Read saamia Ebiholwa 21 Bible Online

Ebiholwa 21 - saamia bible

Ebiholwa 21

¹Nihwamala ohubatulaho, nihuchaakire ohusyaabala, hwadiira engira eya tiiri eyichia mu Koosi. Hu oludaalo lwaloondaho hwachia mu Rodesi, haandi luunyuma hwatula omwo hwachia Patara, (ebyandiiko bihale biindi bimeedaho neende Mira.)

²Haandi hwanyoola emeeri yiindi eyali niyihalakania niyichia mu Foenisia, hweengiramo, hwasyaabaliramo.

³Nae nihwali nihwahoola yi hwali nihunyala ohubona Saipurasi, hwakabuha hwasireha hu muhono mukaada, hwasyaabala nihuchoomere Siria, mani hwamala hwakobera Tiiro; olwohuba eyo niyo yi meeri yali niyichia ohudwiihulira emigugu chaayo.

⁴Nihwali nihumalire ohwakaana abeeki bali bamenya eyo, hweehala nabo hulw'embaka y'endaalo chitaanu-na-chibiri enaamba. Nibahoonyerwaho neende Mwooyo, abeeki abo baboolera Paulo bati atemeeda neende olukeendo lwae yalwoosa Yerusalemu daawe.

⁵Endaalo cheefwe chi hwali nihudahire ohumala ebweene eyo nichawa, hwasiingira hwawaao hwachiiririra neende olukeendo lweefwe olwo; boosi, alala neende abahasi baabwe neende abaana, batugooba hwachia nabo ohwoola luhwoola erwaanyi w'esiko sihuluundu esyo; mani hwobba amahuumbo aasi nabo hu sikobero esyo, husaba Nasaae, hwamala hwaseebulana buli otula neende owaasye.

⁶Bulaanu hwachia hweengira emeeri, nabo bakobolayo engo waabwe.

⁷Nihwali nihumalire ohumaliirisa olukeendo lweefwe lutula mu Tiire, hwoola mu Putolemai; hwaheesa abasyeefwe bali nibamenya omwo, mani nihwiihala nabo ohumala oludaalo lulala lwoong'ene.

⁸Hu ludaalo lwaloondaho, hweecha hwasiingira hwatula omwo, mani hwoola mu Kaisarea; mani hweengira mu nyuumba ya Filipo omuyaali, owali mulala hu baasye bataanu-na-babiri, mani nihwiihala nabo.

⁹Yali neende abahaana bae bane abali nibasisiiri ohudeeha abali nibaholaanga omulimo kw'ohubulaanga ebichia ohweholeha.

¹⁰ Nihwali nihwahamala ohumenya nabo endaalo endiidi, omunabbi olaangwa ati Agabbo yatula mu Buyudaaya.

¹¹Niyatwoolaho yabukula olusibiro lwa Paulo, mani yaboyera amakulu kae neende amahono kae omweene, yaboola ati, “Mwooyo Mwoolerefu mbao aboola ati, ‘Nilwo sa lu Bayudaaya bamenya mu Yerusalemu bachia ohuboya omuundu mweene lusibiro luno haandi bamudiisa mu mahono k'Abateende.’ ”

¹²Nihwawulira sino, efwe alala neende abaandu bali nibali ao, hwekweeda Paulo atachia yoola mu Yerusalemu daawe.

¹³Nae Paulo yakobolamo ati, “Siina syeene sino si muli ohuhola, muli ohulira mundenguuse omwooyo? Olwohuba ese si ndi omwetekefu ohuboywa hwoong'ene, nae kata neende ohufwiira mu Yerusalemu, hulw'eliita ly'Omwaami Yesu.”

¹⁴Niyahayira elalira ohuwulira ka hwali nihumuboolera ako, fwesi hwaleha mani hwaboola sa huti, “Mulehe sa si Omwaami aba n'adaha, nisyo esiba siholehane.”

¹⁵Endaalo chi hwaba eyo nicheecha chaawa, hweetekeha mani hwachia mu Yerusalemu.

¹⁶Abeeki baandi ohutula mu Kaisarea hwachia nabo, mani batuyira ena nyuumba ya Manasoni owali n'atula mu Saipurasi, haandi owali omweeki muhale, yi huba humenye nae.

¹⁷Nihwali nihumalire ohwoola mu Yerusalemu, abafukiiriri basyeefwe batubukaanira neende esangaalo muno.

¹⁸Hu ludaalo lwaloondaho, Paulo yachia naafwe eyiri Yakobbo; yi bahuluundu boosi bali nibeechere.

¹⁹Paulo niyamala ohubaheesa, yachaaka ohubakaniayira buli siindu si Nasaae yali naaholere mu baandu Bateende ohubitira mu buhalaabani bwae.

²⁰Nibamala ohuwulira batyo, bafumya Nasaae muno. Mani bamala baboolera Paulo bati, “Mwaana weefwe obona, chiriwo elifu neende elifu ech'abaandu Bayudaaya bosi abafukiirira; boosi bali ohwomiirira hu malako,

²¹nae bamala ohuboolerwa akahudiiraho mbwe ewe weekesaanga Abayudaaya boosi abamenya mu Bateende oti balehane neende amalako ka Musa, nobaboolera oti batahebaanga abaana baabwe, kata neende ohuloondakana neende emiduunga ky'Esiyudaaya

²²Siindu siina syeene mani esihoyere ohuholwa? Bachia ohuwulira bati omalire ohwoola ano.

