Read saamia Ebiholwa 12 Bible Online

Ebiholwa 12 - saamia bible

Ebiholwa 12

¹Mu siha syeene esyo, omutuki Herode yatusa obwaalaba yachaaka ohulwaania abafukiiriri baandi.

²Yeta neende olugaanga Yakobbo mwaanang'ina Yowaana;

³haandi niyabona ati esiholwa esyo syasangaasa Abayudaaya, yemeeda yadiira Petero yesi. Sino yasihola mu ndaalo ch'Esidyaalo sy'Emigaati Kitabbaahirwe.

⁴ N'amalire ohumudiira, yamuta mu jeela, yaamudiisa emikaanda kine eky'abasikaari ohumuliinda, n'achiiririra ati luunyuma lw'Esidyaalo sya Paasaka, achia ohumutusamo amuyire amuyaasire mu lwichuule lw'abaandu.

⁵Petero yayirwa mu jeela; nae abafukiiririri bemeeda muno ohumusabira eyiri Nasaae.

⁶Mani esiro syeene si Herode yali niyetekeheereho ohutusiramo amuyaasire mu lwichuule lw'abaandu, Petero yali niyeyaliise akatikaati w'abasikaari babiri, naboyerwe neende eminyororo kibiri, haandi hu siruwa sy'ejeela, hwaliho abaliindi baandi nibaliindire;

⁷nae bone, malaika w'Omwaami yabonehana, mani obulafu bwaaduha mu siseenge sy'ejeela. Malaika oyo yakuuda Petero mu mbafu mani yaamusimusa n'aboola ati, “Siingira bwaangu.” Eminyororo ekyo kyaboololoha hu mahono kae kyaakwa aasi.

⁸Malaika oyo yamuboolera ati, “Wefwaale engubo neende ebiraato byao.” Petero yahola atyo. Malaika haandi yamuboolera ati, “Weboye olusibiro lwao mu sibuno mani wunonde.”

⁹Petero yatula erwaanyi, yaloonda malaika oyo. Petero haba siyamanya ati esiindu si malaika yali n'aholere syali esyadyeeri, nae yabaasa ati yali naali ohuboneherwasa.

¹⁰Nibali nibahamala ohubita hu baliindi bataangira neende abohubiri, boola hu siruwa sy'ebichuma esiingira mu siko sihuluundu esyo. Esiruwa esyo syabeyikulira esyeene, mani bamala batula erwaanyi babita hu ngira ndala nibawaao. Abweene-na-bweene ao ni malaika amutulaho.

¹¹Petero yamanya ati ebyali bimweholeheho byali ebyadyeeri, mani n'aboola ati, “Bulaanu ndi omwomiifu endi Omwaami niye otumire malaika wae ohwiicha ohunjabina mu mahono ka Herode, haandi mweebyo byoosi bi Bayudaaya bali nibambaasirisira.”

¹²Niyamanya atyo, yachia ena nyuumba ya Maria, ng'ina Yowaana olaangwa Mariko, yi baandu baangi bali bebuusire alala nibali ohulaamaanga.

¹³Niyahong'oonda hu lwiiki lwohusiruwa, omuhalaabani olaangwa ati Rooda ohubona.

¹⁴Yamanyirisa ekono lya Petero, yasangaala muno mani yeeruha n'atekuule esiruwa nae yacha yaboola ati Petero niye owali yeemere erwaanyi hu siruwa.

¹⁵Nabo baboolera omuhaana oyo bati, “Mbao hane okwaaho elalu.” Nae yemeeda saohwomiisa ati syadyeeri. Nabo bamuboolera bati, “Anyala ohuba naali malaika wae.”

¹⁶Petero yemeeda ohuhong'oonda; mani nibeekulao, bamubona mani baawuka muno.

¹⁷Nae Petero yabaholera ahalolero neende omuhono ati bauleere, yabeekesa koti lu Omwaami yamutusa mu jeela. Yaboola ati, “Muboolere mutyo Yakobbo neende abafukiiriri boosi” Petero yeemao yaabaleha yabaleha yaacha abuundu waandi.

¹⁸Bulaanu obwiire nibwahya, ohusasakala hwoosi haba sihwaliwo mu basikaari hu biindu bidiira hu Petero.

¹⁹Herode niyali n'amalire ohumukoonya haandi n'atamwakaanire, yeecha yateeberesa abaliindi abo mani yamala yaalagira ati bahoyere ohwiitwa. Herode yatula mu Yudea yeecha mu Kaisarea, yaaba eyo.

²⁰Bulaanu, Herode yanyoolerera muno abaandu ba Tiiro neende Sidoni; nibali mu sidiiyiha ohumubona, nae nibali nibamalire ohuhola obwiicha neende Bbulasito, owali omuhuluundu w'edooho ly'omutuki, basaba bati omuleembe kubeeo, olwohuba esyaalo syaabwe syali nisinyoolaanga ebyohulya ohutula hu syaalo sy'omutuki oyo.

²¹Hu ludaalo lwali nilutekeheebwe, Herode yefwaala ebifwaalo byae by'obutuki, mani yehala hu sisaala sy'obutuki, yachaaka ohulomaloma neende abaandu.

²²Abaandu behuuma nibaboola bati, “Ekono elyo lya nasaae, nae haba sily'omuundu sa!”

²³Abweene-na-bweene ao, malaika w'Omwaami yamwiita, olwohuba haba siyali n'aberesa Nasaae oluyaali; yaafwa enyeende chamulya.

²⁴Nae emboosi ya Nasaae yemeeda ohuhula neende ohusaalana.

²⁵Bbarinabba neende Saulo bakobola nibatula Yerusalemu nibamalire ohwooseresa omulimo kwaabwe, nibeecha neende Yowaana owali n'alaangwa ati Mariko.