Read saamia Ebiholwa 9 Bible Online

Ebiholwa 9 - saamia bible

Ebiholwa 9

¹Nae Saulo, n'asisiiri neende ohudaha ohutiisa-tiisa neende ohwiita abeeki b'Omwaami, yaacha eyiri omulaamisi muhuluundu

²yamusaba ebbarwa chichia mu Sinagoogi chiri mu Damasiko, hu bulaanu niyakaanayo oyo yeesi omuloondi w'Engira, abasaacha neende abahasi, anyale ohubaboya abaleeta e Yerusalemu.

³Bulaanu niyali n'akeenda n'achia Damasiko, abweene-na-bweene ao, obulafu butula Muukulu bwamyeesuha bwamwebodoohania.

⁴Saulo yakwa aasi mani n'awulira ekono nilimuboolera liti, “Saulo, Saulo, lwasiina wusaandya?”

⁵Saulo yaboola ati, “Omwaami, niiwe naanu?” Omwaami yaboola ati, “Niise Yesu, oyo yooli ohusaandya.

⁶Siingira ochie wiingire mu siko sihuluundu esyo, ochia ohuboolerwa syooba ohoyere ohuhola.”

⁷Abasaacha bali nibali ohukeenda nae beema nibang'ang'aalire, bawulira ekono elyo, nae sibabonaho omuundu yeesi.

⁸Saulo yasiingira ohutula aasi; nae emoni chae nichali nichilimbuule, haba siyanyala ohubona esiindu syoosi. Mani sakira yemirirwa neende abaandu baandi nibamudiirire omuhono bamwoosa mu Damasiko.

⁹Ohumala embaka y'endaalo chidatu, Saulo yali n'atabona daawe, haandi haba siyalyaho kata ohung'waho esiindu syoosi.

¹⁰Nae bulaanu, yaliwo omweeki wuundi owali yamenya mu Damasiko olaangwa ati Anania. Omwaami yamuboolera muhuboneherwa ati, “Anania.” Nae yaboola ati, “Omwaami, mbano ndi ano.”

¹¹Omwaami yamuboolera ati, “Siingira ochie hu ngira yilaangwa yiti Tiiri, oteebe mu nyuumba ya Yuda omusaacha otula Tarisiisi olaangwa ati Saulo; bona, ali ohusaba Nasaae,

¹²abweene omusaacha wuundi olaangwa ati Anania niyeengira mu nyuumba yi yalimo n'amwiisaho amahono kae hwaanyale ohunyoola haandi ohubona hwae.”

¹³Nae Anania yakobolamo ati, “Omwaami, ndahawulira ohutula hu baandu baangi muno hu muundu wuno, obuungi bw'ebiindu bibi bi yahamala ohuhola hu boolerefu bao mu Yerusalemu;

¹⁴haandi nguno ano ali neende obunyala ohutula eyiri omulaamisi muhuluundu ohuboya abo boosi abahwiinamiraanga.”

¹⁵Nae Omwaami yamuboolera ati, “Ewe chia, olwohuba oyo niye omuhalaabani waange, omudoole ochia ohuyira eliita lyaange eyiri Abateende, abatuki neende abaana ba Yisiraeli;

¹⁶olwohuba njia ohumweekesa koti ohusaanda hwae huchia ohwaaka hulwaange.”

¹⁷Anania yasiingira yawaao, mani niyeengira mu nyuumba omwo. Niyali n'amwiisaho amahono kae yaboola ati, “Saulo mwaanama, Omwaami Yesu owahuboneheere hu ngira yi wabeere niwiichiraho, yandumire yooli onyale ohunyala ohubona haandi, haandi onyale ohwichusibwa neende Mwooyo Mwoolerefu.”

¹⁸Abweene ao, esiindu sifwaana koti amakaamba syeecha syakwa nisitula hu moni chae mani yeecha yaanyala ohubona haandi. Yasiingira yabatiisibwa,

¹⁹yalya, mani n'anyoola amaani. Hulw'endaalo chiyeraho, Saulo yadoong'a naali neende abeeki abo Damasiko.

²⁰Abweene ao, yaacha mu Sinagoogi nyiingi n'ayaala Yesu n'aboola ati, “Yesu niye Omwaana wa Nasaae.”

²¹Abaandu boosi abamuwuliraanga besiinduhanga muno, nibaboola bati, “Wuno haba siniye omusaacha owasandyaanga muno abaandu beenamira eliita lino mu Yerusalemu? Haandi yabeere yeechere mu siko muno olw'esichiiririrwa syeene sino, ohubayira mu moni w'Abalaamisi bahuluundu nibaboyerwe.”

²²Nae Saulo yemeeda ohunyoola amaani, yeekusa Abayudaaya bali nibamenya mu Damasiko niyeekesa mu bwiichufu koti lu Yesu yali niye Kristo.