²³ Ohoyere ohuhola sa esyo si huli ohuhubooleraanga. Mbano huli ano neende abasaacha bane abadiirirwe neende omusaango kw'ohuhalaka amalako ka Musa;

²⁴bukula abaandu bano ochie nabo mani munyale ohulabiswa nabo, omale obatuungire bi bababaanja, hu banyale ohweebeka emitwe kyaabwe. Ao niwo abaandu boosi abacha ohumanyira elalira bati, ebiindu bi bali nibamala ohuboolerwa ebihudiiraho ebyo byoosi bibulamo amahuluundu nae bati hane ewe wesi omweene mbao olondekanaanga neende amalako ka Musa.

²⁵ Nae eyiri abaandu Bateende abo boosi abamala ohufukiirira, mbao humalire ohubatumira ebbarwa eyirimo embaasa yeefwe yiti abo sibahoyere ohulya enyama yi bayaaniire emisaambwa, haandi neende amabaanga, haandi neende esiindu syoosi esiba nisimikirwe sa, haandi neende esifwaabi sy'obuyirani.”

²⁶Bulaanu Paulo yeemao yabukula abasaacha abo yacha nabo, mani hu ludaalo lwaloondaho, yalabisibwa nabo, mani yeengira mu Nyuumba ya Nasaae, ohulaangirira obuungi bw'endaalo ch'ohulabisibwa chichia ohuweeraho, hu siyaanwa sinyale ohuyaanwa hulwabuli mulala hu beene abo.

²⁷Endaalo chitaanu-na-chibiri nichali aambi ohuwa, Abayudaaya baandi ohutula mu Asia, abali nibamalire ohumubona naali mu Nyuumba ya Nasaae, bachaaka ohusangulusa esidiiyiha esyo syoosi, mani nibadiira Paulo,

²⁸balira muno nibaboola bati, “Eng'we abasaacha ba Yisiraeli mweesi, mwiiche mutuhoonye! Wuno niye omusaacha oli ohweekesanga abaandu buli abuundu n'abakabula abaandu bali muno, neende amalako ka Musa, neende abuundu bweene ano; haandi omweene wuno amalire ohuleeta Abagiriki yabeengisa mu Nyuumba ya Nasaae yino, amalire ohunyaasa Abuundu Woolerefu ano.”

²⁹ Olwohuba abaandu bali nibamalire ohubona Turofiimu Omuefeeso naali nae mu siko esyo, haandi bali nibabaasirisa bati, Paulo yali n'amuleeta haandi neende ohumwiingisa mu Nyuumba ya Nasaae esyo.

³⁰Esiko esyo syoosi syasanguluha, mani abaandu bachaaka ohwiiruhira alala boosi; badiira Paulo bachaaka ohumuhuruudya nibamutusa mu Nyuumba ya Nasaae, mani nibeekala bwaangu esiruwa.

³¹Koti lu bali hubaheengaanga amakesi k'ohwiita Paulo, emboosi choolera esiina sy'Abasikaari balwaani b'e Rom chiti esiko sya Yerusalemu syoosi syali nisidubuuhe.

³²Omhuluundu w'esiina esyo yabukula abasikaari baandi neende alala neende abasikaari bahoongo baandi, mani nibeeruha nibachooma abaandu bali nibatoocha Paulo; abaandu nibabona abasikaari abo alala neende abahoongo baabwe nibabachoomere, baaleha ohutoocha Paulo.

³³Omuhuluundu oyo yoola eyiri Paulo, yamudiira, mani yalagira bamuboye neende enyororo chibiri. Omuhuluundu oyo yacha ohuteeba ati omuundu oyo yali naanu, haandi siindu siina syeene si yali n'aholere.

³⁴Abaandu baandi bali mu sidiiyiha beehuumaanga nibaboola esiindu siindi, nae abaandu bosi nibaboola esiindi; mani koti lu byamuhaya ohumanya esifune syeene ohweema hu luyoka, yalagira ati Paulo ayirwe mu daala ly'abasikaari.

³⁵Niyali niyahoola hu ngaasi yiniina mu daala omwo, yakiingwa sa neende abasikaari ohweema hu bululu bw'esidiiyiha sy'abaandu;

³⁶olwohuba okunabuungi kw'abaandu kwali nikubaloondaho nikulira nikuboola kuti, “Mumumaleo!”

³⁷Koti lu Paulo yali naali ohwingiswa mu daala ly'abasikaari, yalomaloma n'aboolera omuhuluundu oyo ati, “Onyala wafukiirira ndahubooleraho esiindu syoosi?” Nae omuhuluundu oyo yaboola ati, “Onyala ohuba n'omanyire olulimi Lugiriki?

³⁸Ewe haba siniiwe Omumisiri wula, owatekeehe ohujeema, mani wanyala ohwimirira abaandu elifu chine (4,000) ch'abeeti wabayira mu siparara?”

³⁹Nae Paulo yamukobolamo ati, “Ese ndi Omuyudaaya, ohutula mu Tarisiisi esy'e Silisia, omwiibulaane w'esiko sihuluundu muno; mani hwekweeda, wuufukiirire nomanomeho eyiri abaandu bano.”

⁴⁰Omuhuluundu oyo yamufukiirira ohulomaloma, Paulo yasiingira yaniina yeema hu ngaasi eyo, yasiingisa omuhono kwae yateemaho ohuyenjeesa abaandu; mani nibayenjeera; yachaaka ohubalomalomera mu lulimi Luibburania, n'aboola ati: