Read saamia Ebiholwa 26 Bible Online

Ebiholwa 26 - saamia bible

Ebiholwa 26

¹Agiripa yaboolera Paulo ati, “Mbao onyoolere ehabi y'ohwelomalomaho omweene.” Paulo yakolola omuhono kwae aakulu, yachaaka ohutusa embosa yae ati:

²“Ese ndi ohwebukula omweene ohuba omuundu oli neende ehabi muno ohuba mbwe ndi mu moni wao, Omutuki muhunuufu Agiripa, ndi ohwekaya enyaanga yino emisaango kyoosi ech'Abayudaaya,

³olwohuba ewe oli neende obumanyirifu buungi muno obudiira hu miduunga alala neende obuhukabuhania obw'Abayudaaya; mani sakira ndi ohuhwekweeda wuutekerese neende ohwesimiirisa muno.

⁴“Engeri y'obulamu bwaange ohutulira elalira mu budoto bwaange, koti lundamenyaanga sa mu syaalo syaange sino, haandi ni ndi mu Yerusalemu, bumanyihaane neende Abayudaaya boosi.

⁵ Bamanyire bati, hulw'embaka ndeeyi muno, nikali mbwe banyala ohuba nibadaha ohusisiira, mbwe ohweema hu mukaanda kw'ediini yeefwe mujiing'u muno ese ndamenya koti Omufarisaayo.

⁶Nae bulaanu, mbano nyemere ano ni ndi ohuyaaswa hulw'esuubi mu sisuubise syaholwa neende Nasaae eyiri baseefwe,

⁷kata enono cheefwe ehumi neende chibiri choosi chisuubira ohunyoola, koti lubeenamiraanga Nasaae neende omwooyo mulala, esiro neende esideete. Nihaandi ni hu suubi lyeene lino, lisitaakirweho neende Abayudaaya beene bano, mutuki waange!

⁸Lwasiina sibaasibwa neende omuundu yeesi hweeng'we mbwe sisinyaliha Nasaae ohusyuusa abafu?

⁹ “Ese mweene ndali nindamanya sa bulai bweene endi hoyerwa ohuholaanga esinyaliha syoosi, ninyiingania eliita lya Yesu owa Nasareeti.

¹⁰Ndasihola muno mu Yerusalemu; haba sisyali siti ndanyala ohwikalira abaluungifu ba Nasaae abaangi mu jeela, ninyoolere obunyala ohutula eyiri Abalaamisi bahuluundu, nae kata abaandi nibeetwaanga, ndakwiiraanga esiholwa esyo.

¹¹Haandi ndoola ndanyalaanga neende omweene ohubasaandyaanga butoli-toli mu Sinagoogi choosi, haandi niteemaho muno ohubona endi mbahola boola ohufwoola Nasaae; mani nindalichiingi nimbadiirire egiili libira sa, ndabasandyaanga muno kata neende nibalichiingi mu biko biteende by'eyale.

¹²“Endyo nilwo lu ndali ni ndi hu lukeendo niinjia Damasiko ni ndi neende obunyala neende esilagiro sy'abalaamisi bahuluundu.

¹³Esideete ng'alang'ala, mutuki waange, ndabona obulafu butula Muukulu ni ndi hu ngira eyo, obuhiraho neende elyuuba, nibwaaduha nibumbodoohaane neende abo boosi abali nibakeenda naange.

¹⁴Fweesi nihwali nihumalire ohukwa hu buloba, ndeecha ndanyala ohuwulira ekono niliimboolera mu lulimi Luibburania liti, ‘Saulo, Saulo, lwasiina oli ohusaandya otyo? Sisihunyaala nooba n'otachia hu mayingo.’

¹⁵Naange ndaboola endi, ‘Niiwe naanu, Omwaami?’ Nae Omwaami yaboola ati, ‘Niise Yesu yooli ohusaandyaanga.

¹⁶Kata katyo, ewe siingira weeme hu makulu kao; olwohuba ese huboneheere hulw'esifune sino siti, ohuhudoola ochie wuhalaabanire, haandi otuse obuloli bw'ebiindu bi wamala ohuumbonamo, neende ebyomu bi njia ohuhuboneheraangamo,

¹⁷nihukaya ohutula hu baandu bao, haandi neende ohutula hu baandu Bateende, abo ba ndi ohuhutumamo.

