Read saamia Ebiholwa 18 Bible Online

Ebiholwa 18 - saamia bible

Ebiholwa 18

¹Luunyuma lwa bino byoosi, Paulo yaatula mu Ateeni yacha Koriito.

²Mani niyoola ebweene eyo, yakaanana neende Omuyudaaya wuundi olaangwa ati, Akwiila, owali omwibulanwa wa Ponto, owali eyo hale n'atula mu Yitali naali neende omuhasi wae Purisiila, olwohuba Kilaudio yali niyalagira ati Abayudaaya boosi batule mu Rooma. Mani yacha ohubabonaho;

³nae olwohuba yali naaholaanga omulimo kufwaanana neende echaabwe, yaanyala ohumenya nabo nibaholaanga emirimo echo ech'ohuhola amayeema.

⁴Yaanyala ohuyingana mu Sinagoogi buli ludaalo lwa Sabbaato, n'anyala ohunyoola Abayudaaya baandi neende Abagiriki baandi ohumuloonda.

⁵Mani Siila neende Timoteo nibeecha boola ao nibatula Makedonia, Paulo yali yamala ohufumaalira ohuyalaanga, n'atusiraanga Abayudaaya obuloli bweekesa buti Yesu yali niye Kristo.

⁶Nae abaandi nibachaaka ohumuyiinganianga neende ohumunyekaanga, yaahuhumula engubo chae mani naamala n'ababoolera ati, “Amabaanga keeng'we kababe hu mitwe kyeeng'we abeene! Ese mbulaho omusaango. Ohutula enyaanga yino neende ohwemeeda mu moni, ese njia ohuchiira Bateende.”

⁷Mani Paulo yatula ao yacha mu daala ly'omusaacha wuundi olaangwa ati Tisio oba Yusito, owali omwiinamiri wa Nasaae; enyuumba yae yali yasibirana neende Sinagoogi.

⁸Kirisipo, omutuki wa Sinagoogi eyo, yesi yafukiirira mu Omwaami, alala neende edaala lyae lyoosi; haandi neende Abakoriito baangi muno nibawuliraanga Paulo n'ayaala bafukiiriraanga mani baabatiisibwaanga.

⁹Nae Omwaami yaboolera Paulo muhuboneherwa mu siro siindi ati, “Otatya daawe, nae lomaloma sa haandi otawuleera daawe;

¹⁰olwohuba ese ndi alala naawe, mani abulao omuundu yeesi ochia ohunyala ohuhuseeta ahuwumise; olwohuba ndi neende abaandu baange abaangi muno mu siko sihuluundu muno.”

¹¹Mani yaamenyayo omwaaka mulala neende emyoosi kisaasaba, niyeekesanga emboosi ya Nasaae mu baandu abo.

¹²Nae Galio niyeecha yaaba gafana wa Akiya, Abayudaaya batekeha ohuseeta Paulo alala, banyala ohumuleeta mu siina,

¹³nibaboola bati, “Omusaacha wuno ali ohukaluuhania abaandu beenamireenge Nasaae esitafukiirirwa neende amalako.”

¹⁴Nae Paulo niyali aambi ohuchaaka ohulomaloma, Galio yaboolera Abayudaaya ati, “Nisiba nisyali ohuhola esitadahibwa, oba ohuhola esiindu sibi muno, mba ndi neende esifune esyohubesimiirisa Abayudaaya eng'we;

¹⁵nae koti lu siri sa esidiira hu biteebo bidiira hu mboosi sa, neende ameeta sa, neende amalako keeng'we abeene, abeene mubyeholereho; Ese ngaana ohuba omukayi w'ebiindu bino.”

¹⁶Yabeerusa ohutula mu kooti.

¹⁷Mani boosi baakwa hu Sosenesi, owali omutuki wa Sinagoogi, mani nibamala nibamuhuyira mu siina. Nae Galio haba siyadeebayo hu siindu sino daawe.

¹⁸ Luunyuma lwasino, Paulo yadoong'a eyo endaalo enyiingi echemeedaho, mani naamala n'alehana neende abafukiiriri, naamala nasyaabala naliingire mu Siria, naali neende Purisiila neende Akwiila. Niyoola mu Kecherea, yaabekaho efwiiri lyae, olwohuba yali niyeechuba ati achia ohuhola atyo.

¹⁹Bamala boola mu Efeso, nae amala abaleha ebweene eyo; nae omweene yeemao yaacha mu Sinagoogi mani n'achaaka ohuyingana neende Abayudaaya.

²⁰Nae nibamusaba bati adoong'eho nabo hulw'esiha sileeyi hooho, nae yeecha yakaana;

²¹nae niyali naalehana nabo yeecha yaboola ati, “Njia ohubakobolera Nasaae n'adaha,” mani n'achaaka ohusyaabala n'atula mu Efeso.

²²Niyali n'amalire ohukoba mu Kaisarea, yaasiingira yaacha mberi ohuheesaho abafukiiriri, mani yaamala yeeha yachia mu Atiokia.

²³Luunyuma lw'ohumalaho endaalo endiidi ebweene eyo, yaasiingira yawaawo mani yaacha yaakeniya ebituundu bikabuhaane naahalakania mu syalo sya Galatia neende mu syaalo sya Firigia, niyomiisa abeeki boosi.

²⁴Bulaanu, Omuyudaaya wuundi olaangwa ati, Apolo, owali omwibulanwa wa Alekisaandiria, yeecha yoola mu Efeso. Yali omusaacha omanyire ohulomaloma bulai bweene, haandi yali yamanya muno ebyandiiko byoolerefu.

²⁵Yali niyali yekeswa bulai muno obulamu bu Omwaami adaha; mani koti lu yali naali omubalabalanu mu mwooyo, yeecha yaanyala ohulomaloma haandi neende ohweekesa bulai bweene ebiindu bidiira hu Yesu, kata neende niyali yabatiisibwa sa mu hubatiisibwa hwa Yowaana hwoong'ene.

²⁶Mani yeemao yachaaka ohulomalomaanga naatatya mu Sinagoogi; nae mani Purisiila neende Akwiila banyala ohumutekeeresaho, bamubukula mani bachia bamutotolera bulai bweene obulamu bu Nasaae adaha.

²⁷Mani niyali n'adaha ohuhalakania aweo achie mu Akiya, abafukiiriri bamudinyia, mani bamala baandiikira abeeki ebbarwa bati bamubukaanire. Mani niyeecha yolayo, yahoonya muno abo abali hulw'embabaasi cha Nasaae, nibanyala ohufukiirira,

²⁸olwohuba yayiingania neende amaani mahoongo muno Abayudaaya mu lwichuule lw'abaandu, niyeekesa niyehoonyera ebyandiiko byoolerefu ati Yesu yali niye Kristo.