Read saamia Ebiholwa 13 Bible Online

Ebiholwa 13 - saamia bible

Ebiholwa 13

¹Bulaanu, mu bafukiiriri bali nibamenya mu Atiokia, mwalimo abanabbi neende Abeekesa, Bbarinabba, Simeoni owali ati n'alaangwa Nageri, Lusio owa Sireeni, Manaeni mulala hu baandu bomu siina sya Herode Atipa omutuki w'esituundu sya Galilaaya, neende Saulo.

²Nibali bali ohwiinamiraanga Omwaami alala neende ohusiibaanga, Mwooyo Mwoolerefu yaboola ati, “Munjawulire endulo Bbarinabba neende Saulo hulw'omulimo ku ndabalaangira.”

³Luunyuma lw'ohusiiba neende ohulaanga, baabeesaho amahono kaabwe mani bamala baabatuma baachia.

⁴Koti lu bali nibeemiriirwe neende Mwooyo Mwoolerefu, beeha baachia Seleusia; haandi ohutula eyo, basyaabala baachia Saipurasi.

⁵Niboola Salamisi, bayaala emboosi ya Nasaae mu Sinagoogi ch'Abayudaaya. Haandi bali neende Yowaana ohubahoonya.

⁶Nibali nibamalire ohuhalakania esisiinga syoosi niboolere Pafoosi, bakaanayo omuholi w'amayia wuundi, omunabbi w'obubacha Muyudaaya, olaangwa ati Bbari-Yesu.

⁷Yali omwiicha wa gafana w'esisiinga esyo, olaangwa ati Serigio Paulo, omusaacha wali omukesi-kesi muno, oweecha yalaanga Bbarinabba neende Saulo mani yadaha awulireho emboosi ya Nasaae.

⁸Nae Elima ow'amayia oyo (ako niko amahuluundu ak'eliita elyo) yabakayira n'adaha ohudondobania gafana oyo ohumutusa hu fukiirira eyo.

⁹Nae Saulo, yesi olaangwa ati Paulo, niyechuule Mwooyo Mwoolerefu, yamutingaala n'amwehaliirisa

¹⁰yamuboolera ati, “Mwaana wa Sitaani ewe, omusuku w'obuluungifu, owechula obubacha neende obukodyo bubi, olyoola yeena ohukodyaanga engira ngololofu ch'Omwaami?

¹¹Mani bulaanu, mbao, omuhono kw'Omwaami kuhwiihiraho, mani ochia ohuba omuwofu haandi otanyala ohubona elyuuba hulw'esiha.” Abweene ao, enang'oong'o neende esiirima byamukwaaho mani yachaaka ohubuuka-buuka n'akoonya abaandu ohumwiimirira nibamudiirire omuhono.

¹²Bulaanu gafana oyo yafukiirira, niyamala ohubona esyali nisikwiireo, olwohuba yali nawukiiswe muno neende enjekesa y'Omwaami eyo.

¹³Bulaanu, Paulo neende omukaanda kw'abaasye bachaaka ohusyaabala ohutula Pafoosi, mani boola Periga mu Pafilia. Yowaana yabaleha mani yakobola Yerusalemu;

¹⁴nabo bachiiririra nibatula Periga mani niboola mu Atiokia syomu Pisidia. Hu ludaalo lwa Sabbaato baachia beengira mu Sinagoogi mani beehala aasi.

¹⁵Nibali nibamalire ohusoma amalako neende abanabbi, abeemirisi ba Sinagoogi babalaanga nibaboola bati, “Baasyeefwe, nimuba nimuliho neende emboosi yoosi eyohugumya abaandu, muyiboole.”

¹⁶Paulo yasiingira, mani niyehoonyera amahono kae yaboola ati: “Basaacha ba Yisiraeli, neende eng'we abatya Nasaae, mutekeerese.

¹⁷ Nasaae w'Abaisiraeli bano, yadoola bakuuka yeefwe yabahola baaba abaandu bahunuufu muno nibali bamenya mu syaalo sya Misiri, niyehoonyera omuhono kwae kw'obunyala yabatusamo.

¹⁸ Hu mbaka y'emyaaka amahumi kane, yabaliinda nibali mu siparara.

¹⁹ Nibali bamalire ohusihirisa ebyaalo bitaanu-na-bibiri, mu syaalo sya Kanani, yababeresa esyaalo syaabwe esyo ohuba obusihirano, hulw'embaka y'emyaaka emia chine neende amahumi kataanu.

²⁰ Ebyo byoosi nibyawa, yababeresa abakayi ohwoolera elalira hu Samueli omunabbi.

²¹ Basaba omutuki; mani Nasaae yababeresa Saulo omwaana wa Kisi, omusaacha w'enyuumba ya Bbenjamini, hulw'emyaaka amahumi kane.

²² Nae niyali n'amalire ohumalao, yasiingisa Daudi yaaba omutuki waabwe; oyo yi omweene yalomalomaho n'aboola ati, ‘Njakaanire mu Daudi omwaana wa Yese omusaacha yi mwooyo kwaange kudaha, ochia ohuhola bi ndaha byoosi.’

²³Ohutulira mulwiibulo lw'omusaacha wuno, Nasaae yeecha yaleetera Abaisiraeli Omuwonia, Yesu, koti lu yasuubisa.

²⁴ Ohwiicha hwae nihutoola, Yowaana yayaala ohubatiisa hw'ohweyolobya eyiri abaandu boosi aba Yisiraeli.

²⁵ Yowaana niyali hwamaliirisa omulimo kwae yaboola ati, ‘Wiina mweene yi mubaasa muti ese ndi? Haba siniise omweene oyo. Haba daawe, nae enyuma waange yiriyo ochia ohwiicha, yi esya ch'ebiraato byae ese haba siihoyera ohuboolola.’

