Read saamia Yowaana 7 Bible Online

Yowaana 7 - saamia bible

Yowaana 7

¹Ebyo nibyawa, Yesu yakeenda mu Galilaaya. Haba siyadaha ohukeenda mu Yudea, olwohuba Abayudaaya bali bakiiya amakesi k'ohumwiita.

² Bulaanu, esidyaalo sy'Abayudaaya sy'Ebikaali syali aambi ohwoola.

³Bamwaanang'ina Yesu mani nibamuboolera bati, “Tula ano ochie mu Yudea, abeeki bao bosi banyale ohubona by'ohola.

⁴Olwohuba abulao omuundu ohola esiindu syoosi mu bweekisi n'adaha amanyihaane alafu. Ewe koti lu ohola ebiindu bino, leha esyaalo syoosi sihumanye.”

⁵Olwohuba kata bamwaanang'ina beene bosi haba sibamufukiiriramo.

⁶Yesu yababoolera ati, “Esiha syaange sisisiiri ohwoola, nae esiha syeeng'we buli ludaalo siluwo.

⁷Eng'we esyaalo sisinyala ohubasyuula, nae sisyuula, olwohuba mbabooleraanga endi ebiholwa byaabwe bibi.

⁸Eng'we abeene muchie hu sidyaalo esyo; ese haba siinjia huchia hu sidyaalo sino, olwohuba esiha syaange sisisiiri ohwoolera elalira.”

⁹Niyamala ohubaboola atyo, Yesu yadoong'a mu Galilaaya.

¹⁰Bamwaanang'ina nibamala ohuchia hu sidyaalo esyo, Yesu yesi mani n'achia, ataali alafu, nae mu bweekisi.

¹¹Abayudaaya bali nibamukiiya hu sidyaalo nibaboola bati, “Omweene ali yeena bweene?”

¹²Mani waliwo ohumwemoonyaho huungi muno mu baandu. Nae abaandu baandi nibaboola bati, “Omuundu wuno mulai niye,” abaandi nabo nibaboola bati, “Haba, wuno ali ohukosya abaandu.”

¹³Nae olw'ohutya Abayudaaya, abulao omuundu yeesi owamulomalomaho alafu.

¹⁴Esidyaalo nisyali aambi ohwoola akatikaati, Yesu yeengira mu Nyuumba ya Nasaae, mani n'achaaka ohweekesa.

¹⁵Abayudaaya bawuka muno mani nibaboola bati, “Wuno anyala atye ohuba neende amakesi katyo, [11] n'asisiiri ohuchaaho mu somero lyoosi daawe?”

¹⁶Yesu yabakobolamo ati, “Bi njekesa haba si byaange, nae by'oyo owaanduma;

¹⁷buli omuundu odaha ohuhola bi Nasaae adaha, achia ohumanya ati enjekesa yino yitula eyiri Nasaae oba ndi ohulomaloma hulw'obunyala bwaange omweene.

¹⁸Omuundu yeesi olomaloma hulw'obunyala bwae omweene, aba akoonya ohunyoola oluyaali lwae; nae oyo okoonya oluyaali lw'oyo owamutuma aba owadyeeri, haandi abulamo obubacha.

¹⁹Musa haba siyababeresa amalako daawe? Nae hweeng'we, abulao odiira amalako ako. Lwasiina mukiiya amakesi k'ohuunjita?”

²⁰Abaandu abo bakobolamo bati, “Ewe oliho omusaambwa! Wiina okiiya amakesi k'ohuhwiita?”

²¹Yesu yabakobolamo ati, “Ndahola esy'maya silala, nae eng'we mweesi nimusiwuka.

²² Bulaanu Musa yabalagira ohuhebwa (kata ayahaba mbwe sino haba sisyataandira hu Musa, nae syataandira hu bakuuka yeefwe). Kata hu ludaalo lwa Sabbaato, muheba omuundu.

²³ Omuundu nibamuheba hu ludaalo lwa Sabbaato, elako lya Musa mani lyahaya ohuhalakwa, bulaanu ese muunyoolerera olwohuba olw'ohuwonia omuundu hu ludaalo lwa Sabbaato, mani n'aba omulamu?

²⁴Muleheenge ohuheenga omusaango ohweema hu biindu byoohumukulu biboneha, nae muheengeenge omusaango nimuloondakana neende obuluungifu bu mumanyire.”

²⁵Sakira abaandu baandi ohutula Yerusalemu beteeba bati, “Wuno haba siniye yi bakiiya ohwiita?

²⁶Nae nguno ali ano, alomalomera alafu, nae sibulao si bamuboolaho daawe! Sinyala ohuba siti ab'obunyala bahaba nibamayire obwadyeeri bweene bati wuno niye Kristo?

²⁷Nae efwe humanyire yi wuno atula; nae Kristo niyaheeche, abulao omuundu yeesi olimanya yaatula.”

