Read saamia Ebiholwa 16 Bible Online

Ebiholwa 16 - saamia bible

Ebiholwa 16

¹Haandi yeecha Deribbe neende Lisitira. Omweeki wuundi yesi yali ali ebweene eyo olaangwa ati Timoteo, omusyaani w'omuhasi Muyudaaya owali niyafukiirira; nae laatang'ene yali Omugiriki.

²Yali omwaana owamanyihana mu bafukiiriri abali nibamenya mu Lisitira neende Yikoniamu koti omwaana mulai.

³Paulo yadaha achie neende Timoteo; hulweesyo yamubukula mani yaamuheba, hulw'Abayudaaya abali nibamenya mu bituundu bi bali nibachiamo ebyo, olwohuba boosi bali bamanya bati laatang'ene Timoteo yali Omugiriki.

⁴Nibali nibakeenda olukeendo lwaabwe olwo nibabita mu biko bihuluundu ebyo, babadisaanga abafukiiriri balichiingi nibamenya omwo, ebiindu bi batume neende abahuluundu bali nibamenya Yerusalemu bali babisa.

⁵Abafukiiriri abo bomiisibwa muno mu fukiirira, haandi beengiyanga buli ludaalo.

⁶Babita mu situundu sy'esyaalo esyo esilaangwa siti Firigia haandi neende mu Galatia, nibamalire ohukaanisibwa neende Mwooyo Mwoolerefu obutalomalomaho emboosi yoosi nibali mu Asia.

⁷Nibali nibamalire ohwoola mu moni wa Misiya, bateemaho ohuchia ohwiingira mu Bbitinia, nae Mwooyo wa Yesu haba siyabakanya daawe;

⁸Hulw'esyo, babitira aambi neende Misia, mani beemao beehirira boola mu Turaosi.

⁹Paulo yanyoola ohuboneherwa mu siro: omusaacha wuundi ohutula mu Makedonia yaboneha niyeemere yamwekwedaanga n'aboolaanga ati, “Yichaho Makedonia eno otuhoonye.”

¹⁰Niyaba n'amalire ohubona ohuboneherwa ohwo, abweene ao hweecha hwachaaka ohudaha huti huchie mu Makedonia, nihwomiisire huti hane Nasaae yali n'atulaangire ohuchia ohubayaalira Emboosi Ndai.

¹¹Nihwachaaka ohusyaabala ohutula mu Turaosi, hweecha hwadiira olukeendo lwa tiiri olucha Samotireesi, mani oludaalo luloondaho hweecha hwemeeda hwachia Neapoli,

¹²haandi ohutula eyo hweecha hwachia Filipi, esiko syali nisyeemereere byoosi mu disiturikiti eyo eya Makedonia, haandi syali mu butuki bw'Abarooma. Hweecha hweehala mu siko sihuluundu sino hu mbaka y'endaalo nyiingi hooho;

¹³mani hu ludaalo lwa Sabbaato hweecha hwatula erwaanyi w'esiruwa hwachia hu ndulo w'omwaalo, yi hwali nihubaasira ohubaayo abuundu w'ohulaamiramo Nasaae; hweecha hweehala aasi, mani hwalomaloma neende abahasi bali nibebuusiire alala ebweene eyo.

¹⁴Mulala hu baandu bali nibatutekeereese yali omuhasi olaangwa ati Lidya, owali n'atula mu siko sihuluundu sya Siyatiira, owali omukusi w'ebiindu byehoonyerwa neende abaandu batuki, haandi owali omwiinamiri wa Nasaae. Omwaami yamwikula ebibaaso awuliire haandi adiire ebiindu bi Paulo yali n'alomaloome.

¹⁵Niyali n'amalire ohubatiisibwa alala neende edaala lyae lyoosi, yeecha yatukoonya n'aboola ati, “Nimuba nimumalire ohumbona muti ndi omufukiiriri w'Omwaami, mwiiche mu nyuumba yaange mani mumenye omwo.” Mani yatuyingira hwachia.

¹⁶Nihwali nihuli ohuchia abuundu wohulaamiramo Nasaae, hwabukaanana neende omuhaana muhalaabani wuundi owali naaliho esihyeeno sy'ohulakula, mani yali niyafunisa abahoongo bae ebiindu biingi mu mulimo kw'ohulakula okwo.

¹⁷Yaloondaanga Paulo alala naafwe n'alira n'aboola ati, “Abasaacha bano bahalaabani ba Nasaae w'Aakulu Muno, abali ohubayaalira engira y'obuwonia.”

¹⁸Mani sino yasiholaanga hulw'endaalo enyiingi muno. Nae Paulo yaanyoolera, yakaluuhana yaboolera omusaambwa okwo ati, “Hulagira mu liita lya Yesu Kristo ohutula mu muhaana oyo.” Mani kweecha kwamutulamo esiha syeene esyo.

