Read saamia Abarooma 8 Bible Online

Abarooma 8 - saamia bible

Abarooma 8

¹Mani bulaanu abaandu bali mu Kristo Yesu babulaho omusaango.

²Olwohuba elako lya Mwooyo, elituleetera obulamu efwe abali mu Kristo Yesu, lyamboolola ohutula mu lako ly'esyonoono neende ohufwa.

³Bi lako litanyala ohuhola hulw'obukata bw'omubiri, Nasaae nae yabihola. Yaheengera esyonoono siri mu mubiri kwaange omusaango kwaasihira, n'atuma Omwaana wae mudeerwa, oweecha neende efwaani y'omuundu muhola-mbi, hwaanyale ohusihirisa esyonoono.

⁴Nasaae yahola sino, hu buluungifu bu lako li daha, bunyale ohwoosereswa elalira mweefwe, abamenya ohuloondakana neende Mwooyo, ataali ohuloondakana neende obulamu bw'omubiri.

⁵Abo abamenya koti emibiri kyaabwe kidaha, bamalira ebibaaso byaabwe hu biindu by'omubiri. Nae abo abamenya koti lu Mwooyo adaha, bamalira ebibaaso byaabwe hu biindu bi Mwooyo adaha.

⁶Ohutukwa neende omubiri huleeta ohufwa; nae ohutukwa neende Mwooyo huleeta obulamu neende omuleembe.

⁷Sakira abaandu batukwa neende obwekoombi bw'omubiri beehola abasuku ba Nasaae; olwohuba haba sibawulira amalako ka Nasaae, haandi mubwadyeeri bweene haba sibakawulira.

⁸Abaandu bahola ebiindu bi mibiri kyaabwe kidaha, haba sibanyala ohusangaasa Nasaae.

⁹Nae eng'we, obulamu bweeng'we haba sibuloondakana neende bi mibiri kyeeng'we kidaha; nae obulamu bweeng'we buli koti lu Mwooyo adaha nibiri biti, Mwooyo wa Nasaae abalimo. Omuundu otaali neende Mwooyo wa Kristo mu bulamu bwae, oyo haba saaba ali owa Kristo.

¹⁰Nae Kristo naali mu bulamu bwao, ao Mwooyo aba ali obulamu bweeng'we; olwohuba mwamala ohuholwa ohuba abaluungifu neende Nasaae, kata syahaba siti, emibiri kyeeng'we kichia ohufwa hulw'esyonoono.

¹¹ Oba Mwooyo wa Nasaae, owasyuuhisa Yesu ohutula mu bafu ali mweeng'we, Nasaae oyo owasyuuhisa Yesu ohutula mu bafu, achia ohuberesa emibiri kyeeng'we chifwa obulamu ohweema hu Mwooyo obalimo.

¹²Sakira basyaange huli neende ekobi, elitaali ohuhola koti emibiri cheefwe chidaha huhole.

¹³Olwohuba nimumenya ohuloondakana neende bi mibiri kyeeng'we kidaha, muchia ohufwa; nae nimumenya koti lu Mwooyo adaha, ao muchia ohwiita ebihole byeeng'we bibi, mani mube abalamu.

¹⁴Abo abeemererwa neende Mwooyo wa Nasaae, baana ba Nasaae.

¹⁵ Olwohuba Mwooyo yi Nasaae yababeresa, saabahola ohuba ababoye mani yaakera mwaaba neende obuti, ohutusaho Mwooyo oyo, abahola abaana ba Nasaae, haandi amaani ka Mwooyo oyo, kakera mwalaanga Nasaae muti, “Abba! Laata!”

¹⁶Mwooyo wa Nasaae yeyambaania hu myooyo kyeefwe, ohweekesa ati huli abaana ba Nasaae.

¹⁷Mani koti lu huli abaana ba Nasaae, huchia ohunyoola ehabi chiyabiihira abaandu bae, mani fwesi huchia ohunyoola alala neende Kristo, esyo si Nasaae yamubiihira. Olwohuba efwe nihukabana hu husaanda hwa Kristo, ao fwesi huchia ohukabana hu luyaali lwae.

¹⁸Mbona endi, ohusaanda hweefwe hw'esiha sino, haba sihunyala ohukeraanisibwa daawe neende oluyaali lu huchia ohweekeswa.

¹⁹Ebiloonge byoosi biri neende amaofu ohubona koti lu Nasaae achia ohubwiihulira abaana bae.

