Read saamia Yowaana 8 Bible Online

Yowaana 8 - saamia bible

Yowaana 8

¹Nae Yesu yachia hu Lugulu lw'Emiseituuni.

²Echuli mu mabwiibwi Yesu yaachia mu Nyuumba ya Nasaae; mani abaandu boosi nibeecha yi ali. Yesu yehala aasi mani n'achaaka ohubeekesa.

³Ao abaandiiki b'Amalako ka Musa neende Abafarisaayo nibaleeta omuhasi yi badiira n'ahola obucheke, nibamuta yi buli muundu anyala ohumubona.

⁴Bateeba Yesu bati, “Omweekesa, omuhasi wuno anyoolerwe n'ahola obucheke mani nibamudiira.

⁵ Mu malako, Musa yatulagira ow'engeri eyo ohuhubbwaanga amakina afwe. Naawe ewe oboolaho siina?”

⁶Esyo ba silomaloma nibateema Yesu, hu banyoole esifune sy'ohumuwaabira omusaango. Nae Yesu yaguunama aasi, mani n'achaaka ohwandiika hu loba neende olwala lwae.

⁷Nae nibemeeda ohumuteeba, Yesu yasiingira yeema mani n'ababoolera ati, “Leha oyo mweeng'we otaliho neende esyonoono syoosi ataangire ohumuhubba ekina.”

⁸Yesu haandi n'aguunama aasi, niyaandiika hu loba neende olwala lwae.

⁹Nae nibawulira batyo, bachaaka ohuwaao, sya mulala-mulala, ohuchaakira hu muhuluundu mweene. Yesu n'adoong'ao yeeng'ene neende omuhasi oyo owali niyeemere mu moni wae.

¹⁰Yesu yalingaala aakulu mani n'amuteeba ati, “Muhasiing'ene, bachiire yeena? Abulao omuundu yeesi ohuheengere omusaango?”

¹¹Omuhasi oyo yaboola ati, “Omwaami, abulao.” Yesu mani n'aboola ati, “Syesi haba siinjia huhuheengera omusaango; waao nae otonoonaangaho haandi.” [13]

¹² Yesu haandi niyemeeda ohulomaloma nabo n'aboola ati, “Ese ndi obulafu bw'esyaalo; oyo yeesi owunoonda, haba saachia hukeenderaanga mu siirima, nae achia ohunyoola obulafu bw'obulamu.”

¹³ Abafarisaayo nibamuboolera bati, “Welomalomaho omweene; nae by'olomaloma haba si byadyeeri.”

¹⁴Yesu yakobolamo ati, “Kata ndahaba nindelomalomaho omweene, bi nomanoma byadyeeri, olwohuba manyire yi ndatula neende yi njia. Nae eng'we haba simumanyire yi ndula, kata neende yi njia.

¹⁵Eng'we muheenga omisaango koti abaandu, nae ese yibulao yi heengera omusaango.

¹⁶Nae mba niheenga omusaango, eheenga yaange yiba eyadyeeri, olwohuba haba simba syeeng'ene niheenga, nae mba neende oyo owaanduma.

¹⁷ Mu malako keeng'we, syandiikwa siti, obuloli bw'abaandu babiri buba obwadyeeri.

¹⁸Ese ndeelomalomaho, haandi Laata owaanduma yomiisa bi nomanoma.”

¹⁹Mani nibamuteeba bati, “Nae Lataao ali yeena?” Yesu yakobolamo ati, “Eng'we haba simumanyire neende Laata yesi simumumanyire daawe; muba nimuumanyire, Laata yesi mwahamumanyire.”

²⁰Emboosi chino Yesu yachilomalomera mu Nyuumba ya Nasaae naali abuundu yibabihangamo ebiyaanwa; nae abulao omuundu owamudiira, olwohuba esiha syae syali nisisisiiri ohwoola.