¹⁹Nae abeene muhaana oyo nibeecha babona bati esuubi ly'efuni yaabwe lyali nilimalire ohuwa, baakwa hu Paulo alala neende Siila mani baabahuruuda mani baabayira mu siito mu moni w'abeemeresi;

²⁰mani nibali nimalire ohuboosa eyiri abatekeeresi b'emisaango baboola bati, “Abasaacha bano n'Abayudaaya nibo mani bali ohudoondobania esiko sihuluundu syeefwe sino.

²¹Bali ohweekesanga emiduunga ekitaali ekihoyera efwe Abarooma ohukifukiirira kata neende ohuchiholeraho.”

²²Esidiiyiha syosi syeyambaania nabo ohubaseeta; mani abatekeeresi b'emisaango baataandulaho engubo chaabwe mani baamala baatusa amalako bati bahuywe neende embariki.

²³Mani nibali nibamalire ohubanaalaho mahabi kayera, baabasukuna mu jeela, nibalagira omuliindi w'ejeela ohubaliinda bulai.

²⁴Niyali niyahamala ohunyoola esilagiro sino, yeecha yabengisa yaabata mu jeela eyomuukati bweene, n'ababoya amakulu kaabwe hu mayingo.

²⁵Nae aambi w'esiro akati, Paulo neende Siila baaba nibali ohulaamanga Nasaae, haandi nibemberaanga Nasaae enyembo, nae ababoye bali nibabatekeerese,

²⁶mani abweene ao, ohutengereha hw'esyaalo huhoongo muno hweecha hwakwaao, hwakera kata neende emisiingi ch'ejeela kyoosi kyateengereha; abweene ao, enjiki choosi cheekulwao epiingo cha buli muundu yeesi chaabololwa.

²⁷Mani omuliindi w'ejeela niyeecha yaasimuha mani yeecha yabona ati emilyaango ky'ejeela kyoosi kyali nikisiikuulweo, yeecha yasobola olugaanga lwae mu silaalo, mani yadaha ohweyita omweene, n'abaasa ati, ababoye boosi bali nibamalire ohweyiba.

²⁸Nae Paulo yehuuma neende ekono hoongo n'aboola ati, “Otewumisaho, olwohuba efwe fweesi mbano huli ano.”

²⁹Yalaanga bamuleetere omuliro mani niyalaala ohwiingira mu jeela bwaangu, mani naali ohutengerehaanga haandi n'atiire yaakwa aasi mu moni wa Paulo neende Siila,

³⁰mani yabatusa erwaanyi mani yamala yaboola ati, “Basaacha eng'we, siina syeene sihoyere ohuhola hu nyale ohuwonisibwa?”

³¹Nabo bamuboolera bati, “Fukiirira mu Omwaami Yesu, mani ochia ohuwonisibwa, ewe alala neende edaala lyao.”

³²Bamulomalomera alala neende abo boosi abali mu nyuumba yae emboosi y'Omwaami.

³³Mani yababukula esiha sy'esiro syeene esyo, yaboosa amoobbe neende ebinyubuluuhe byaabwe ebyo, mani yamala yabatiisibwa abweene ao alala neende edaala lyae lyoosi.

³⁴Haandi yabaleeta yabengisa mu nyuumba yae, mani yatuula ebyohulya mu moni waabwe; mani omweene yeecha yachaaka ohwehoyera alala neende edaala lyae lyoosi olwohuba yali nanyalire yesi ohufukiirira mu Nasaae.

³⁵Nae nibwahya echuli, abatekeeresi b'emisaango batuma abasikaari nibaboola bati, “Leha abasaacha abo baweeo.”

³⁶Omuliindi w'ejeela yaboolera Paulo emboosi cheene echo ati, “Abatekeeresi b'emisaango bahatuma emboosi ohubaleha muweeo; bulaanu mutule erwaanyi mumale muweeo neende omuleembe.”

³⁷Nae Paulo yababoolera ati, “Bamalire ohututoocha mu lwichuule lw'abaandu, nibatuhengeere omusaango kwoosi, efwe abasaacha Abarooma, haandi bamalire ohutwikalira mu jeela, nae bulaanu haandi baba batusukuna erwaanyi mu bweekisi sa? Haba! Lehe abeene beeche batutuse erwaanyi.”

³⁸Abasikaari abo baachia baboolera abatekeeresi b'emisaango emboosi cheene echo, mani baatya muno nibawulira bati hane bali nibali Abarooma;

³⁹beemao baabefunakira. Baabatusa erwaanyi, baabasaba batule mu siko sihuluundu esyo.

⁴⁰Batula erwaanyi w'ejeela, baachia bakeniya Lidya; nibali nibamalire ohubonana neende abafukiiriri baandi babagumya, bamala bawaao.