Read saamia Yowaana 4 Bible Online

Yowaana 4 - saamia bible

Yowaana 4

¹Bulaanu Omwaami niyamanya ati Abafarisaayo bali bawulira bati Yesu anyoola haandi abatiisa abeeki baangi ohuhiraho Yowaana

²(nae Yesu mweene haba siniye obatiisaanga, ohutusaho abeeki bae),

³yatula mu Yudea mani n'akobolayo Galilaaya.

⁴Yali ahoyera ohubitira mu Samaria.

⁵ Mani niyoola mu siko sihuluundu sya Samaria silaangwa Sikari, esiri aambi neende omukuunda ku Yakobbo yaberesa omwaana wae Yosefu.

⁶Esulo ya Yakobbo yali ao. Yesu olukeendo lwali nilumujong'iisye muno, mani niyehala hu ndulo w'esulo eyo. Esaa chali koti chisaasaba ch'esideete.

⁷Omuhasi Musamaria yeecha hu sulo ohwo ohudaya amaachi. Yesu yamuboolera ati, “Mbeeho amaachi ng'weeho.”

⁸Abeeki ba Yesu bali bachiire mu siko ohukula ebyohulya.

⁹ Omuhasi Musamaria oyo yamukobolamo ati, “Ewe Omuyudaaya, onyala otye ohusaba ese omuhasi Musamaria amaachi kohung'wa?” Olwohuba Abayudaaya sibawuliirisania neende Abasamaria.

¹⁰Yesu yamukobolamo ati, “Oba n'omanyire esiyaanwa sya Nasaae, neende oyo oli ohuhubooleraanga ati, ‘Mberese amaachi ng'weeho,’ niiwe owahamusabire, mani yaahubereese amaachi k'obulamu.”

¹¹Omuhasi oyo yamuboolera ati, “Omwaami, ewe obula esiindu sy'ohudayira, haandi esulo yino ndeeyi muno. Onatusa yeena amaachi k'obulamu?

¹²Ewe ohiraho Yakobbo kuuka yeefwe, owatuberesa esulo yino, haandi omweene yaying'waamo, neende abaana bae alala neende ebyaayo byae?”

¹³Yesu yakobolamo ati, “Buli muundu ong'wa hu maachi kano, achia ohulumwa obuluwo haandi,

¹⁴nae buli muundu ong'wa hu maachi ka njia ohumuberesa, haba siyahalumwe obuluwo daawe; olwohuba amaachi ka njia ohumuberesa, kachia ohumweeholamo omwaalo kw'amaachi malamu, mani kamuberese obulamu butaakama.”

¹⁵Omuhasi oyo yamuboolera ati, “Omwaami, mberese amaachi ako, haye ohulumwa obuluwo oba haye ohwiichanga ano ohudaya amaachi.”

¹⁶Nae Yesu yamuboolera ati, “Chia olaange wamwo, mani okobole ano.”

¹⁷Omuhasi oyo yamukobolamo ati, “Haba si ndi neende wamwaange.” Yesu yamuboolera ati, “Oli owadyeeri n'oboola oti, ‘Haba si ndi neende wamwaange’;

¹⁸olwohuba wahadeeheraho abasaacha bataanu, kata neende oyo y'oli nae bulaanu, haba si wamwo mweene daawe. Esyo sy'oboolere syadyeeri.”

¹⁹Omuhasi oyo yaboolera Yesu ati, “Omwaami, mbona endi oli omunabbi.

²⁰Baseefwe beenamiraanga Nasaae hu lugulu luno; nae oboola oti Yerusalemu niwo abuundu yi baandu bahoyere ohwiinamiraangamo Nasaae.”

²¹Yesu yamuboolera ati, “Muhasiing'ene, fukiirira bi mboola, esiha siichia ohwoola si baandu bataheenamireenge Laata hu lugulu luno, oba mu Yerusalemu.

²²Eng'we mwiinamira bi mutaamanyire; nae efwe, hwiinamira bi humanyire, olwohuba obuwonia butula mu Bayudaaya.

²³Olwohuba esiha siri aambi ohwoola, haandi mbao syoolere, si abeenamira Laata badyeeri sibachia ohwiinamiraanga Laata mu mwooyo neende mubwadyeeri; olwohuba abafwaana batyo, nibo ba Nasaae Laata adaha bamwiinamire.

²⁴Olwohuba Nasaae Mwooyo niye, haandi abo abamwiinamira bahoyere bamwiinamire mu mwooyo neende mubwadyeeri.”

²⁵Omuhasi oyo mani n'amuboolera ati, “Manyire endi, Mesaaya olaangwa Kristo, wohwiicha, nae niyaheeche, achia ohutweekesa ebiindu byoosi.”

²⁶Yesu yamuboolera ati, “Ese oli ohulomaloma naawe, niise oyo.”

²⁷Mu biha byeene ebyo, abeeki bae nibakobola, bawuka muno ohubona Yesu naali ohulomalomaanga neende omuhasi oyo, nae abulao owamuteebaho ati, “Odaha siina?” Oba ati, “Lwasiina oli ohulomalomaanga neende omuhasi oyo?”