²¹Yesu haandi yababoolera ati, “Ese mbwao, mani muchia ohungoonya, nae mwahafwiire mu byonoono byeeng'we; eyo yi njia, eng'we simunyala ohwiichayo.”

²²Abayudaaya mani nibaboola bati, “Achia ohweyiita omweene, sakira aboola ati, ‘Eyo yi njia, eng'we simunyala ohwiichayo’?”

²³Yesu yababoolera ati, “Eng'we muli ab'aasi, nae ese ndi ow'aakulu; eng'we muli abohu syaalo huno, nae ese haba si ndi owohu syaalo huno.

²⁴Sakira mbaboolera endi eng'we mwahafwiire mu byonoono byeeng'we, olwohuba mwahafwiire mu byonoono byeeng'we nimutafukiirira muti, ese Niise oyo Yi Ndi” [14]

²⁵Bamuteeba bati, “Niiwe wiina?” Yesu yabakobolamo ati, “Nisyo esyo si mbeere nibaboolera ohutula muhuchaaka.

²⁶Ndi neende ebiingi muno eby'ohubalomalomaho, neende ebiingi muno eby'ohuheengeraho omusaango; nae oyo owaanduma wadyeeri, syesi bi ndawulira ohutula yi ali nibyo bi mboolera esyaalo.”

²⁷Haba sibamanya bati, Yesu yali ababoolera ebidiira hu Laata.

²⁸Yesu mani n'ababoolera ati, “Nimwahabe nimumalire ohwaaniha Omwaana w'Omuundu, olwo nilwo lu mwahamanyire muti ese Niise oyo Yi Ndi, haandi muti, ese haba sihola esiindu syoosi hulw'obunyala bwaange omweene, nae nomanoma ebyo koti lu Laata yaanjekesa.

²⁹Haandi oyo owaanduma ali naange; haba siyandehaanga syeeng'ene daawe, olwohuba buli ludaalo hola ebimusangaasa.”

³⁰Yesu niyalomaloma emboosi echo, abaandu baangi mani nibamufukiiriramo.

³¹Bulaanu, Yesu yaboolera Abayudaaya abamufukiiriremo ati, “Nimwemeeda ohwomiirira hu mboosi chaange, mwahabe abeeki baange badyeeri,

³²mwahamanye obwadyeeri, mani obwadyeeri bwahababoolole mube abalehuule.”

³³ Nabo nibamukobolamo bati, “Efwe huli abeechuhulu ba Abburahamu, haba sihubechaangaho ababoye b'omuundu yeesi. Lwasiina oboola oti, ‘Mwahabe abalehuule’?”

³⁴Yesu yabakobolamo ati, “Mbaboolera obwadyeeri bweene endi, buli muundu yeesi owonoona, aba omuwaambe w'esyonoono.

³⁵Nae omuwaambe haba s'adoong'aanga mu nyuumba endaalo choosi daawe; nae Omwaana niye odoong'aanga atyo endaalo choosi.

³⁶Omwaana niyahabe ababoloole, mwahabecheenge abalehuule elalira.

³⁷Manyire endi muli abeechuhulu ba Abburahamu; nae muli ohukiiya ohunjiita, olwohuba emboosi chaange haba sichiri neende obwiihalo mu myooyo kyeeng'we.

³⁸Ese nomanoma si ndabona ewa Laata, mwesi muhola si mwabona ewa laata yeeng'we.”

³⁹Nabo bamukobolamo bati, “Laata yeefwe niye Abburahamu.” Yesu yababoolera ati, “Muba nimuli abaana ba Abburahamu, mwahaholere koti Abburahamu lu yahola.

⁴⁰Nae bulaanu eng'we mukiiya ohuunjita, ese omuundu obaboleere obwadyeeri bu ndawulira ohutula ewa Nasaae; sino Abburahamu haba si yasihola.

