Read saamia Ebiholwa 15 Bible Online

Ebiholwa 15 - saamia bible

Ebiholwa 15

¹ Nae abaandu baandi beeha ohutula mu Yudea mani nibachaaka ohweekesanga abafukiiriri bati, “Nimutahebwa ohuloondakana neende emiduunga kya Musa, haba simunyala ohuwonisibwa.”

²Nae Paulo neende Bbarinabba nibeecha baaba neende embaha ndeeyi nabo, Paulo neende Bbarinabba neende abaandu baandi balobolwa ohuniina ohuchia Yerusalemu eyiri abatume neende abahuluundu baandi hulw'esidinyu sino.

³Koti lu bali nibaboleerwe neende abafukiiriri, babita mu Foenisia neende Samaria, nibababoolera ebidiira huhukaluhaana hw'Abateende, mani basangaasa muno abafukiiriri boosi.

⁴Niboola Yerusalemu, babukaanirwa bulai neende abafukiiriri neende abatume neende abahuluundu, mani nibababoolera byoosi bi Nasaae yali n'abaholeraangamo.

⁵Nae abafukiiriri baandu abali nibali hu mukaanda kw'Abafarisaayo basiingira, mani baboola bati, “Sihoyere ohubaheba haandi neende ohubalagira ohuloondakana neende amalako ka Musa.”

⁶Abatume neende abahuluundu bali nibebuusire alala ohulomalomaho hu siindu sino.

⁷ Luunyuma lw'ohuba neende ohukaniaaya huleeyi muno, Petero yasiingira yababoolera ati, “Eng'we abasyeefwe, mumanyire muti mu ndaalo hale, Nasaae yeecha yabelondera omweene, ati ohubitira mu munwa kwaange, Bateende abo bahoyere ohuwulira Emboosi Ndai mani beemeo bafukiirire.

⁸ Nasaae omanyire emyooyo, yabatusira obuloli, yababeresa Mwooyo Mwoolerefu, koti sa lu yatuholera;

⁹mani yahaya ohutaao ohukabuhana hwoosi akati weefwe neende abeene abo, nae yaanyala ohulabya emyooyo kyaabwe hulw'efukiirira.

¹⁰Bulaanu lwasiina eng'we muteema Nasaae neende ohuta ekoombo mu makosi k'abeeki li kata bakuuka yeefwe oba efwe hutanyala ohukiingaho?

¹¹Nae efwe hufukiirira huti huchia ohunyala ohuwonisibwa ohubitira mu mbabaasi ch'Omwaami Yesu, koti sa bosi bachia ohuba.”

¹²Omuhung'aano kwoosi kweecha kwaanyita chi; haandi batekeeresa Bbarinabba neende Paulo koti lu bali nibeekesa mu bwiichufu obulolero neende eby'amayia bi Nasaae yali n'abaholeraangamo nibali mu Bateende.

¹³Luunyuma lw'ohumala ohulomaloma, Yakobbo yeecha yaakobolamo ati, “Eng'we abasyeefwe, mutekeerese.

¹⁴Simeoni yekesa mubwiichufu koti lu Nasaae yachaaka ohukeniya Bateende, ohubatusamo abaandu bae.

¹⁵Mani ohweema hu sino, emboosi ch'abanabbi chifukiirisania nacho ohweema koti lu byaandiikwa biti,

¹⁶ ‘Bino nibiweere, njia ohukobola, mani njia ohwombaha haandi enyuumba ya Daudi, eyakwa; Njia ohwombaha haandi ebyanyaasiha, haandi njia ohuyeemesa,

¹⁷hu baandu badoong'ereyo boosi basaambihe bakoonye Omwaami, haandi Bateende boosi abalaangwa neende eliita lyaange,

¹⁸Omwaami aboola, owakera ebiindu bino byoosi byamanyihana ohutula hale.’

¹⁹Sakira, eheengao yaange yiri yiti, efwe haba sihuhoyere ohusaandya Bateende abo ababa nibakaluuhana eyiri Nasaae,

²⁰ nae huhoyere hubandiikire beeliinde ohutula hu mufuto kw'ebilongaloongwe neende ohutula hu mukwoobo neende hw'esyo syoosi esiba nisimikirwe sa, neende ohutula hu mabaanga.

