Read saamia Yowaana 6 Bible Online

Yowaana 6 - saamia bible

Yowaana 6

¹Ebyo nibyawa, Yesu yaambuha yaachia engereha w'Enyaanja ey'e Galilaaya, niyo Enyaanja ya Tibberia.

²Abaandu baangi muno bamuloondaho, olwohuba bali nibabweene obulolero bu yahola, mu huwonia abalwaae.

³Yesu yaniina hu lugulu, mani niyehala eyo alala neende abeeki bae.

⁴Esidyaalo sihuluundu sy'Abayudaaya sya Paasaka syali aambi ohwoola.

⁵Yesu niyasiingisa emoni aakulu, yabona esidiiyiha sy'abaandu sihoongo nisiicha yi ali, n'ateeba Filipo ati, “Hunaakule yeena emigaati, hu baandu bano boosi banyale ohulya?”

⁶Esyo yasiboolera Filipo ohumuteema-buteema, olwohuba omweene yali n'amanyire sya anaahole.

⁷Filipo yamukobolamo ati, “Ebyohulya bikula edinaari[9] emia chibiri (200) haba sichinyala humala buli muundu ohulyaho kata ahadiidi hoong'ene.”

⁸Mulala hu beeki bae, Anderea mwaanang'ina Simooni Petero, yamuboolera ati,

⁹“Ano waliwo omusyaani wuundi oli neende emigaati kitaanu neende eng'eeni chibiri. Nae bino binahoonye siina, hu baandu baangi bakiira ao boosi?”

¹⁰Yesu yaboola ati, “abaandu mubeehase aasi.” Abuundu ao waliwo obunyaasi buungi muno. Abaandu boosi mani nibeehala aasi. Abasaacha bali aambi w'elifu chitaanu.

¹¹Yesu mani n'abukula emigaati ekyo, nae niyamala ohweebasa, yakikabulira abo abali nibehaale aasi; eng'eeni chosi yachihola atyo. Buli muundu yanyoola bi yali n'adaha.

¹²Nibamala ohwiikuta, Yesu yaboolera abeeki bae ati, “Mubuuse ebidonye-donye bidoong'ereho, sibuleo esiindu syoosi esinyaasiha.”

¹³Mani nibabuusa ebidonye-donye ebyo, nibeechusa ebimweero ehumi-na-bibiri eby'ebidonye-donye ebyatula mu migaati kitaanu, bi baandu balya baleha.

¹⁴Abaandu nibabona esilolero esyo si yali n'aholere, baboola bati, “Mubwadyeeri bweene, wuno niye omunabbi ow'ohwiicha mu syaalo muno!”

¹⁵Yesu niyamanya ati bali aambi bamudiire neende amaani bamuhole omutuki, yakobolayo haandi hu lugulu, mani n'aba eyo yeeng'ene.

¹⁶Obwiire nibweera, abeeki ba Yesu beehirira ena nyaanja,

¹⁷beengira mu lyaato, mani nibasyaabala ohuchia Kaperanaumu. Bulaanu, esiirima syali nisidiirire hale, nae Yesu yali n'asisiiri ohwiicha yi bali.

¹⁸Omuyaka muungi kwawuucha, mani enyaanja yeecha yaaya.

¹⁹Abeeki nibali bafukire elyaato aambi ekilomiita chine oba chitaanu, [10] babona Yesu n'akeendera hu maachi, n'asuda aambi neende elyaato. Batya muno,

²⁰nae Yesu yababoolera ati, “Niise; mutatya daawe.”

²¹Abeeki basangaala muno, bali badaha ohumwiingisa mu lyaato, nae abweene-na-bweene ao, elyaato elyo nilyoola hu sikobero si bali nibachiaho.

²²Hu ludaalo luloondaho, abaandu baangi abali nibadoong'ere engereha w'enyaanja, babona bati, elyaato lala lyoong'ene nilyo elyali nilidoong'ereyo, haandi bati Yesu haba siyali niyengiire mu lyaato neende abeeki bae, nae abeeki bae bali baweereo boong'ene.

²³Nae kata katyo, amaato kaandi ohutula Tibberia keecha aambi neende abuundu yi baandu baliiramo emigaati Omwaami n'amalire ohweebasa Nasaae.