²⁰ Olwohuba ebiloonge byaheengerwa omusaango ohufwiirwa esichiiririrwa syaabyo, ataali ohwedahisa hwaabyo byeene, nae olwohuba Nasaae yadaha sibe sityo. Kata katyo, esuubi liriwo

²¹liti, oludaalo luchia ohwoola ebiloonge byeene biboololwe ohutula mu buboye bw'ohubola, mani bikabane hu luyaali lw'obuboolole bw'abaana ba Nasaae.

²²Olwohuba humanyire huti, ohwoolera elalira hu biha bino, ebiloonge byoosi byekanyiirisa neende obuchuuni, koti obuchuuni bw'omuhasi olumwa n'adaha ohwiibula.

²³ Nae haba si biloonge byoong'ene ebiri ohwekanyiirisa; kata efwe abali neende Mwooyo koti ebiyaanwa bitaangira bya Nasaae, hweekanyiirisa mu myooyo kyeefwe abeene, nihuliindiriire Nasaae atuhole abaana bae haandi, mani anunule obulamu bweefwe bwoosi.

²⁴Olwohuba esuubi nilyo elyakera hwawonisibwa; nae nihubona bi husuubira, bulaanu elyo haba siriba esuubi lyeene. Olwohuba wiina mweene hweefwe osuubiraanga esiindu sy'abona?

²⁵Nae nihusuubira esiindu si hutabona, ao huba huchia ohusiliinda nihwesimiirise.

²⁶Mu ngeri nasilala eyo, Mwooyo yesi yeecha ohutuhoonya mu bukata bweefwe. Olwohuba haba sihumanyire engeri yi huhoyere ohusabiramo; Mwooyo mweene atusabira eyiri Nasaae mu hweekanyiirisa hutanyala ohutuumbulwa mu mboosi.

²⁷Nae Nasaae obona mu myooyo kyeefwe, amanyire ebibaaso bya Mwooyo koti lu biri; olwohuba Mwooyo asabira abaandu bae eyiri Nasaae ohuloondekana neende ohudaha hwae.

²⁸Humanyire huti mu biindu byoosi bi Nasaae ahola, achiiririsaanga esilai sy'abaandu bamuheera, abo ba yalaanga ohweema hu sichiiririrwa syae.

²⁹Abo ba Nasaae yaadoola, bosi yabaawula beehole koti Omwaana wae, ao hu Mwaana wae anyale ohuba omwiikula-nda w'abaana ba Nasaae baangi.

³⁰Mani sakira abo ba Nasaae yaawula, bosi yabalaanga; haandi abo ba yalaanga, yabahola ohuba abaluungifu nae, mani yaakabana nabo oluyaali lwae.

³¹Hunaboole siina hu biindu bino byoosi? Nasaae naali hu lwaande lweefwe, wiina mweene onyala ohutuyiingania?

³²Haba saanyala ohuba Nasaae, kata otakayira hu Mwaana wae mudeerwa, nae owamuwaayo hulweefwe fweesi! Yatuberesa Omwaana wae, mani haba saaba achia ohutuberesa ebiindu byoosi bihaya byeene?

³³Wiina ochia ohuta omusaango hu baandu ba Nasaae yadoola? Nasaae mweene aboola ati babula omusaango?

³⁴Nae wiina mweene ochia ohubataaho omusaango? Saanyala ohuba Kristo Yesu owafwa, oba owasyuuhiswa mu bulamu buyaaha, bulaanu owihaale hu muhono muluungi kwa Nasaae, n'atusabira eyiri Nasaae!

³⁵Mani wiina onyala ohutwawuhania neende obuheeri bwa Kristo? Husaanda nihwo, oba budinyu nibwo, oba hwiitwa nihwo, oba njala niyo, oba bumanani nibwo, oba masira niko, oba hufwa nihwo?

³⁶ Koti lu byandiiko byoolerefu biboola, “Hulwao, buli siha huli mu bidinyu by'ohufwa; huyirwa koti amakoondi kachia ohusiinjwa.”

³⁷Nae mu biindu bino byoosi hwamala ohuyiingira ohubitira mu oyo owatudaha!

³⁸Olwohuba manyire obwadyeeri bweene endi sibulao esiindu syoosi esinyala ohutwawuhania ohutula hu obuheeri bwa Kristo: Kata hwahaba ohufwa oba obulamu, kata bahaba bamalaika oba abatuki baandi bomu kulu oba amaani komu kulu, kata ebiindu by'esiha sino oba eby'esiha siicha,

³⁹kata syahaba esyaalo sy'aakulu, oba esya aasi, sibulao esiindu syoosi mu biloonge, esichia ohunyala ohutwawuhania syaatutusa hu obuheeri bwa Nasaae bu hwanyoola ohubitira mu Kristo Yesu Omwaami weefwe.