Read saamia Yowaana 5 Bible Online

Yowaana 5 - saamia bible

Yowaana 5

¹Luunyuma lwa bino, syabaao esidyaalo sy'Abayudaaya, Yesu yesi yacha Yerusalemu.

²Bulaanu Yerusalemu, aambi neende esiruwa silaangwa, Esiruwa sy'Amakoondi, waliwo esidiba silaangwa mu Luibburania siti “Bbetisata,” esiriho ebigoro bitaanu.

³Mu bigoro ebyo, abalwaae ba buli mbya beyalisaangamo koti, abawofu, abalema, abadataala.

⁴Malaika w'Omwaami yehaanga mu sidiba mu biha biindi, mani n'adubuula amaachi. Oyo owataangiraanga ohwiiha mu sidiba amaachi nikadubuuhire, yawonesebwaanga buli bulwaae boosi bu yalichiingi nabo. [8]

⁵Yaluwo omusaacha owamala emyaaka amahumi kadatu neende chitaanu-na-chidatu n'alwaala.

⁶Yesu niyamubona niyeyaliise ao, yamanya ati, omusaacha oyo yali amalire ao embaka ndeeyi muno, mani n'amuteeba ati, “Odaha ohuwonisibwa?”

⁷Omusaacha mulwaae oyo yamukobolamo ati, “Omwaami, mbula omuundu yeesi owahangiinga yanyingisa mu sidiba amaachi nikadubuuhire, olwohuba ese lu njolerayo, nyoola omuundu wuundi n'amalire ohwiingiramo hale.”

⁸Yesu n'amuboolera ati, “Siingira, obukule obuliri bwao okeende.”

⁹Mani abweene-na-bweene ao, omusaacha oyo yawonisibwa, n'abukula obuliri bwae n'akeenda.

¹⁰ Oludaalo olwo lwali olwa Sabbaato. Abayudaaya nibaboolera omusaacha wali awonisibwe oyo bati, “Olwaleero lwa Sabbaato, haba sofukiirirwa ohukiinga obuliri bwao.”

¹¹Nae yabakobolamo ati, “Omusaacha wumoniisye niye owumbooleere ati, ‘Siingira, obukule obutalihe bwao okeende.’ ”

¹²Nabo bamuteeba bati, “Omuundu oyo niye wiina ohubooleere ati, ‘Siingira, obukule obuliri bwao okeende’?”

¹³Nae bulaanu, omusaacha wali awonisibwe oyo, haba siyali amumanyire daawe, olwohuba Yesu yali amalire ohwewerawo, koti lu sidiyiiha sy'abaandu sihoongo muno syali abuundu ao.

¹⁴Luunyuma, Yesu yamwakaana haandi n'ali mu Nyuumba ya Nasaae, mani n'amuboolera ati, “Bona, bulaanu oli omulamu, otonoonaangaho haandi daawe, ataali ao esihiramo obubi sichia ohuhukwaaho.”

¹⁵Omusaacha oyo yawaawo, mani n'achia n'aboolera Abayudaaya ati yali Yesu owamuwonia.

¹⁶Sino nisyo syakera Abayudaaya nibakiiya Yesu, olwohuba yali aholere esiindu sino hu ludaalo lwa Sabbaato.

¹⁷Yesu yabakobolamo ati, “Laata buli ludaalo ahola, mani syesi hoyera ohuhola.”

¹⁸Sino nisyo esyakera Abayudaaya bamukiiya muno ohumwiita, olwohuba haba siyaakama ohuhalaka elako lidiira hu Sabbaato lyoong'ene, nae haandi yelaanga ohuba Omwaana wa Nasaae, mani niyeehola owaakana neende Nasaae.

¹⁹Ao Yesu mani n'ababoolera ati, “Mbaboolera obwadyeeri bweene endi, sibulao esiindu syoosi si Omwaana anyala ohuhola hulwae omweene, ohutusaho esyo sy'abona koti Laatang'ene lu asihola; olwohuba buli si Laatang'ene ahola, Omwaana yesi nisyo sy'ahola.

²⁰Olwohuba Laatang'ene adaha Omwaana, mani amweekesa byoosi bi aba n'ahola; haandi achia ohumweekesa emirimo kihiraho neende ekyo, hu munyale ohuwukaho.

²¹Olwohuba, koti lu Laatang'ene asyuuhisa abafu mani yababeresa obulamu, olwo nilwo lwosi lu Mwaana aberesa obulamu oyo yeesi yaba n'adahisa.