²³ Endaalo enyiingi nichabitao, Abayudaaya abo bachaaka ohukiiya ohumwiita,

²⁴nae ohumukiiya hwaabwe ohwo, hweecha hwamanyihana eyiri Saulo. Abeene abo babechaanga nibaliinda hu biruwa byoosi esideete neende esiro, bamubone bamwiite;

²⁵nae abeeki bae bamubukula esiro, mani bamwiisira aasi hu sida, naali mu simweero.

²⁶Niyali n'amalire ohwiicha mu Yerusalemu, yateemaho ohweyambaania hu beeki ba Yesu Kristo bala; nae bosi bamutya muno, olwohuba haba sibafukiirira bati, yesi yali niyeeholere omweeki wa Yesu Kristo.

²⁷Bbarinabba yamubukula, yamuleeta eyiri abatume ba Yesu Kristo, mani yababoolera bulai koti lu Saulo niyali naali hu ngira yabona Omwaami, owalomaloma nae, haandi neende koti lu yali naali Damasiko yayalaanga nataali neende esoni mu liita lya Yesu.

²⁸Saulo yachaaka ohukeendaanga nabo nibatula haandi nibeengira mu Yerusalemu,

²⁹nibayala ataali ohutya hwoosi mu liita ly'Omwaami. Yachaaka ohulomalomaanga haandi ohuyiinganiaanga Abayudaaya, abali nibalomalomaanga Olugiriki; nae nabo bali nibakiiyaanga ohumwiita.

³⁰Nae abasyaabwe baandi nibeecha basimanya, bamwiihirisa Kaisarea, haandi nibamala nibamutuma aweeo achie Tarisiisi.

³¹Mani sakira abafukiiriri ba Yesu Kristo abali mu Yudea mwoosi alala neende mu Galilaaya mwoosi, neende mu Samaria mwoosi, banyoola omuleembe mani beeyoombaha bomiira; mani nibali nibamenya mu bulamu bw'ohutya Omwaami, haandi neende mu hulemesebwa omwooyo hwa Mwooyo Mwoolerefu, beengiya muno.

³²Bulaanu koti lu Petero yali n'abakeendamo buli siha, yehirira yaacha emwaalo eyiri aboolerefu abali nibamenya mu Lida.

³³Ebweene eyo, Petero yakaanayo omusaacha wuundi olaangwa ati Ainea, owali niyadataalira hu buliri hulwembaka y'emyaaka chitaanu-na-chidatu, niyafwa omubiri kwoosi.

³⁴Petero yaboola ati, “Eneya, Yesu Kristo ali ohuhuwonia; siingira mani waale obuliri bwao.”

³⁵Abaandu boosi abali nibamenya mu Lida neende mu Saroni bamubona, bamala bakaluuhana baloonda Omwaami.

³⁶Nae bulaanu, mu Yopa mwalimo omweeki wuundi owali alaangwa mbwe ati Tabbisa, esyeekesa Dorika, esyeekesa esijusu. Yali omuhasi owechula emirimo milai mihaya neende ebihole by'omuhono mukabi.

³⁷Mu ndaalo cheene omwo, yalwaala mani yaafwa; nibaba nibamalire ohumwooka, bamwaalisa mu siseenge siri aakulu mu goroofa.

³⁸Nae olwohuba mbwe Lida syali nisiri aambi neende Yopa, abeeki nibawulira bati Petero ali mu Lida ebweene eyo, batuma abasaacha babiri yaali, nibamusaba nibaboola bati, “N'okanya, yichaho eno yi huli bwaangu.”

³⁹Mani Petero yaasiingiraniramo yachiaana nabo. Niyaba n'amalire ohwiicha, bamubukula bamuniinia mu siseenge syali aakulu mu goroofa. Abahasi bafwiirwe boosi bali nibeemere aambi nae nibali ohuliraanga, haandi neende nibali ohweekesaanga amaganjuula alala neende engubo chiindi chi Dorika yanabaanga niyali n'asisiiri ninabo.

⁴⁰Nae Petero yabatusa boosi erwaanyi, mani naamala nasigama aasi n'achaaka ohulaama Nasaae; nae niyakaluuhanira omulaambo yaboola ati, “Tabbisa, siingira.” Tabbisa yalimbula emoni, mani niyabona Petero, yasiingira yeehala.

⁴¹Petero yamusiingisa yaamwemesa. Yalaanga aboolerefu alala neende abahasi bafwiirwe boosi nibeechere, Petero mani n'abeekesa Tabbisa naali omulamu abweene.

⁴²Esyo mani nisimanyihana mu Yopa mwoosi, abaandu baangi muno bafukiirira mu Omwaami.

⁴³Petero yadoong'a mu Yopa hulw'endaalo enyiingi n'amenyere neende Simooni wuundi, omubaambi w'amaseero.