Read saamia Ebiholwa 28 Bible Online

Ebiholwa 28 - saamia bible

Ebiholwa 28

¹Nihwali nihumalire ohuwona, hwamanya huti, esisiinga esyo syali silaangwa mbwe Melita.

²Abeebulanwa bohu bweene ohwo batweekesa esisa sihutabonaaho, olwohuba banyala ohutwadusira omuliro kw'ohwoota haandi batubukaanira fweesi bulai muno, olwohuba efula yali niyichaakire ohukwa mani emboo yali enyiingi muno.

³Paulo yali nanyalire ohuteenya oluhanya lw'eehwi n'amalire ohuchita mu muliro, endemo yachituliramo hulw'obubafu hw'omuliro, niyimala niyimweeboya hu muhono kwae.

⁴Abeebulanwa abo nibabona endemo eyo niyideembera hu muhono kwae, bachaaka ohuboolanira ebeene-beene bati, “Abulao ohukana-kana, omuundu wuno n'omwiiti w'abaandu niye. Kata yahaba n'awonere enyaanja, mubwadyeeri bweene, omusaango mbano kusumuhayiireho mani haba s'achia hudoong'ao omulamu daawe.”

⁵Nae omweene kata katyo, yasisimulira mu muliro okwo mani yahaya ohumuholaho endemo eyo syoosi.

⁶Nabo baba ao nibaliindiriire bati Awuundi achia ohufwiimba oba ohukwa sa n'afwiira abweene ao; nae nibaba nibamalire ohuliinda hulw'embaka ndeeyi muno, nae nibahayire ohubonaho esidinyu syoosi nisimukwiireho, bakaluuhania ebibaaso byaabwe baboola bati, yali naali nasaae.

⁷Bulaanu aambi ao, yaliwo amaloba kali esiindu ak'omuhuluundu w'esisiinga esyo, olaangwa ati Pabbulo oweecha yatubukaanira haandi yamala yatusangaasanga n'atuliisa hulw'endaalo chidatu enaamba.

⁸Syaba mbwe laatang'ene Pabbulo wuno yali n'alwaala omuyaka haandi nanyalala; Paulo yamukeniya yaamulaamira eyiri Nasaae, mani namwisaho amahono kae, naanyala ohumuwonia.

⁹Sino nisyali nisimalire ohweholehana, abaandu badoong'ereyo boosi abali nibamenya hu sisiinga ohwo, abali nibali neende obulwaae bukabuhaane bosi beemao bachaaka ohwichaanga nibaonisibwa.

¹⁰Batuberesa ebiyaanwa biingi muno; mani nihwali nihusyaabala nihuwaao, baata mu meeri ebiindu bi hwali nihudaha byoosi.

¹¹Luunyuma lw'ohumala emyoosi kidatu emilaamba, hwaheengao ohusyaabalira mu meeri yali niyeyikaame endaalo ch'etoocho hu sisiinga esyo, emeeri yali ey'Alekisaandaria, niyiri neende obwandiike buboola mbwe “Banasaae Banabahwaana.”

¹²Nihwoola mu Sirakuuse, hwamala ao endaalo chidatu enaamba.

¹³Haandi ohutula abweene ao, hwehuyuunga hweemao hwoola mu Regiamu; mani luunyuma lw'ohumala oludaalo lulala lwoong'ene, buyaanja kutulira emwaalo kwachaaka ohuwuucha, mani hu ludaalo lwohubiri hwanyala ohwoola Puteoli.

¹⁴Nihwoola eyo hwabukaana abafukiiriri basyeefwe abaangi muno, batulaanga ohubakeniya humenye nabo, hwamala endaalo chitaanu-na-chibiri enaamba. Hutyo nilwo luhwoolera Rooma.

¹⁵Abasyeefwe bali nibali eyo, nibawulira akatudiiraho, batukoonya ohwoolera elalira mu Muhung'aano kwa Apiusi neende Enyuumba Chikonwamo Chidatu ohubonana sa naafwe. Mu hubabona sa, Paulo yebasa muno Nasaae, mani yomiiswa muno omwooyo.

¹⁶Nihwoola mu Rooma, Paulo yafukiirirwa ohumenya yeeng'ene, neende omusikaari mulala yeeng'ene owali naamulindaanga.