⁴¹Eng'we muhola ebyo bi laata yeeng'we yahola.” Nabo nibamuboolera bati, “Efwe haba sihwebulirwa mubucheke; huli neende Laata yeefwe mulala yeeng'ene, niye Nasaae.”

⁴²Yesu yababoolera ati, “Nasaae aba naali Laata yeeng'we, syesi mwahaaheerere, olwohuba ndatula eyiri Nasaae mani ninjicha, haandi sindeecha hulwaange omweene, nae oyo niye owaanduma.

⁴³Lwasiina haba simumanya si ndi ohuboola? Olwohuba haba simuli abetekefu ohuwulira emboosi yaange.

⁴⁴Eng'we mutula ewa laata yeeng'we Sitaani, mani esichiiririrwa syeeng'we nisyo ohuhola bi laata yeeng'we adaha. Omweene oyo ohutulira elalira mu njaako mutemo niye, olwohuba abulamo obwadyeeri kata nabudiidi. Mani n'abacha, aba aloondakana koti lu ali, olwohuba mubacha niye haandi niye laatang'ene bubacha.

⁴⁵Nae ese olwohuba nomanoma obwadyeeri, eng'we haba simuufukiirira.

⁴⁶Wiina mweene hweeng'we onyala ohunyoolamo esyonoono syoosi? Ese nomanoma obwadyeeri, lwasiina eng'we haba simuufukiiriramo daawe?

⁴⁷Oyo owa Nasaae, awulira emboosi cha Nasaae. Esifune sikera mwahaya ohuwulira emboosi cha Nasae, olwohuba eng'we haba simuli aba Nasaae.”

⁴⁸Abayudaaya nibamukobolamo bati, “Haba sihubeere abadyeeri nihuboola huti oli Omusamaria haandi oliho omusaambwa?”

⁴⁹Yesu yakobolamo ati, “Ese haba sindiho omusaambwa daawe; nae njisa oluyaali mu Laata, nae eng'we haba simuunjisamo oluyaali daawe.

⁵⁰Ese haba sindekonyera oluyaali daawe; yiluwo Oyo olukoonya, haandi niye ochia ohuba omukayi.

⁵¹Mbaboolera obwadyeeri bweene endi, buli olidiira emboosi chaange, haba siyahafwe endaalo choosi daawe.”

⁵²Abayudaaya mani nibamuboolera bati, “Bulaanu humanyire mubwadyeeri bweene huti oliho omusaambwa. Abburahamu yafwa, koti lu banabbi bosi baafwa, nae ewe oboola oti, ‘Buli olidiira emboosi chaange, haba siyahafwe endaalo choosi.’

⁵³Ewe omuhunuufu ohiraho Abburahamu laata yeefwe owafwa? Abanabbi bosi baafwa! Ewe welaanga ohuba wiina?”

⁵⁴Yesu yakobolamo ati, “Mba nindeeberesa oluyaali omweene, oluyaali lwaange haba silwahabeeremo obuhoonyi daawe. Nae Laata niye owuumberesa oluyaali, oyo yi muboola muti niye Nasaae weeng'we.

⁵⁵Nae eng'we haba simumanyire. Nimboolere endi, haba simumanyire, mba ndi omubacha koti eng'we; nae ese mumanyire, haandi ndiira mboosi chae.

⁵⁶Abburahamu laata yeeng'we yasangaalira ohubonaho oludaalo lwaange; yalubona mani yasangaala muno.”

⁵⁷Ao Abayudaaya mani nibamuteeba bati, “Ewe osisiiri ohwoosa emyaaka amahumi kataanu, niiwe wabona Abburahamu?”

⁵⁸Yesu yababoolera ati, “Mbaboolera obwadyeeri endi, Abburahamu n'ateebulwa, Ese niise Oyo Yi Ndi.”

⁵⁹Abayudaaya mani nibabukula amakina ohumuhubba; nae Yesu n'abekisaho, mani n'atula erwaanyi w'Enyuumba ya Nasaae.