Read saamia Ebiholwa 5 Bible Online

Ebiholwa 5 - saamia bible

Ebiholwa 5

¹Nae omusaacha olaangwa Anania, alala neende omuhasi wae Safira, bakusa olwaande lw'ebiindu byaabwe.

²Nibamala ohuwuliirisania neende omuhasi wae oyo, omusaacha oyo yahayira hu seende chatula mu biindu bi bali bakusire, mani yaayira esituundu syoong'ene, yaasita mu makulu k'Abatume.

³Petero yaboola ati, “Ewe Anania, lwasiina Sitaani ahuchuubire obwakiire ao ohubacha Mwooyo Mwoolerefu, neende ohuhayira hu situundu sy'eseende chitulire hu mukuunda kwao?

⁴Nikwabeere nikutaakusibwa, haba sikwali okwao kweene? Haandi nikwali nikumalire ohukuswa, haba sikwali nikusisiiri mu bunyala bwao? Sibeere sitye haandi ewe ohwoola waheengao ohuhola esiindu sino mu mwooyo kwao? Ewe haba s'obachire abaandu, nae obachire Nasaae.”

⁵Anania niyawulira sa emboosi chino, yakwa aasi mani yaafwa. Obuti buungi muno bwadiira abaandu boosi abasiwulira.

⁶Abasyaani baraaga basiingira bamuboya bulai bweene, baamukiinga baamutusa erwaanyi, mani baamusiiha.

⁷Luunyuma lw'esiha syoola aambi w'amasaa kadatu, omuhasi wae yesi yeecha n'atamanyireho esyali nisyeholeehe.

⁸Petero yamuteeba ati, “Ewe mboolereho nimukusire omukuunda okwo hu seende chino choong'ene.” Yamukobolamo ati, “Eee, nicho chityo sa.”

⁹Nae Petero yamuteeba ati, “Siina syeene esikerere mwafukiirisania alala ohuteema Mwooyo w'Omwaami? Haandi mbao, amakulu k'abaandu basiihire wamwo kamalire ohwoola hu mulyaango, mani kachia ohuhukiinga wesi kahutuse ano.”

¹⁰Abweene-na-bweene ao, omuhasi oyo yakwa aasi mu makulu ka Petero, mani yaafwa. Abasyaani baraaga bala nibeengira sa bati, banyoola omuhasi oyo n'amalire ohufwa, baamukiinga baamutusa erwaanyi, baamusiiha endulo wa wamwe.

¹¹Obuti buungi bwadiira abafukiiriri boosi, neende abaandu boosi abawuliraanga hu biindu bino.

¹²Bulaanu, Abatume bahola eby'amayia biingi muno, alala neende ebiwukisa. Abaandu boosi bali nibali alala mu siseenge sya Solomooni.

¹³Abulao omuundu wuundi yeesi owadahaanga ohubeyambaaniaho, nae bababeresaanga oluyaali luhoongo muno.

¹⁴Nae abaandu bemeeda sa ohweyambaanianga hu Omwaami ohuhiraho endaalo chiindi choosi, ebidiiyiha by'abasaacha alala neende abahasi,

¹⁵ohwoola lu baandu bachaaka ohukiingaanga abalwaae nibabatusa mu nyuumba nibabata hu ngira, nibabaaliise hu bitaanda byaabwe alala neende hu buliri bwaabwe, nibaboola bati, Petero n'abitira ao, esiiniha syae sinyale ohwegeeng'aangaho hu balwaae baandi.

¹⁶Abaandu baandi bosi bebuusaanga alala nibatula mu biko bisibiraane neende Yerusalemu, nibaletaanga abalwaae alala neende abo boosi abalichiingi nibaseeterwe neende ebihyeeno, mani boosi banyoola ohuwona.

¹⁷Omulaamisi muhuluundu yasiingira alala neende abo boosi abali ao nae boosi, esikaanda sya Abasadukaayo nibechuule ehali-hali,

¹⁸badiira Abatume abo baabata mu jeela eya buli muundu yeesi.

¹⁹Nae nibyoola esiro, Malaika w'Omwaami yeecha yekula emilyaango ky'ejeela eyo, yabatusa erwaanyi mani yaboola ati,

²⁰“Muchie mweeme mu Nyuumba ya Nasaae, muboolere abaandu boosi emboosi chino ech'Obulamu Buyaaha.”

²¹Abatume nibawulira batyo, bachaaka ohwiingiraanga mu Nyuumba ya Nasaae buli chuli nibeekesa abaandu buli buhya. Nae bulaanu, omulaamisi muhuluundu alala neende abaandu ba yali ali nabo, balaanga esiina syoosi syehala alala neende abahuluundu ba Yisiraeli boosi, baatuma emboosi mu jeela bati, babaleete beehaswe mu siina.

²²Nae abahuluundu b'ejeela nibeecha, haba sibabakaana mu jeela eyo daawe, bakobola baboola batyo koti lu babweene bati,

²³“Efwe hwakaanire ejeela niyikaalwe bulai bweene haandi buli muliindi niyeemere hu mulyaango kwae, nae nihwikuuleo, haba sihwakaaniremo omuundu yeesi.”