²⁴Abaandu nibabona bati Yesu s'aluwo, kata abeeki bae, bosi mani nibasyaabala mu maato, nibachia Kaperanaumu nibakoonya Yesu.

²⁵Mani abaandu abo nibanyoola Yesu engereha w'enyaanja, bamuteeba bati, “Rabbi, wiichire ano liina?”

²⁶Yesu yabakobolamo ati, “Mbaboolera obwadyeeri endi, simuli ohungoonya olwohuba mwabona obulolero daawe, nae olwohuba mwalya emigaati mwekutira elalira.

²⁷Mutahalaabaniraanga ebyohulya binyaasiha, nae muhalaabanire ebyohulya biyiindira ohwoola mu bulamu butaakama, bi Omwaana w'Omuundu achia ohubaberesa; olwohuba oyo niye yi Nasaae Laata mweene yataaho ahalolero hae.”

²⁸Mani nibamuteeba bati, “Huhole siina syeene, ohwooseresa ebyo Nasaae by'adaha?”

²⁹Yesu yabakobolamo ati, “Nasaae by'adaha muhole nihwo ohufukiirira oyo yi yatuma.”

³⁰Mani nibamuteeba bati, “Mani halolero siina ewe h'ohola, hubonereho hu hunyale ohufukiirira? Hali yeena h'ohola?

³¹ Bakuuka yeefwe balya mana mu siparara; koti lu syandiikwa siti, ‘Yababeresa emigaati ohutula Muukulu ohulya.’ ”

³²Ao mani Yesu n'ababoolera ati, “Mbaboolera obwadyeeri endi, Musa haba siniye owababeresa emigaati ohutula Muukulu; Laata niye obaberesa omugaati kwadyeeri ohutula Muukulu.

³³Olwohuba omugaati Nasaae kw'ababeresa, nikwo okwo okwiiha aasi ohutula Muukulu, haandi okuleetera abaandu obulamu.”

³⁴Ao mani nibamuboolera bati, “Omwaami, tubereseenge omugaati kuno buli ludaalo.”

³⁵Yesu yababoolera ati, “Ese ndi omugaati kwobulamu. Oyo owiicha yi ndi haba saachia hulumwa enjala, haandi oyo owufukiiriramo siyahalumwe obuluwo daawe.

³⁶Nae mbaboleere endi, eng'we mumbweene, nae musisiiri ohufukiirira.

³⁷Abo boosi ba Laata yamberesa bachia ohwiicha yi ndi; nae oyo yeesi owiicha yi ndi, haba siinjia humusukuna erwaanyi.

³⁸Olwohuba ese sindeeha aasi ohutula Muukulu ohuhola bi ese mweene ndaha, nae ohuhola bi oyo owaanduma adaha.

³⁹Mani sino nisyo si oyo owaanduma adaha ati, takosaho esiindu syoosi hu biindu bi yaamberesa byoosi, nae nyale ohusiberesa obulamu haandi hu ludaalo lw'enjakamo.

⁴⁰Olwohuba huno nihwo ohudaha hwa Laata, mbwe buli oyo yeesi obona Omwaana mani yamufukiiriramo, abe neende obulamu butaakama; haandi njia ohumuberesa ohumusyuuhisa hu ludaalo lw'enjakamo.”

⁴¹Ao mani Abayudaaya nibamweng'ulung'uunyira, olwohuba yali aboolere ati, “Ese ndi omugaati kweeha nikutula Muukulu.”

⁴²Mani nibaboola bati, “Wuno siniye Yesu, omwaana wa Yosefu? Laatang'ene neende ng'ina hubamanyire. Bulaanu, anyale atye ohuboola ati, ‘Ndeeha ohutula Muukulu?’”

⁴³Yesu yabakobolamo ati, “Mulehe ohweng'ulung'uunya abeene-na-beene.

⁴⁴Abulao omuundu yeesi onyala ohwiicha yi ndi, ohutusaho nga Laata owaanduma niye omuleetere yi ndi; haandi njia ohumusyuuhisa hu ludaalo lw'enjakamo.

⁴⁵ Mu banabbi, syandiikwa siti, ‘Boosi baheekeswe neende Nasaae.’ Oyo yeesi owulira mani yeeka, yeecha yi ndi.

⁴⁶Si ndi ohuboola endi yiluwo kata omuundu mulala owali yabonaho Laata, ohutusaho oyo owatula eyiri Nasaae; oyo niye yabona Laata.