²⁸Omuhasi oyo yaleha ao esyoongo yae, yaachia mu siko, yaboobera abaandu bamwo ati,

²⁹“Mwiiche mubone omuundu wumbooleere ebyo byoosi bi ndahola. Wuno anyala ohuba naali niye Kristo?”

³⁰Ao mani abaandu nibatula mu siko esyo nibeecha eyiri Yesu.

³¹Mu biha ebyo, abeeki bae bamwekweeda nibaboola bati, “Rabbi (Omweekesa), lyaaho ebyohulya mberi.”

³²Nae Yesu yabakobolamo ati, “Ese ndi neende ebyohulya bi ndya, bi mutaamanyire daawe.”

³³Abeeki bae bachaaka ohuteebana abeene-na-beene bati, “Aliwo omuundu wuundi omuleteereho ebyohulya?”

³⁴Yesu yababoolera ati, “Ebyohulya byaange nibyo ohuhola ebyo bi owaanduma adaha, neende ohwooseresa omulimo kwae.

³⁵Eng'we haba simubolaanga muti, ‘Kidoong'ere emyoosi kine kyoong'ene n'ekesa lyoola’? Mbaboolera endi mutingaaleho mubone koti lu mikuunda kyeengere, ebyaamo byoolere ohukesa.

³⁶Oyo yeesi okesa anyoola omusaara, mani yaabuusa ebyaamo by'obulamu butaakama, mani omuundu owaanya neende okesa, banyale ohusangaalira alala.

³⁷Olwohuba olukaado luboola mubwadyeeri bweene luti, ‘Omuundu wuundi ataaka nae owuundi niye okesa.’

³⁸Ese ndabatuma ohukesa ebyo bi mutahalaabanira; abaandu baandi nibo abahalaabani, mani eng'we mwiingire mu mirimo kyaabwe.”

³⁹Abasamaria abaangi ohutula mu siko esyo, bamufukiiriramo ohweema hu buloli bw'omuhasi oyo mbwe, “Yambooleere buli siindu syoosi si ndaholaho.”

⁴⁰Abasamaria abo niboola eyiri Yesu, bamweekweeda bati adoong'eho nabo; mani Yesu n'adoong'a nabo endaalo chibiri.

⁴¹Yesu niyalomaloma nabo, Abasamaria baangi muno bamufukiiriramo ohweema hu mboosi yae.

⁴²Abaandu abo baboolera omuhasi oyo bati, “Bulaanu hufukiirira, ataali ohweema hu mboosi chao, nae olwohuba abeene humalire ohwewuliirira, humanyire huti, mubwadyeeri bweene, wuno niye Omuwonia w'esyaalo.”

⁴³Endaalo echo chibiri nichawa, Yesu yatulayo yaachia Galilaaya.

⁴⁴ Olwohuba Yesu mweene yali n'aboolere ati, “Omunabbi siyeswaangamo oluyaali mu syaalo syae.”

⁴⁵ Mani niyoola Galilaaya, Abagalilaaya bamwaakaanira bulai muno, olwohuba bali nibachiire Yerusalemu hu sidyaalo sya Paasaka, haandi babona buli siindu si yahola hu sidyaalo esyo.

⁴⁶ Ao mani Yesu n'akobolayo Kana esya Galilaaya, yi yali n'aholere amaachi kaaba efiini. Nae Kaperanaumu yaliyo omuhunuufu yi mwaana wae yali omulwaae.

⁴⁷Niyawulira ati Yesu yali atulire mu Yudea yoolere mu Galilaaya, yaacha yamwekweeda yeechie ewae awonie omwaana wae oyo, olwohuba yali n'ali aambi ohufwa.

⁴⁸Yesu yamuboolera ati, “Nimutabona obulolero neende eby'amayia haba simuchia hufukiirira daawe.”

⁴⁹Nae omuhunuufu oyo yakobolamo ati, “Omwaami, ewe yihirira wiichie omwaana waange n'asisiiri ohufwa.”

⁵⁰Yesu yamuboolera ati, “Kobolayo; omwaana wao mulamu.” Omusaacha oyo yafukiirira emboosi yi Yesu yamuboolera, mani n'akobolayo engo wae.

⁵¹Nae niyali n'asisiiri hu ngira n'akobolayo, abahalaabani bae beecha babukaanana nae mani nibamuboolera bati, omwaana wae mulamu.

⁵²Yabateeba esiha syeene si yachaakiramo ohukobolamo obulamu, bamuboolera bati, “Ekulo esiha sy'esaa chitaanu-na-chibiri.”

⁵³Ao laatang'ene mwaana niyechulisa ati esyo nisyo esiha syeene, Yesu siyamuboolera ati, “Omwaana wao mulamu”. Ao omweene alala neende abomu daala lyae boosi, nibafukiirira.

⁵⁴Sino nisyo esilolero syohubiri si Yesu yahola n'akoboole Galilaaya n'atulire Yudea.