²⁴Bulaanu, omuhoongo w'Enyuumba ya Nasaae, alala neende abalaamisi bahuluundu bawulira emboosi chino, mani baatya muno abaandu bano, nibakana-kana yi biindu bino bicha ohwoola.

²⁵Nae omuundu wuundi yababoolera ati; “Abasaacha bala bamwata mu jeela, mbala beemere mu Nyuumba ya Nasaae, bali ohweekesa abaandu emboosi chaabwe.”

²⁶Omuhoongo w'Enyuumba ya Nasaae alala neende abahuluundu abo, bachia badiira abatume abo, baabaleeta neende omuleembe, olwohuba bali batiire bati abaandu baandi bali bachia ohubahubba amakina.

²⁷Nibamala ohubaleeta, babeemesa mu moni w'esiina. Omulaamisi muhuluundu yachaaka ohubateeba,

²⁸ n'aboola ati, “Efwe hwabalagira huti muteekesaho mu liita lino, nae bone, eng'we mumalire ohwiichusa Yerusalemu yoosi neende enjekesa yeeng'we eyo, haandi muli ohuchiiririra ohutuleetaho amabaanga k'omuundu oyo.”

²⁹Nae Petero alala neende abatume abo bakobolamo bati, “Efwe huhoyere ohutya Nasaae ohuhira ohutya omuundu.

³⁰Nasaae wa bakuuka yeefwe oyo niye owasyuuhisa Yesu oyo yi mweeta nimumwaaniihe hu musaala.

³¹Nasaae mweene yeecha yaamuhusa yamuta hu muhono kwae muluungi yaaba Omwimiirisi haandi Omuwonia, hu anyale ohuberesa Abaisiraeli ehabi y'ohweeyolobya, neende ohuleherwamo ebyonoono.

³²Efwe huli abaloli b'ebiindu bino byoosi, koti lu Mwooyo Mwoolerefu yesi ali, oyo yi Nasaae yaberesa abo boosi abamwiisamo oluyaali.”

³³Nae abo nibawulira batyo, badiirwa etima liingi, baadaha ohwiita abasaacha abo boosi.

³⁴Nae kata katyo, Omufarisaayo wuundi owali mu siina esyo, olaangwa ati Gamalieli, haandi owali omweekesa w'amalako ka Musa, mani owali yesibwamo oluyaali luhoongo neende abaandu boosi, yeecha yaasiingira yeema, yalagira ati abasaacha abo boosi mberi batusibweho erwaanyi budiidi.

³⁵Omusaacha oyo yaboolera abaandu abo boosi ati, “Eng'we abeebulanwa ba Yisiraeli mweesi, mweliinde bulai bweene, esiindu syoosi si mudaha ohuhola abasaacha bano.

³⁶Olwohuba mu ndaalo cheene chino enyuma hooho eyo, yasikuuheyo hooyo omusaacha wuundi olaangwa ati Tewuda niyeyekesera elalira omweene mbwe niye omuundu mweene liita, mani abaandu baandi hooho, aboola koti abaandu emia chine chiti, bamweyambaaniaho; nae luunyuma omusaacha mweene oyo niyeetwa, abaloondi bae abo boosi basalaana beemao bakoterao elalira bati koto.

³⁷Luunyuma lwooyo ohumala atyo, Yuda Omugalilaaya yesi yeecha yaatulayo, mu ndaalo ch'ohubaliramo abaandu, mani yesi yebuusiraho abaandu baandi yaacha nabo; yesi nasilala atyo, niyahamyuhao, abaandu bali bamuloondere boosi bosi basalaana.

³⁸Mani sakira hu habi lino ese ndi ohubakeraka endi, mutule hu basaacha bano, mubalehe buleha boong'ene; olwohuba nikali mbwe endekeha yino, oba omulimo kuno kwachaakiswa neende omuundu, kuchia ohufwa-bufwa;

³⁹nae nikali mbwe kwa Nasaae mweene, kali mbwe eng'we haba simuchia ohunyala ohubayiingira daawe. Awuundi eng'we beene niing'we abachia ohubonehana koti abali ohuyiinganiaanga Nasaae!”

⁴⁰Abaandu abo boosi badiira engeraka yae eyo, mani luunyuma lw'ohulaanga Abatume abo ohwiingira mu siina, baheengao ohubanaalaho embariki mani babalagira obutemeeda ohulomalomaanga mu liita lya Yesu, baamala baabalehuula bawaao.

⁴¹Abatume abo boosi, beemao basiingira baatula, mu siina, nibehoya olwohuba mbwe bali bayirirwe koti abahoyera ohujaarwa neende ohusaandisibwa hulw'eliita lya Yesu.

⁴²Ohuchaakira elalira hu ludaalo olwo, oba nibali mu Nyuumba ya Nasaae oba mu madaala, haba sibalehaanga ohweekesa alala neende ohuyaala Yesu koti lwaali niye Kristo.