⁴⁷Mbaboolera obwadyeeri endi, oyo yeesi ofukiirira ali neende obulamu butaakama.

⁴⁸Ese ndi omugaati kwobulamu.

⁴⁹Mu siparara, bakuuka yeeng'we balya mana, mani nibafwa.

⁵⁰Kuno nikwo omugaati kweeha ohutula Muukulu, oyo owahakulyeeho ahaye ohufwa.

⁵¹Ese ndi omugaati mulamu okweeha ohutula Muukulu; oyo yeesi owahalye hu mugaati kuno, yahabe omulamu endaalo choosi pe; haandi omugaati ku ndahababerese niyo enyama yaange olw'obulamu by'esyaalo.”

⁵²Abayudaaya mani nibachaaka ohuyingana abeene-na-beene nibaboola bati, “Wuno anyala atye ohutuberesa enyama yae ohuyilya?”

⁵³Yesu yababoolera ati, “Mbaboolera obwadyeeri endi, nimutalicheenge enyama y'Omwaana w'Omuundu, haandi mwaang'wa amabaanga kae, haba simubecheenge neende obulamu mu eng'we.

⁵⁴Oyo olya enyama yaange, haandi yaang'wa amabaanga kaange, ali neende obulamu butaakama, haandi njia ohumusyuuhisa hu ludaalo lw'enjakamo.

⁵⁵Olwohuba enyama yaange, byohulya byeene, haandi amabaanga kaange, syohung'wa syeene.

⁵⁶Oyo olya enyama yaange haandi yaang'wa amabaanga kaange, aba mweese, haandi syesi ndamubaamo.

⁵⁷Koti lu Laata mulamu yaanduma, haandi nduwo hulwa Laata, mani oyo owuundya, achia ohuba hulwaange.

⁵⁸Kuno nikwo omugaati kweeha ohutula Muukulu, sikuli koti ku bakuuka yeeng'we balya mani baafwa. Oyo olya omugaati kuno yahabe omulamu endaalo choosi pe.”

⁵⁹Bino Yesu yabilomalomera mu Sinagoogi, niyeekesa Kaperanaumu.

⁶⁰Abaangi hu baloondi bae nibawulira sino, baboola bati, “Enomanoma yino ndinyu muno; wiina onyala ohuyitekeeresa?”

⁶¹Yesu niyamanya mu mwooyo kwae ati abeeki bae bali nibasyemulugunyaho, yababoolera ati, “Sino sibamalamo amaani?

⁶²Nae nimwahabweene Omwaana w'Omuundu n'aniina ohukobola yi yabechaanga hale?

⁶³Omwooyo nikwo okuberesa obulamu, omubiri kubulaho si kuhola; emboosi chimbalomalomeere chino, nicho omwooyo haandi nicho obulamu.

⁶⁴Nae yiluwo abaandi hweeng'we abatafukiirira.” Olwohuba ohutulira elalira muhuchaaka hweene, Yesu yali amanyire abatafukiirira, neende oyo owali achia ohumulyaamo oluhobo.

⁶⁵Mani n'aboola ati, “Sino nisyo esikerere ndababoolera endi abulao omuundu yeesi onyala ohwiicha yi ndi ohutusaho nga Laata niye omuleetere yi ndi.”

⁶⁶Ohutula hu ludaalo olwo, abaangi hu beeki bae nibamukaluuhanaho, nibaakama ohukeendaanga nae.

⁶⁷Ao mani Yesu n'ateeba abeeki bae ehumi-na-babiri ati, “Mwesi mudaha ohuwaao?”

⁶⁸Simooni Petero yakobolamo ati, “Omwaami, hunaachie eyiri wiina? Ewe niiwe oli neende emboosi ch'obulamu butaakama;

⁶⁹efwe hwamala ohufukiirira haandi humanyire huti, niiwe Omwoolerefu Mweene wa Nasaae.”

⁷⁰Yesu yabakobolamo ati, “Siniise owabadoola eng'we ehumi-na-babiri? Nae mulala hweeng'we Sitaani niye!”

⁷¹Yesu yali alomaloma hu Yuda omwaana wa Simooni Yisikarioti, olwohuba kata yahaba mulala hu ehumi-na-babiri, niye owali achia ohumuhoba.