¹⁷Luunyuma lw'endaalo chidatu, Paulo yalaanga yabuusa abeemeresi b'abaandu babuli ludaalo Abayudaaya; nibaba nibamalire ohwebuusa, yachaaka ohubaboolera ati, “Basyaange, kata andahaba nindali nitaholaho esiindu syoosi, oba emiduunga cha baseefwe, kata katyo ndoola ndaleetwa koti omuboye ohutula mu Yerusalemu mu mahono k'Abarooma.

¹⁸Nibamala ohunjaasa, babona bati syahabeere esilai ni mba nindalehuulwa, olwohuba yabulao esifune syoosi esihoyera ohutungwa neende ohufwa mu musaango kwaange.

¹⁹ Nae Abayudaaya nibakaana, byaanjika ohunoonia Kaisaari, ndahaba mbwe sindali neende omusaango kwoosi kuunyala ohusitaaka haandi hu syaalo syeefwe sino.

²⁰Esifune syeene sino, sakira ese ndahire ohubabona mani male nomanome naang'we, koti lu siri siti, ohweema hu suubi lya Yisiraeli elikera nimboyeerwe neende olunyororo luno.”

²¹Nabo bamuboolera bati, “Efwe husisiiri ohunyoolaho ebbarwa yoosi ohutula mu Yudea eyihudiiraho, haandi abulao mulala hu basyeefwe bechaanga eno owahutahooho omusaango oba yahulomalomaho esiindu sibi syoosi.

²²Nae kata katyo, efwe hudaha ohuwulira ohutula hu ewe omweene, ebibaaso byao koti lu biri; olwohuba ohweema hu mukaanda kw'ediini kuno, humanyire huti buli abuundu woosi kuli ohulomwalomwaangaho bubi.”

²³Nibaba nibamalire ohumutekehera oludaalo lwae, bakobola yaali, abuundu yi yali niyamenya nibali abaangi muno. Yachwichwiisa esifune syae bulai yibali ohutulira elalira echuli, ohwoolera elalira engoloobe, niyomiisaanga ebidiira hu bwaami bwa Nasaae haandi n'ateemaho ohubaserera bafukiirire akadiira hu Yesu ohutulira elalira mu kali mu malako ka Musa ohwoolera elalira hu kali mu banabbi.

²⁴Abaandi banyala ohwikuswa bulai neende ebyo bi yali n'ababoleere, nae abaandi nibahayuha sa.

²⁵Mani sakira, koti lu bachaaka obutawuliirisania mu beene, beemao basalaana, luunyuma lu Paulo yaboola esiindu silala ati: “Mwooyo Mwoolerefu yali owadyeeri niyaboolera balaata yeeng'we n'abitira mu Yisaaya omunabbi ati:

²⁶‘Chia eyiri abaandu bano mani oboole oti, Muchia mubwadyeeri bweene ohuwulira sa, nae haba simulimanya daawe, haandi mubwadyeeri bweene muchia ohutingaalaanga sa, nae haba simwiingisa daawe,

²⁷Olwohuba omwooyo kw'abaandu bano, kwamala ohuwumumala, haandi amatwi kaabwe kasidoyera muno ohuwulira, haandi emoni chaabwe, bamala ohuchiliimbya; hu beemeo bahaye ohwiingisa neende emoni chaabwe, haandi ohuwulira neende amatwi kaabwe, mani banyale ohungaluuhanira mbaonie.’

²⁸Mulehe mani simanyihane yi muli siti ohuwonisibwa huno ohwa Nasaae, hwayirwa eyiri abaandu Bateende; bachia ohutekeeresa.”

²⁹Niyali n'amalire ohuboola emboosi chino, Abayudaaya boosi basiingira bawaao, nibanyoolereere abasyaabwe muno.

³⁰Mani yaanyala ohumenya emyaaka kibiri emilaamba niyeliisa omweene yeeng'ene haandi nabukaaniraanga abo boosi abachichaanga yaali,

³¹n'abayaaliraanga obwaami bwa Nasaae haandi yeekesaanga ebidiira hu Omwaami Yesu Kristo mu bwahaahu, n'abulao kata omukayira.