²¹Olwohuba ohutulira elalira hu njibulo hale muno, Musa abechaanga mu buli siko sihuluundu, abaandu nibamuyaala, olwohuba asomwaanga buli lwa Sabbaato mu Sinagoogi choosi.”

²²Mani syeecha syabonehana ohuba esilai muno eyiri abatume neende abahuluundu, alala neende abafukiiriri boosi, ohwedoolamo abasaacha haandi ohubatuma bachie Atiokia alala neende Paulo neende Bbarinabba. Batuma Yuda olaangwa Bbarisabba neende Siila, abasaacha beemeresi abali mu bafukiiriri abo,

²³nibali neende ebbarwa yino yiti: “Abasyeefwe, abatume neende abahuluundu, eyiri abafukiiriri basyeefwe abali mu Bateende bali mu Atiokia neende mu Siria neende mu Silisia, amaheeso.

²⁴Koti lu humalire ohuwulira huti abaandu baandi ohutula mweefwe baabasandiisye neende emboosi nyiingi, nibadoondobania ebibaaso byeeng'we, ahwahaba mbwe haba sihwali nihubalagiire hutyo,

²⁵situbonehaniire esilai, nihumalire ohuwuliirisania mu siindu silala, ohudoola abasaacha neende ohubatuma yi muli nibali neende abaheerwa beefwe Bbarinabba neende Paulo,

²⁶abasaacha abamala ohweyaanayo obulamu bwaabwe hulw'Omwaami weefwe Yesu Kristo.

²⁷Sakira mbano hutumire Yuda neende Siila, abeene abacha ohubakaniayira ebiindu biri nasilala bityo, neende emboosi y'omunwa.

²⁸Olwohuba sibonehaane esilai muno eyiri Mwooyo Mwoolerefu, neende eyiri efwe beene ohutabadwiiha obusito bwoosi ohutusaho ebiindu bino bihoyera:

²⁹huti muhoyere ohulehana neende enyama yiyaaniirwe emisaambwa, haandi neende ohutula hw'esyo esiba nisimikirwe sa, haandi ohutula hu mukwoobo. Nimweliinda ohutula hu biindu bino byoosi, muba muchia ohuba nimuholere bulai muno. Mubeeyo.”

³⁰Nibaba nibamalire ohutula olukeendo, beeha baachia mu Atiokia; nibaba nibamalire ohubuusa alala abafukiiriri, babadiisa ebbarwa eyo.

³¹Nibamala ohuyisoma, basangaala muno ohweema huhudinyisibwa ohwo.

³²Yuda neende Siila, abali haandi abanabbi, bagumia muno abafukiiriri abo nibehoonyera emboosi enyiingi muno mani banyala ohubomiisa muno.

³³Luunyuma lw'ohumala embaka endeeyi hooho, baseebulwa neende abafukiiriri abo neende omuleembe bakobola eyiri abo abali nibabatumire.

³⁴Nae syabonehana esilai eyiri Siila ohudoong'a ebweene eyo.

³⁵Nae Paulo neende Bbarinabba badoong'a mu Atiokia, nibeekesaanga haandi nibayalaanga emboosi y'Omwaami, alala neende abaandi abaangi bosi.

³⁶Luunyuma lw'endaalo endiidi hooho, Paulo yeecha yaboolera Bbarinabba ati, “Ewe yicha, leha hukoboleyo hukeniye abafukiiriri abali mu buli siko sihuluundu yi hwali nihwayaalaho Emboosi y'Omwaami, hubone koti lu baba nibali.”

³⁷Nae Bbarinabba yali n'adaha babukule bachie neende Yowaana olaangwa ati Mariko.

³⁸ Nae Paulo yabaasa ati sihira obulai obutachia neende oyo owali n'abekabuuleho nibali mu Pafilia, ohuhola emirimo.

³⁹Abweene ao yatunduhao amayiingi amaangi muno mani beecha bakabuhanamo; Bbarinabba yabukula Mariko basyaabala bawaao baachia mu Saipurasi,

⁴⁰nae Paulo yadoola Siila mani bawaao, nibamalire ohuteebwa mu mbabaasi ch'Omwaami neende abafukiiriri abo.

⁴¹Yahalakania mu Siria neende mu Silisia, nibomiisa abafukiiriri bali omwo.