Read saamia Abarooma 6 Bible Online

Abarooma 6 - saamia bible

Abarooma 6

¹Bulaanu hunaboole hutye? Huchiiririre ohumenya mu syonoono, hu mbabaasi cha Nasaae chinyale ohwemeeda?

²Haba daawe, kata nabudiidi! Hwamala ohufwa eyiri esyonoono, mani hunyala hutye ohuchiiririra ohusimenyamo?

³Mubwadyeeri bweene mumanyire muti, nihwabatiisibwa mu Kristo Yesu, hwabatiisibwa alala nae mu hufwa hwae.

⁴ Sakira mani mu hubatiisibwa hweefwe, hwasiihwa neende Kristo, mani hwaakabana hu hufwa hwae hu hunyale ohusyuuha koti lu Kristo yasyuuha ohutula mu bafu hulw'amaani ka Laatang'ene maangi, mani ao fwesi hu hunyale ohumenya mu bulamu buyaaha.

⁵Mani koti lu hweeyambaania alala neende Kristo mu hufwa hwae koti lu yafwa, nilwo lwosi lu huchia ohweyambaania nae nihusyuuhisibwa mu bulamu koti lu yasyuuha.

⁶Humanyire huti, obulamu bweefwe buhale bwamala ohwiitirwa alala neende Kristo hu musalabba kwae, hu maani kakera omubiri nikuhola esyonoono kanyale ohusihiriswa, haandi hu huhaye ohukobola ohuba abawaambe b'esyonoono.

⁷Olwohuba abaandu nibafwa, baba baboloolwe ohutula mu bunyala bw'esyonoono.

⁸Mani koti lu hwafwa alala neende Kristo, hufukiirira huti fwesi huchia ohuba abalamu alala nae.

⁹Olwohuba humanyire huti koti lu Kristo yasyuuhiswa ohutula mu bafu, haandi saachia hukobolamo ohufwa ehabi liindi daawe, ohufwa haba sihuchia ohunyala ohumutuka haandi.

¹⁰Mani sakira, koti lu yamala ohufwa, esyonoono simubulaho obunyala; haandi bulaanu obulamu bwaali nabwo buli alala neende Nasaae.

¹¹Mu ngeri nasilala, mwesi muhoyere ohwebaasaho koti abamala ohufwa hu bidiirana neende esyonoono, nae abalamu mu bulala neende Nasaae ohubitira mu Kristo Yesu.

¹²Mutakanya esyonoono haandi syaatuka emibiri kyeeng'we kifwa, mwoola ohuhola obwekoombi bwakyo bubi.

¹³Haandi mutakanyaanga ohuberesa esituundu syoosi sy'emibiri kyeeng'we eyiri esyonoono syasyehoonyera ohuhola ebichiiririrwa byasyo bibi. Ohutusaho, mweyaaneengeyo eyiri Nasaae, koti abo abamala ohutusibwa mu hufwa baaleetwa mu bulamu, haandi mweyaaneengeyo mweesi eyiri Nasaae, abehoonyere hulw'ebichiiririrwa biluungifu.

¹⁴Esyonoono sisihoyere ohubatuka haandi, olwohuba simuli mu bunyala bw'amalako, nae muli mu bunyala bw'embabaasi cha Nasaae.

¹⁵Bulaanu hunaahole hutye? Hwonoone olwohuba sihuli mu bunyala bw'amalako, nae huli mu bunyala bw'embabaasi cha Nasaae? Haba daawe!

¹⁶Mubwadyeeri mumanyire muti, nimweyaanayo abeene ohuba abawaambe bawulira omuundu, muba muli abawaambe b'omuundu yi muwulira oba abawaambe b'esyonoono sileeta ohufwa, oba obuwulisi obukera mwaaba abaluungifu neende Nasaae.

¹⁷Nae hweebase Nasaae! Olwohuba eng'we hale abali abawaambe b'esyonoono, mwawulira obwadyeeri buli mu njekesa yi mwanyoola, neende emyooyo kyeeng'we kyoosi.

¹⁸Mwaboololwa ohutula mu syonoono, mani mweehola abawaambe b'obuluungifu.

¹⁹(Ndehoonyera enomanoma ya buli ludaalo, hulw'obukata bweeng'we koti abaandu lu bamanyiramo.) Hale mwali nimweyaanayo abeene elalira ohuba abahalaabani b'obucheke neende mu hwonoona, hulw'ebichiiririrwa bibi. Mu ngeri nasilala, bulaanu muhoyeerwe ohweyaanayo abeene elalira ohuba abahalaabani b'obuluungifu hulw'ebichiiririrwa byoolerefu.

²⁰Nimwali nimuli abawaambe b'esyonoono, mwali nimwalehuulwa ohutula mu buluungifu.

²¹Mani ngaanga siina yi mwanyoola hulw'ohuholaanga ebiindu bibadiisa esoni esiha sino? Ebitula mu biindu ebyo hufwa hwoong'ene.

²²Nae bulaanu, mwaboololwa ohutula mu syonoono, mani muli abawaambe ba Nasaae! Engaanga yeeng'we niyo obulamu bw'ohweyaanirayo elalira eyiri Nasaae, mani esitulamo nisyo obulamu butaakama.

²³Olwohuba omusaara kw'esibi nikwo ohufwa; nae esiyaanwa sya Nasaae syebihaya nisyo obulamu butaakama alala neende Kristo Yesu Omwaami weefwe.