²⁸Yesu yayaala niyeekesa mu Nyuumba ya Nasaae ati, “Ese muumanyire haandi yi ndula mumanyireyo? Nae ese haba sindeecha hulw'ohudaha hwaange omweene; oyo owaanduma mubwadyeeri aluwo, nae eng'we haba simumumanyire.

²⁹Ese mumanyire, olwohuba ndula yi ali, haandi niye owaanduma.”

³⁰Ao mani nibakiiya amakesi kohumudiira; nae abulao omuundu yeesi owamudiiraho, olwohuba esiha syae syali nisisisiiri ohwoola.

³¹Kata katyo, abaandu baangi bamufukiiriramo; bateeba bati, “Kristo niyaheeche, mubaasa muti yahahole obulolero buungi obuhira bu wuno aholere?”

³²Abafarisaayo bawulira esidiiyiha esyo nisyemoonya hu Yesu. Mani abalaamisi bahuluundu neende Abafarisaayo nibatuma abasikaari ohuchia ohumudiira.

³³Yesu mani n'aboola ati, “Njia ohuba naang'we esiha sidiidi, mani male njie eyiri oyo owaanduma.

³⁴Muchia ohungoonya, nae haba simuchia humbona daawe; olwohuba yi ndi, eng'we simunyala hwoolayo daawe.”

³⁵Abayudaaya mani nibaboolanira abeene-na-beene bati, “Wuno adaha ohuchia yeena bweene yi hutanyala hwoolayo? Adaha ohuchia eyiri abo abasalaanira mu syaalo sy'Abagiriki mani yeekese Abagiriki?

³⁶Siina syeene si yekesa n'aboola ati, ‘Muchia ohungoonya, nae haba simuchia humbona daawe,’ haandi ati, ‘Yi ndi, eng'we simunyala hwoolayo daawe’?”

³⁷ Hu ludaalo lw'esidyaalo lumaliirihayo, haandi oludaalo luhuluundu luhiramo, Yesu yasiingira yeema, mani n'alomalomera mu kono ly'aakulu n'aboola ati, “Oyo yeesi olumwa obuluwo, leha yeeche yi ndi ang'we.

³⁸ Oyo yeesi owuufukiiriramo, koti [12] ebyandiiko byoolerefu lu biboola, ‘Emyaalo ky'amaachi k'obulamu kichia ohuhulukusa nikitula mu mwooyo kwae.’ ”

³⁹Nae bulaanu Yesu yalomaloma sino, niyeekesa Mwooyo Mwoolerefu, yi abo boosi abamufukiiriramo bahanyoole; olwohuba ohwoola esiha esyo, Mwooyo Mwoolerefu yali asisiiri ohwiicha, olwohuba Yesu yali asisiiri ohubereswa oluyaali.

⁴⁰Nae nibawulira emboosi chino, abaandu baandi baboola bati, “Wuno munabbi mweene.”

⁴¹Abaandi nibaboola bati, “Wuno Kristo niye.” Nae abaandi nabo nibaboola bati, “Kristo anyala ohutula mu Galilaaya?

⁴² Ebyandiiko byoolerefu sibiboola biti Kristo achia ohutula mulwiibulo lwa Daudi, haandi atule Bbetilehemu, esiko si Daudi yalimo?”

⁴³Mani esidiiyiha sy'abaandu nisikabuhanamo hulwa Yesu.

⁴⁴Mani abaandi mwaabo nibadaha ohudiira Yesu, nae abulao omuundu yeesi owamudiiraho.

⁴⁵Abasikaari mani nibakobolayo eyiri abalaamisi bahuluundu neende Abafarisaayo. Abo mani nibabateeba bati, “Lwasiina simumuleetere?”

⁴⁶Abasikaari babakobolamo bati, “Abulao omuundu yeesi owalomalomaho bulai koti lu oyo alomaloma!”

⁴⁷Abafarisaayo babakobolamo bati, “Eng'we mwesi mukoserwe?

⁴⁸Aliwo omuundu yeesi mu bahuluundu beefwe oba mu Bafarisaayo owamufukiiriremo?

⁴⁹Ohutusaho esidiiyiha sy'abaandu sino esitamanyire amalako, haandi esibwaabe.”

⁵⁰ Nikodemu, oyo owachia eyiri Yesu hale, haandi mulala hu Bafarisaayo, mani n'ababoolera ati.

⁵¹“Amalako keefwe kafukiirira ohuheengera omuundu omusaango, n'asisiiri ohuwoseswa, neende ohumanya sy'aholere?”

⁵²Mani nibakobolamo bati, “Hane wesi otula Galilaaya? Konyeresa mu byandiiko byoolerefu, mani ochia ohubona oti, Galilaaya, abulao omunabbi yeesi otulayo.”

⁵³Mani buli muundu n'akobola engo wae.