¹⁸Wahabaliimbusa emoni chaabwe, hu banyale ohukaluuhana ohutula mu siirima ohuchia mu bulafu, haandi ohutula mu maani ka Sitaani, ohuchia eyiri Nasaae, hu banyale ohunyoola ohuleherwamo hw'ebyonoono byaabwe, neende obweyaango bwaabwe mu baandu ba Nasaae yadoola.’

¹⁹“Ohweema hu esyo, Agiripa Mutuki waange, haba sindeecha ndanyala ohuhaya ohwiisa oluyaali muhuboneherwa ohwo Muukulu daawe,

²⁰ nae ndachaakira hu huyaalira abo abali nibamenya mu Damasiko, mani ndalondyaho abali mu Yerusalemu, haandi ndalondyaho esyaalo syoosi esya Yudea, haandi neende eyiri abaandu Bateende bosi, endi bahoyere beeyolobye mani bamale bakaluuhane eyiri Nasaae, mani bamale banyale ohuhola ebiholwa bichiana neende ohweyolobya hwaabwe.

²¹Mani ohweema hu sifune sino, Abayudaaya bangwaaho nindali ni ndi mu Nyuumba ya Nasaae, nibadaha ohunjita.

²²Ohwoola enyaanga yino, ese mbereenge sa ni ndi ohunyoolaanga sa obuhoonyi butula eyiri Nasaae yeeng'ene, mani sakira nyalire ohweema ano ni ndi ohwelomalomaho eyiri abaandu badiidi neende abakali sidubaanie, nitaboolaho esiindu siindi ohutusaho ebyo bi banabbi alala neende Musa baboola bati bicha ohuholehana:

²³ biti Kristo mweene achia ohusaandiswa, haandi biti, mu huba otaangira ohusyuuha ohutula mu bafu, alinyala ohuyaala obulafu eyiri abaandu bano, neende eyiri abaandu Bateende sidubaanie.”

²⁴Mani koti lu Paulo yali naali ohutusaanga obuloli bwae, Fesito yeecha yaalomalomera mu kono ly'aakulu ati, “Ewe Paulo, ngandi oli omulalu; obweekese bwao bubitiirifu obwo, mbao buli ohuhulalusa.”

²⁵Nae Paulo yaboola ati, “Ese haba siindi mulalu daawe, ewe Fesito ow'oluyaali luhiramo, nae ndi sa ohulomalomaanga ohwadyeeri bukwalaafu.

²⁶Olwohuba kata omutuki muhunuufu yesi amanyire ebiindu bino bulai bweene mani sakira ndi ohulomalomaanga ni ndi omulehuule mu moni wae; olwohuba ese ndi neende obwomiifu bumala endi abulao kata esiindu silala hu bino esinyala ohuba nisimudoondobaaneho ohumanya, olwohuba sino haba sisiholeerwe mu bweekisi daawe.

²⁷Agiripa mutuki waange muhunuufu, haba s'ofukiirira mu banabbi? Ese manyire endi ewe ofukiirira.”

²⁸Mani Agiripa bulaanu yeecha yaboolera Paulo ati, “Mu bweyaango obudiidi buti, oli ohubaasa oti omalire ohungaluuhania ohuba Omukristo!”

²⁹Mani Paulo yeemao yaboola ati, “Kata nisiba esiimbikiti, kata esileeyi, ndahasidahiise Nasaae endi, kata haba sooba ewe weeng'ene, nae kata abo boosi abali ohutekeeresa bi ndi ohuboola ludaalo nyaanga yino, endi boosi bahoyere ohukaluuhana baaba koti lu ese fwaana, ohutusaho nibataaliho eminyororo chino.”

³⁰Bulaanu, omutuki muhunuufu oyo yeemao yaasiingira yeema, mani haandi neende gafana alala neende Bbamisi haandi neende abo boosi abali nibehaale nabo;

³¹mani nibaba nibamalire ohuwaao, bachaaka ohuboolanira buli otula neende owaasye bati, “Hane omusaacha wuno abulaho esiindu syoosi syaholaanga esinyala syamuhoyera ohufwa kata sa neende ohwikalirwa mu jeela.”

³²Agiripa yaboolera Fesito ati, “Omusaacha wuno aba yamala ohulehuulibwa hale aba n'atajulira eyiri Kaisaari.”