mani bosi nibamuboolera bati, “Fwesi huchia ohuchia naawe.” Mani nibeengira elyaato; nae esiro esyo, haba sibadiiraho esiindu syoosi.

⁴Obwiire nibwali buhya, Yesu yeema hu lwaasi; nae abeeki haba sibamanya bati yali Yesu.

⁵Yesu yababoolera ati, “Baaneeng'we, mudiirireho eng'eeni yoosi?” Nabo nibamukobolamo bati “Haba.”

⁶ Yesu yababoolera ati, “Musukune olweero olwo hu muhono muluungi kw'elyaato, muchia ohudiira.” Mani nibasukuna olweero olwo, mani nilubahaya ohuluhweesa balwiingisa mu lyaato, hulw'eng'eeni nyiingi chibadiira.

⁷Omweeki yi Yesu yali yaheera muno, yaboolera Petero ati, “Niye Omwaami weefwe!” Nae Simooni Petero niyawulira ati yali niye Omwaami, yefwaala engubo chae, olwohuba yali syeekenye, mani yaaduumira mu maachi.

⁸Abeeki baandi abo nabo beechera mu lyaato, nibahweesa olweero lwichuule eng'eeni. Haba sibali eyale neende olwaasi, nae byali koti emiita emia ndala [27] ohutula hu lwaasi.

⁹Niboola hu lwaasi, babona esyoosyo sy'omuliro nisiriho eng'eeni neende omugaati.

¹⁰Mani Yesu naababoolera ati, “Muleete hu ng'eeni chimwahadiira buti.”

¹¹Simooni Petero yeengira mu lyaato yaahweesa olweero olwo yaaluleeta hu lwaasi, lwali nilwichuule eng'eeni hoongo, emia ndala neende amahumi kataanu-na-chidatu (153). Nae kata neende nichali enyiingi chityo, olweero haba silwataanduha daawe.

¹²Yesu yababoolera ati, “Mwiiche hulye esy'echuli.” Bulaanu abulao omweeki yeesi owamuteeba ati, “Niiwe wiina?” Olwohuba bamanya bati niye Omwaami.

¹³Yesu yabukula omugaati okwo, mani yaakuberesa abeeki, haandi yaahola atyo neende eng'eeni.

¹⁴Bulaanu lino lyali ehabi lyohudatu Yesu ohubonehera abeeki bae luunyuma lw'ohusyuuha mu bafu.

¹⁵Nibamala ohulya esy'echuli, Yesu yateeba Simooni Petero ati, “Simooni, omwaana wa Yowaana, waaheera ohuhira bano?” Nae yamukobolamo ati, “Eee, Omwaami; omanyire oti ndahuheera.” Yesu yamuboolera ati, “Liisa amakoondi kaange mayere kano.”

¹⁶Ehabi lyohubiri, Yesu haandi yateeba Petero ati, “Simooni, omwaana wa Yowaana, waaheera?” Nae yamukobolamo ati, “Eee, Omwaami; omanyire oti ndahuheera.” Yesu yamuboolera ati, “Yaya amakoondi kaange.”

¹⁷Yesu haandi yamuteeba ehabi lyohudatu ati, “Simooni, omwaana wa Yowaana; waaheera?” Petero yesiinduha muno olwohuba yali amuteebere ehabi lyohudatu ati, “waaheera?” Mani Petero n'amuboolera ati, “Omwaami, omanyire buli siindu; omanyire oti ndahuheera.” Yesu yamuboolera ati, “Liisa amakoondi kaange.

¹⁸Yesu yamuboolera ati, huboolera obwadyeeri bweene endi, niwali omuyere, omweene wefwalaanga mani ochia buli yoodaha. Nae niwahakofule, wahakolole amahono kao, mani omuundu wuundi ahufwaala haandi ahuyira yootadaha ohuchia.”

¹⁹(Yesu yaboola sino ohweekesa engeri yi Petero achia ohufwiiramo ohwiisa oluyaali mu Nasaae.) Mani niyamala ohulomaloma atyo, Yesu yaboolera Petero ati, “Noonde.”

²⁰ Petero niyoobba amahemo enyuma, yabona omweeki wuundi oyo yi Yesu yali yaheera muno n'abaloonda. Omweeki oyo, niye owayeeha hu sirifu sya Yesu nibalya esy'engoloobe, yamuteeba ati, “Omwaami, wiina mweene ochia ohuhuhoba?”

²¹Nae Petero niyamubona, yateeba Yesu ati, “Omwaami, wuno nae yahabe atye?”

²²Yesu yamuboolera ati, “Nihuli ohudaha hwaange mbwe adoong'eo ohwoola lu ndaheechere, odeebayo siina? Ewe noonde!”

²³Enomanoma eyo mani niyisalaana buli abuundu yiti, omweeki oyo haba siyahafwe daawe. Nae Yesu haba siyamuboolera ati haba siyahafwe daawe; nae ati, “Nihuli ohudaha hwaange mbwe adoong'eo ohwoola lu ndaheechere, odeebayo siina?”

²⁴Omweeki oyo niye owalomaloma bino, niye owandiika ebiindu bino, haandi amanyire ati by'aboola byadyeeri nibyo.

²⁵Nae biluwo ebiindu biindi biingi bi Yesu yahola. Buli siindu hweebyo siba nisyaandiikwa, mbaasa endi kata esyaalo syoosi sisyahanyalire ohuyeramo ebitabo byahandiikirwe.