Read saamia Ebiholwa 22 Bible Online

Ebiholwa 22 - saamia bible

Ebiholwa 22

¹“Eng'we baana beefwe neende eng'we balaata yaange, mutekeereseho ohwelomalomaho hwaange hu ndi bulaanu ohuta mu moni weeng'we.”

²Nibawulira bati Paulo yali n'alomalomera mu lulimi Luibburania, bemeeda ohunyisania; mani n'ababoolera ati:

³ “Ese ndi Omuyudaaya, owebulirwa e Tarisiisi mu Silisia, nae owahusirwa mu siko syeene sino mu makulu ka Gamalieli, oweekeswa bulai ohuchianakana neende emiima myomiifu echa amalako ka Musa aka bakuuka yeefwe, owali omulwaaniliri wa Nasaae koti lu mwesi muli muti yaanga yino.

⁴ Ndasaandyanga Engira yino ohufwa-bufwa, nimboya haandi nindiisa abahasi neende abasaacha mu mahono k'ejeela,

⁵koti lu omulaamisi muhuluundu neende esiina syoosi esy'abahuluundu banyala ohusiira nimboola endyo. Ndaberesebwaanga ebbarwa enyiingi muno ohutula hu beene abo, chi ndayiriraanga abafukiiriri, mani ndakeniyaanga ninjola Damasiko ohudiira abo abalichiingi eyo nimbaleeta mu Yerusalemu nimbaboyere ohubasaandya.

⁶“Koti lu ndachaaka olukeendo lwaange mani ndakeenda ni ndi aambi ohwoola Damasiko, aambi w'esaa chisaasaba ech'esideete, obulafu buungi muno bwamyeesuha lulala mani bwahosaho nibutula Muukulu.

⁷Abweene ao, ndaakwa aasi, haandi ndawulira ekono niliimboolera liti, ‘Saulo, Saulo, lwasiina wuusaandya?’

⁸Ndakobolamo endi, ‘Niiwe naanu Omwaami?’ Nae yamboolera ati, ‘Niise Yesu Omunasareeti y'oli ohusaandyaanga.’

⁹Bulaanu, abaandu ba ndali nabo bosi babona obulafu obwo, nae haba sibawulira ekono ly'omuundu wali n'alomalomaanga naange.

¹⁰Ndaboola endi, ‘Siina syeene si mba hole, Omwaami?’ Nae Omwaami yamboolera ati, ‘Siingira ochie wiingire mu Damasiko, mani ochia ohuboolerwa ebyo byoosi bi ohutekeheerwe ohuhola.’

¹¹Nae nindali nitanyala ohubona, ohweema hu humyeesuha huungi ohw'obulafu obwo, abasyaange ba ndali nabo badiira omuhono, mani nihwiingira mu Damasiko.

¹²“Omuundu wuundi olaangwa Anania, omusaacha odaha Nasaae muno ohweema hu malako ka Musa, haandi owali niyasiimwa muno neende Abayudaaya boosi abali nibamenya mu siko omwo,

¹³yaasuda yi ndi yeema aambi naange, yamboolera ati, ‘Saulo mwaanama, bona haandi.’ Mu siha syeene esyo, ndanyoola ohubona hwaange haandi, mani ndanyala ohumubona bulai.

¹⁴Yaboola ati, ‘Nasaae wa bakuuka, yahudoola omanya ohudaha hwae, ohubona Oyo Omuluungifu mweene neende ohuwulira ekono elitula mu munwa kwae;

¹⁵olwohuba ewe ochia ohuba omuloli wae eyiri abaandu boosi hu bidiira hu biindu bi obweene haandi by'owuliire bino.

¹⁶Bulaanu lwasiina oli ohuhiinda oti? Siingira mani obatiisibwe, weyoseho ebyonoono byao byoosi, niwekongooya eliita lyae.’

¹⁷“Nindali nimalire ohukobola mu Yerusalemu, haandi nindali niisabanga mu Nyuumba ya Nasaae, ndaboneherwa

¹⁸mani ndaabona Omwaami owaboolera ati, ‘Yanguyaho muno, otule mu Yerusalemu, olwohuba abaandu haba sibachia hufukiirira obuloli bwao obundiiraho daawe.’

¹⁹Mani niboola endi, ‘Omwaami, abeene bano bamanyire bulai bweene bati, mu buli Sinagoogi, ndeengiraanga nindiira haandi nindoocha abo abalichiingi nibafukiirira mu ewe.

²⁰ Haandi amabaanga ka Sitefaano omuloli wao mweene nikali hu keediswa, ese syesi ndali ninyemere aambi ao haandi syesi nisikwiira, haandi niniindire engubo ch'abaandu bali nibamwiita.’

²¹Nae yeecha yamboolera ati, ‘Tula ano; olwohuba ese njia ohuhutuma ochie eyale muno eyiri abaandu Bateende.’ ”

²²Ohwoolera elalira hu mboosi yene yino, abaandu bali nibamutekereese sa; nae bulaanu beemao bachaaka ohusiingisa amakono kaabwe nibaboolera aakulu bati, “Mumale hu syalo huno omuundu ofwaana ati! Haba s'ahoyera ohubaao omulamu.”

²³Mani koti lu bali nibali ohulira batyo, nibakuya engubo chaabwe mu mboo haandi nibadumuula olufu mu mboo,

²⁴omuhuluundu w'abasikaari oyo, yaalagira ati bamuleete bamwiingise mu daala ly'abasikaari, haandi naamala n'alagira ati bamuyaase nibamunaala ehoba, nibadaha ohumanya esikera abaandu nibamwehuumaho batyo.

²⁵Nae nibaba nibamalire ohumuboya neende ehoba, Paulo yeecha yaboolera omuhoongo wuundi wali niyeemere aambi nae ati, “Mani sifukiirirwa mu malako eng'we ohunaala omuundu oli omwibulanwa wa Rooma n'asisiiri ohuheengerwa omusaango?”

²⁶Mani omuhoongo oyo niyeecha yawulira atyo, yeecha yaacha eyiri omuhuluundu w'abasikaari mweene mani n'amuboolera ati, “Siina syeene sino si muli aambi ohuhola? Olwohuba omuundu wuno, mwiibulanwa wa Rooma niye.”

²⁷Mani sakira, omuhuluundu w'abasikaari oyo yeecha yaacha eyiri Paulo, mani yamuboolera ati, “Ewe mboolere bulai bweene, oli omwibulanwa wa Rooma kose?” Nae yamukobolamo ati “Eee.”

²⁸Bulaanu omuhuluundu oyo yakobolamo ati, “Ese ndakula obwiibulanwa buno eseende enyiingi muno.” Nae Paulo yeemao yaboola ati, “Nae ese ndeebulwa hundaaba omwibulanwa.”

²⁹Mani sakira abaandu bali nibali aambi ohuchaaka ohumuyaasa bamwiiruhaho bwaangu; omuhuluundu oyo yesi yaatya muno olwohuba yamanya ati, Paulo yali omwibulanwa wa Rom haandi ati, yali n'amalire ohumuboya eminyororo.

³⁰Nae hu ludaalo lwaloondaho, omuhuluundu oyo nasiteemaho ohumanya bulai esyakera Abayudaaya nibamuwabira batyo, yeecha yamuboolola, mani yaalagira abalaamisi bahuluundu, alala neende esiina syoosi beeche bebuuse alala mani yamala yaleeta Paulo yamuta mu moni waabwe.