Read saamia Ebiholwa 3 Bible Online

Ebiholwa 3 - saamia bible

Ebiholwa 3

¹Oludaalo luundi, Petero neende Yowaana bali bachia mu Nyuumba ya Nasaae, esaa chitaanu-na-chine esiha sy'ohulaama.

²Mani niboola hu siruwa sy'Enyuumba ya Nasaae esilaangwa siti Esiruwa Siroonyo, babukaanao omusaacha walema ohutula mu budoto bwae niyesabirisaanga.

³Niyabona sa ati, Petero neende Yowaana nibeengira mu Nyuumba ya Nasaae, yabasaba obuhoonyi.

⁴Nae Petero neende Yowaana bamutingaala tiiri mu moni, mani Petero yamuboolera ati, “Tutingaale.”

⁵Mani yabahayisiraho emoni, yabaasa ati bachia ohumubaaho esiindu.

⁶Nae Petero yamuboolera ati, “Ese mbula efeesa oba esaabbu, nae njia ohuhuberesa esiindu si ndi nasyo; mu liita lya Yesu Kristo Omunasareeti, siingira okeende.”

⁷Yaamudiira omuhono muluungi yamusiingisa; mani abweene-na-bweene ao, amakulu kae alala neende ebisiisiro byae nibyomiira.

⁸Yaduuma yeema yachaaka ohukeenda mani yeengira mu Nyuumba ya Nasaae alala neende Petero neende Yowaana, yakeenda naduumakala naakinia Nasaae.

⁹Abaandu boosi abamubona n'akeenda haandi n'afumia Nasaae,

¹⁰bamanya bati niye owehalaanga niyesabirisa hu Siruwa Siroonyo sy'Enyuumba ya Nasaae; mani baawuka haandi besiinduha muno hulw'ebiindu byali bi mweeholehaneho.

¹¹Omusaacha oyo niyali n'asyomeere hu Petero neende Yowaana, abaandu boosi bawuka beeruha yi bali mu siseenge silaangwa siti esya Solomooni.

¹²Nae Petero niyabona atyo, yaboolera abaandu ati, “Eng'we Abaisiraeli basyaange, lwasiina sino sibawuukisa, oba lwasiina mutudangaaliireho, muti fwaana niifwe abakerere omusaacha wuno yakeenda hulw'amaani keefwe abeene oba hulw'obwoolerefu bweefwe abeene?

¹³ Nasaae wa Abburahamu neende Yisaka neende Yakobbo, Nasaae wa bakuuka yeefwe, niye owaberesa Yesu omuhalaabani wae oluyaali. Oyo yi mwadiisa mu mahono k'abahoongo haandi mwamwekaana mu moni wa Pilato, owali n'aheengereo ohumulehuula.

¹⁴ Nae eng'we mwekaana Oyo Omwoolerefu haandi Omuluungifu mweene, mani mwasaba babalehuulire omwiiti.

¹⁵Nae eng'we ning'we abeeta Omweene bulamu, yi Nasaae yasyuhisa ohutula mu bafu. Niifwe abaloli ba sino.

¹⁶Mu liita lyae, neende ohusuubira mu liita lyae, nibyo ebikerere omusaacha yi mubona wuno haandi yi mumanyire yanyoola amaani. Haandi efukiirira mu Yesu niyo eyikerere omusaacha wuno yaaba omulamu mweene koti lu mweesi mubona.

¹⁷“Mani bulaanu basyaange, manyire endi mwasihola mu butamanya, koti lu batuki beeng'we bosi bahola.

¹⁸Nae, esyo si Nasaae yalomalomera hale mu banabbi boosi, ati Kristo wae ahoyere ohusaanda, yasyoseresa abweene atyo.

¹⁹Hulwesyo mweyolobye ebyonoono byeeng'we, mukaluhe eyiri Nasaae, hu bibi byeeng'we binyale ohutusibwao, mani hu biha by'ohweekobosa buyaaha bibeechere nibitula eyiri Omwaami,

²⁰mani abatumire Kristo yi yabadoolera, niye Yesu.

²¹Yesu oyo niye ohoyere ohuba Muukulu ohwoolera elalira hu biha byeebyo byoosi bi Nasaae yalomalomera mu banabbi bae boolerefu boosi abaluwo hale.

²² Olwohuba Musa yaboola ati, ‘Omwaami Nasaae weeng'we achia ohubatumira omunabbi otula mu baandu beeng'we koti lu yaanduma. Muhoyere mumuwulire mu buli siindu sy'ababoolera.

²³ Omuundu yeesi otahawuliire emboosi ch'omunabbi oyo, achia ohutusibwa mu baandu mani asihirisibweengwe.’

²⁴Abanabbi boosi abalomalomaanga hale, ohutulira elalira hu Samueli neende abamuloondaho, bosi balomalomaanga ebidiira hu ndaalo chino.

²⁵ Eng'we niing'we abaana ba banabbi haandi ab'Endagaano yi Nasaae yaberesa bakuuka yeeng'we n'aboolera Abburahamu ati, ‘Njia ohuberesa abaandu bohu syaalo syoosi ehabi nimbitira mu lwiibulo lwao.’

²⁶Nasaae niyamala ohudoola omuhalaabani wae, yataangira ohumutuma eyiri eng'we, ohubaberesa ehabi n'akaluhaania buli muundu hweeng'we ohutula mu ngira chae mbi.”