²⁶“Basyaange, eng'we abaana b'enyuumba ya Abburahamu, neende abo boosi abali mweeng'we abatya Nasaae, niifwe abatumirwa emboosi y'obuwonia buno.

²⁷Eyiri abo abamenya mu Yerusalemu neende abeemeresi baabwe, olwohuba sibanyala ohumumanya, oba ohumanya ebyalomalomwaanga neende abanabbi, ebisomwaanga buli Sabbaato, booserese bino nibamuheengera omusaango ohumuhira.

²⁸ Kata byahaba biti haba sibanyala ohumudiisa omusaango kwosi okuhoyera ohufwa, oba basaba Pilato abone ati yeetwa.

²⁹ Nibali nibahamala ohwooseresa ebyo byoosi ebyamwandiikwaho, bamwaanula hu musaala, bamwaalisa mu ng'ani.

³⁰Nae Nasaae yaamusyuhisa ohutula mu bafu;

³¹ haandi hulw'endaalo enyiingi yabonehera abo abali nae ohutula Galilaaya nibeecha mu Yerusalemu, abo abali abaloli bae eyiri abaandu.

³² Efwe hubaleetera emboosi ndai mbwe, esiindu si Nasaae yasuubisa bakuuka yeefwe,

³³nisyo sino si yosereese eyiri efwe abaana baabwe nasyuusa Yesu; koti haandi syandiikwa mu Sabbuli yohubiri siti, ‘Ewe oli Omwaana waange, enyaanga yino hwibuule.’

³⁴ Nae ohweema hu bwadyeeri mbwe yamusyuuhisa ohutula mu bafu, obutakobola haandi muhunyala ohubola, yalomaloma mu ngeri yino ati, ‘Njia ohuhuberesa ehabi enjolerefu haandi echadyeeri cheene echa Daudi.’

³⁵ Sakira aboola haandi mu Sabbuli yiindi ati, ‘Ewe haba solikanya Omwoolerefu wao ohubola.’

³⁶Olwohuba Daudi, luunyuma lw'ohumala ohuhalaabanira esiina sya Nasaae, mu mase kae, yeecha yeyalisa, mani yaalisibwa neende ba laatang'ene, yamala yaabola;

³⁷nae oyo yi Nasaae yasyuusa, haba siyanyala ohubola daawe.

³⁸Mulehe mani simanyihane eyiri eng'we, baana beefwe, siti ohubitira mu musaacha wuno, ohuleherwamo ebyonoono huyaalibwa yi muli,

³⁹haandi ohubitira mu mweene oyo, buli muundu yeesi ofukiirira aboololwa ohutula hu buli siindu syotahanyalire ohuboololwaho neende amalako ka Musa.

⁴⁰Mweliinde mani ebyo biindu biboolebwa mu banabbi bihaye ohubakwaaho:

⁴¹ ‘Boneho, eng'we ab'esi esireka, haandi muwuke, mani musihirire; olwohuba ndi ohuhola esiholwa mu ndaalo chao, esiholwa syotalifukiirira, omuundu yeesi n'ahuboolera.’ ”

⁴²Koti lu bali nibatula erwaanyi, abaandu babasaba bati, ebiindu bino bibabooleerwe haandi hu ludaalo lwa Sabbaato luloondaho.

⁴³Mani oluhung'aano lwa Sinagoogi nilwasakuuha, Abayudaaya baandi neende abaandu bali bafukiirira mu diini y'Esiyudaaya, baloonda Paulo neende Bbarinabba, abeecha baabalomalomera haandi bamala baabadinya bemeede ohukeenderaanga mu mbabaasi cha Nasaae.

⁴⁴Sabbaato yiloondaho, aambi esiko sihuluundu esyo syoosi syeecha syebuusa alala ohutekeeresa emboosi ya Nasaae.

⁴⁵Nae Abayudaaya nibabona ebidiiyiha ebyo, beechula ehali-hali, nibachaaka ohudoondobania ebiindu bi Paulo yali n'alomaloome haandi nibamunyeka.

⁴⁶Nae Paulo neende Bbarinabba bemeeda ohulomaloma nibatatya nibaboola bati, “Syali nisihoyera emboosi ya Nasaae ohuchaaka ohuyaalwa eyiri eng'we. Koti lu muli ohuyekaana, mani nimweheengera omusaango muti abeene haba simuhoyera obulamu butaakama, boneho, mbao efwe hweekaluhanira hwechiira eyiri Abateende.

⁴⁷ Olwohuba nilwo koti lu Omwaami atulagiire n'aboola ati, ‘Mbaholele ohuba obulafu eyiri Abateende, hu munyale ohwoosa obuwonia mu bifwo byoosi ebyohu syaalo.’”

⁴⁸Abateende bawulira sino, mani basangaala muno bakinia emboosi ya Nasaae; abo boosi abali nibadoolwa ohunyoola obulamu butaakama, bafukiirira.

⁴⁹Mani emboosi y'Omwaami yasalaana mu syaalo esyo syoosi.

⁵⁰Nae Abayudaaya bemeeda sa ohusangulusanga abahasi bali nibadaha muno ediini y'Esiyudaaya, abaliho neende oluyaali, neende abasaacha bahoongo bomu siko sihuluundu esyo, mani nibanyala ohusiingisa omwooyo kw'ohusaandya Paulo neende Bbarinabba, abaandu banyala ohubeerusa ohubatusa mu disiturikiti yaabwe eyo.

⁵¹ Nae baabahuhumulira olufu lwali hu makulu kaabwe, bamala bachia Yikoniamu.

⁵²Abeeki beechula esangaalo neende Mwooyo Mwoolerefu.