Read saamia Yowaana 9 Bible Online

Yowaana 9 - saamia bible

Yowaana 9

¹Yesu niyali n'abitaao, yabona omuundu weebulwa naali omuwofu.

²Abeeki bae bamuteeba bati, “Rabbi, wiina mweene owahola esyonoono hu wuno yeebulwe naali omuwofu, niye wuno mweene, kose abeebusi bae?”

³Yesu yabakobolamo ati, “Wuno haba siyonoonaangaho daawe, kata abeebusi bae, nae yeebulwa atyo hu biholwa bya Nasaae binyale ohumuboneheramo.

⁴Efwe huhoyere ohuhola emirimo ky'oyo owaanduma, obwiire nibusisiiri esideete. Olwohuba esiro siri ohwiicha, yibuleo omuundu onyala ohuholeramo omulimo.

⁵ Nisisiiri hu syaalo, Ese ndi obulafu bw'esyaalo.”

⁶Niyamala ohuboola ebyo, yafuucha amate hu loba, n'aniooba eloba neende amate kae, mani n'abaha edosi elyohu moni ch'omusaacha oyo,

⁷n'amuboolera ati, “Chia, weeyose mu sidiba sya Siloamu” (esyeekesa mbwe Atumirwe). Omusaacha yaachia yeeyosa mani n'akobola n'abona.

⁸Abalilwaana neende abo abamubonaanga n'asabirisa nibeteeba bati, “Wuno siniye oyo owehalaanga n'asabirisa?”

⁹Abaandi baboola bati, “Niye wuno”; nae abaandi nibaboola bati, “Bbe, amufwaanana sa.” Omusaacha mweene n'aboola ati, “Niise.”

¹⁰Mani nibamuteeba bati, “Nae emoni chao chilimbuuhe chitye?”

¹¹Yakobolamo ati, “Omuundu olaangwa Yesu niye anioobere edosi, yalibaha hu moni chaange mani niyamboolera ati, ‘Chia hu Siloamu mani weeyose.’ Njiire mani nindeeyosa, ninjaaka ohubona.”

¹²Mani nibamuteeba bati, “Ali yeena?” Yabkobolamo ati, “Haba siimanyire.”

¹³Ao mani nibayira owali omuwofu eyiri Abafarisaayo.

¹⁴Bulaanu oludaalo lu Yesu yaniooberaho edosi mani n'aliimbusa emoni ch'omusaacha oyo lwali olwa Sabbaato.

¹⁵Abafarisaayo haandi nibamuteeba engeri yi yachaakiramo ohubona. Mani n'ababoolera ati, “Ateere edosi hu moni chaange, mani nindeeyosa, mani ninjaaka ohubona.”

¹⁶Abafarisaayo baandi nibaboola bati, “Omuundu owahola esyo, oyo haba s'anyala ohuba niyatula eyiri Nasaae, olwohuba haba s'adiira elako ly'oludaalo lwa Sabbaato.” Nae abaandi nabo nibaboola bati, “Omuundu mwonooni anyala atye ohuhola obulolero buli bwakiira ao?” Mani niyibaao ohutafukiirisania akatikaati waabwe.

¹⁷Abafarisaayo haandi nibateeba omusaacha owali omuwofu oyo bati, “Oyo koti lu yahuliimbusye emoni, ewe omulomalomaho siina?” Nae yakobolamo ati, “Munabbi niye.”

¹⁸Abayudaaya nabo nibahaya ohufukiirira bati omuundu oyo yaliho omuwofu, luunyuma n'achaaka ohubona haandi, ohwoola lu balaanga abeebusi bae.

¹⁹Bateeba abeebusi bae bati, “Wuno niye omwaana weeng'we yi baboola bati yebulwa naali omuwofu? Nae bulaanu achaakire atye ohubona?”

²⁰Abeebusi bae bakobolamo bati, “Humanyire huti wuno mwaana weefwe niye, haandi huti, yebulwa naali omuwofu.

²¹Nae esikera n'achaaka ohubona bulaanu, neende owamuliimbusa, efwe haba sihumanyire daawe. Mumuteebe omweene; muhuluundu niye, achia ohwelomalomera.”

²²Abeebusi bae baboola batyo, olwohuba bali nibatiire Abayudaaya, olwohuba Abayudaaya bali nibamalire ohufukiirisania bati, buli muundu otuumbula ati, Yesu niye Kristo, wohwiiruswa mu Sinagoogi.

²³Abeebusi bae sakira baboola bati, “Mumuteebe omweene; muhuluundu niye.”

²⁴Ao mani nibalaanga owali omuwofu ehabi lyohubiri, mani nibamuboolera bati, “Ewe kinia Nasaae; efwe humanyire huti omuundu wuno mwonooni niye.”

²⁵Nae yabakobolamo ati, “Oba mwonooni, ese haba siimanyire. Nae esiindu silala si manyire nisyo siti, ndali omuwofu, nae bulaanu mbona.”

²⁶Nabo mani nibamuteeba bati, “Siina syeene si yahuholaho? Yahuliimbusa atye emoni?”

²⁷Nae yabakobolamo ati, “Malire ohubabooleraho hale, nae muhayire ohutekeeresa. Lwasiina mudaha ohusiwulira ehabi liindi? Mwesi mudaha ohweehola abeeki bae?”

²⁸Mani nibamunyeka haandi nibamuboolera bati, “Ewe niiwe omweeki wae. Nae efwe huli abeeki ba Musa.

²⁹Efwe humanyire huti, Nasaae yalomaloma neende Musa, nae oyo, efwe haba sihumanyire yi atula daawe.”

³⁰Omusaacha oyo yakobolamo ati, “Lwasiina, sino siwukisa muno! Eng'we ohutamanya yi atula, nae yaanimbuuse emoni.

³¹Humanyire huti, abonooni Nasaae haba sabawulira daawe, nae awulira abo abamwiisamo oluyaali, haandi abahola ebyo by'adaha.

³²Ohutula hale-na-haandi, sisiwulirwaangaho kata nabudiidi siti, omuundu yeesi yali n'alimbuuse emoni ch'omuundu weebulwa naali omuwofu.

³³Omuundu wuno aba n'atatula eyiri Nasaae, haba siyahanyalire ohuhola kata esiindu syoosi.”

³⁴Nabo bamukobolamo bati, “Ewe oweebulirwa mu syonoono, wesi niiwe odaha ohutweekesa?” Mani nibamusiindikirisa nibamutusa erwaanyi wa Sinagoogi.

³⁵Yesu yawulira ati bamusindikiriise bamutusa erwaanyi wa Sinagoogi. Niyamunyoola, yamuteeba ati, “Ofukiirira mu Omwaana w'Omuundu?”

³⁶Nae yamukobolamo ati, “Omwaami, oyo niye naanu, mufukiirire?”

³⁷Yesu yamuboolera ati, “Omubweene, haandi niye oli ohulomaloma naawe.”

³⁸Nae yaboolera ati, “Omwaami, fukiirira”. Mani niyeenamira Yesu.

³⁹Yesu yaboola ati, “Ndeecha mu syaalo muno ohuheenga omusaango, abo ababeere nibatabona, banyale ohubona, nae ababona bawofule.”

⁴⁰Abafarisaayo baandi abali aambi neende Yesu nibawulira n'alomaloma atyo, bamuteeba bati, “Syeekesa siti fwesi huli abawofu?”

⁴¹Yesu yababoolera ati, “Muba nimuli abawofu, simwahabeere neende esyonoono daawe. Nae olwohuba muboola muti ‘Efwe hubona,’ esyonoono syeeng'we, sibadoong'aho.”