²²Laatang'ene haba s'aheengera omusaango ohuhira omuundu yeesi, nae yaberesa Omwaana obunyala bwoosi obw'oheenga emisaango,

²³hu baandu boosi banyale ohwiisaanga oluyaali mu Mwaana, koti lu beesa oluyaali mu Laatang'ene. Oyo yeesi oteesa oluyaali mu Mwaana, haba siyeesa oluyaali mu Laatang'ene owamutuma.

²⁴Mbaboolera obwadyeeri bweene endi, oyo owulira emboosi chaange mani yafukiirira oyo owaanduma, ali neende obulamu butaakama; haba saachia huheengerwa omusaango, aba atulire mu hufwa, mani yoola mu bulamu.

²⁵“Mbaboolera obwadyeeri endi, esiha sichia ohwoola, haandi simalire ohwoola, abafu lu bachia ohuwulira ekono ly'Omwaana wa Nasaae. Mani abo abaliwulira bahabe abalamu.

²⁶Olwohuba koti lu Laatang'ene ali enjaako y'obulamu, mu ngeri nasilala eyo, yaberesa Omwaana wae obunyala bw'enjaako y'obulamu.

²⁷Haandi yamuberesa obunyala bw'ohuheenga emisaango, olwohuba niye Omwaana w'Omuundu.

²⁸Esyo sitabawukisa daawe; olwohuba esiha sichia ohwiicha, abo boosi abali mu biriindwa bachia ohuwulira ekono lyae

²⁹ mani babitulemo. Abo abaholaanga ebilai, bahasyuuhire mani baaba abalamu. Nae abo abaholaanga ebibi, bahasyuuhire mani baheengerwe emisaango.

³⁰“Ese sinyala ohuhola esiindu syoosi hulw'obunyala bwaange omweene daawe. Heenga omusaango koti lu Nasaae yaamboolera ohukuheenga. Mani sakira eheenga y'emisaango yaange y'obwadyeeri, olwohuba ese haba siholera hu bi ndaha daawe, nae holera hu ebyo owaanduma by'adaha.

³¹Nikali mbwe ese omweene niise owetusira obuloli, obuloli bwaange buba si bwadyeeri daawe;

³²nae yiluwo owuundi otusa obuloli bundiiraho, mani manyire endi, obuloli bwatusa obundiiraho, bwadyeeri nibwo.

³³ Eng'we mwatuma bawamwaanda eyiri Yowaana, mani n'alomaloma obwadyeeri bweene.

³⁴Sikali mbwe obuloli bundiiraho butula hu baandu sa; nae ese mbaboolera sino hu munyale ohuwonisibwa.

³⁵Yowaana yali etaara lyaaduha haandi elihosa. Nae eng'we mwadaha ohumala esiha sidiidi syoong'ene nimwehoyera mu bulafu.

³⁶Nae ndi neende obuloli buhuluundu buhiraho obwa Yowaana. Olwohuba ebyo bi hola, Laata bi yamboolera ohwooseresa, ebyeene ebyo nibyo ebyeekesa biti, Laata yaanduma.

³⁷ Laata owanduma oyo, niye omweene owomiisa ati omweene niye owaanduma. Eng'we haba simuwuliraangaho ekono lyae kata nabudiidi, oba ohubona koti lu afwaana.

³⁸Haandi emboosi yae haba simuyibiiha mu myooyo kyeeng'we, olwohuba haba simufukiirira oyo yi yatuma.

³⁹Mukoonyeresa mu byandiiko byoolerefu, olwohuba mubaasa muti, omwo nimwo omuli obulamu butaakama. Haandi ebyeene ebyo nibyo bi nomanomaho;

⁴⁰nae eng'we muhaya ohwiicha yi ndi ohunyoola obulamu.

⁴¹Ese haba singoonya ohunyoola oluyaali ohutula eyiri abaandu daawe.

⁴²Nae ese manyire endi eng'we haba simwaheera Nasaae mu myooyo kyeeng'we.

⁴³Ese ndeecha mu liita lya Laata, nae eng'we haba simunjakaanira daawe; nae owuundi niyeecha mu liita lyae omweene, oyo niye yi muchia ohumwaakaanira.

⁴⁴Munyala mutye ohufukiirira, nimukoonya onyoola oluyaali ohutula eyiri abaandu basyeeng'we, nae haba simudeeba hu luyaali lutula eyiri Nasaae mulala yeeng'ene?

⁴⁵Mutabaasa muti neese ochia ohubawabira eyiri Laata. Musa niye ochia ohubawaabira, oyo yi mwataamo esuubi lyeeng'we.

⁴⁶Nikali mbwe mwafukiirira mu Musa, syesi mwahafukiiriremo, olwohuba Musa yandiika ebinomanomaho.

⁴⁷Nae nimutafukiirira mu bi Musa yaandiika, munyala mutye ohufukiirira emboosi chaange?”