Read saamia 1 Abakoriito 12 Bible Online

1 Abakoriito 12 - saamia bible

1 Abakoriito 12

¹Bulaanu ebidiira hu biyaanwa bya Mwooyo, basyaange, haba siindaha mube abataboolerwa.

²Mumanyire muti nimwali nimusisiiri abakafiiri, mwahyaamisibwa mwachia eyiri ebiloongaloongwe byawumumala, kata nimuba nimwakoswa sa.

³Mani sakira ndaha mumanye muti, abulao omuundu yeesi oba naalomaloma nahoonyerwa neende Mwooyo wa Nasaae onyala ohuboola ati, “Yesu abwaabwe,” haandi abulao onyala ohuboola ati, “Yesu niye Omwaami” ohutusaho nahoonyerwe neende Mwooyo Mwoolerefu.

⁴ Bulaanu aliwo engeri enyiingi ech'ebiyaanwa, nae Mwooyo ali mulala obikaba;

⁵haandi aliwo engeri enyiingi ech'obuhalaabani, nae Omwaami ali mulala obukaba;

⁶haandi aliwo engeri enyiingi ech'obunyala buhola emirimo, nae ni Nasaae mulala oyo ota buli butula mu buli muundu.

⁷Buli muundu abereswaanga obunyala bwa Mwooyo ohumuholeramo hulw'obulai bw'abaandu boosi.

⁸Owuundi abereswa neende Mwooyo obunyala bw'ohukeraka eby'amakesi, nae owuundi obunyala bw'ohukeraka ebimanyibwa koti Mwooyo mweene oyo aba naadaha,

⁹owuundi nae efukiirira neende Mwooyo mweene oyo, owuundi nae abereswa ebiyaanwa by'ohuwonianga neende Mwooyo mweene oyo,

¹⁰owuundi nae obunyala bw'ohuholaanga eby'amayia, nae owuundi obuyaali bw'emboosi ya Nasaae, nae owuundi obunyala bw'ohwawuhania emyooyo kikabuhaane, nae owuundi obunyala bw'ohulomalomaanga enimi chitaali nasilala, nae owuundi obunyala bw'ohutuumbulaanga amahuluundu k'enimi.

¹¹Bino byoosi binyalirwaanga neende Mwooyo mulala mweene oyo, okabira buli muundu omweene koti lu aba n'adaha.

¹² Koti sa lu mubiri kuli mulala nae kuli neende ebituundu biingi, nae koti ebituundu by'omubiri okwo, kata koti lu biri ebiingi, biri omubiri mulala, nilwo koti lu biri kata neende Kristo.

¹³Olwohuba ohweema hu Mwooyo mulala, efwe fweesi hwabatiisibwa mu mubiri mulala, Abayudaaya, oba Abagiriki, abawaambe neende abalehuule haandi boosi banyalirwa ohung'wa hu Mwooyo mulala oyo.

¹⁴Olwohuba omubiri haba sikuli neende esituundu silala syoong'ene, nae kuli neende ebituundu biingi.

¹⁵Nikali mbwe ohukulu hunyala hwaboola huti, “Olwohuba ese haba siindi muhono, mani haba siindi hu mubiri,” esyo haba sisinyala hukuhola obutabaaho kata esituundu sy'omubiri okwo.

¹⁶Nae nikali mbwe ohutwi hwahanyalire ohuboola huti, “Olwohuba ese haba si ndi emoni, mani haba si ndi hu mubiri,” esyo haba sisinyala ohuhuhola obutabaaho kata esituundu sy'ohumubiri okwo.

¹⁷Nikali mbwe omubiri kwoosi kwahabeere nikuli emoni ndala, ohuwulira nahwo hwabeere huli yeena? Nikali mbwe omubiri kwoosi kwahabeere nikuli ohutwi hulala, obunyala bw'ohuwunyiirisa bwahabeere nibuli yeena?

¹⁸Nae koti lu siri, Nasaae yata ebituundu mu mubiri, buli situla, koti omweene yadoola.

¹⁹Nikali mbwe ebyo byoosi byali nibiri esituundu silala, omubiri nakwo mani kwahabeere nikuli yeena?

²⁰Koti lu siri, aliwo ebituundu ebiingi, nae kuli omubiri mulala.

²¹Emoni haba siyinyala ohuboolera omuhono yiti, “Sibulao siwahahoonya,” oba haandi omutwe ohuboolera ebiikala by'amakulu kuti, “Sibulao siwahahoonya.”

²²Nae oluundi siri mbwe, ebituundu by'omubiri ebibonehana koti ebitaali neende obuhoonyi, nibyo ebitahebwaabwa,

²³haandi ebituundu by'omubiri ebyo bi hubaasa huti biri neende oluyaali ludiidi, nibyo bihutaamo luyaali luhuluundu luhiramo, nae ebituundu by'efwe ebitahoyera nibyo bihudiira neende obutiiririrwa buhoongo muno,

²⁴bi bituundu byeefwe bitahoyera muno bi tadaha. Nae nasaae yambaania bulai bweene omubiri, n'aberesaanga oluyaali luhiramo, ebituundu bihira ohulekeereswa,

²⁵hu bulaanu atabaao obutawuliirisania mu mubiri, nae mbwe buli situundu sinyale ohuba neende ohuchuunirwa hwaakanirira eyiri esyaasye.

²⁶Nikali mbwe esituundu silala sichunisibwa, byoosi bichuunisibwa alala; nikali mbwe esituundu silala siberesebwa oluyaali, ebyaasye byoosi bisaangaalira alala nasyo.

²⁷Bulaanu muli omubiri kwa Kristo, buli muundu yeeng'ene ali esituundu syakwo.

²⁸ Mani Nasaae yamala ohudoola mu bafukiiriri ba Kristo, n'ataangira neende abatume, naloondyaho abanabbi, naloondyaho abeekesa, abawonia, abatuki, abalomalomi b'enimi ch'engeri chikabuhaane.

²⁹Boosi batume nibo? Boosi banaabi nibo? Boosi beekesa nibo? Mani boosi baholaanga amayia?

³⁰Mani boosi bali neende ebiyaanwa by'ohuwoniaanga? Mani boosi balomalomaanga mu nimi ngeni? Mani boosi batuumbulaanga amahuluundu?

³¹Nae mubwadyeeri bweene, mwekoombeenge ohuba neende ebiyaanwa by'aakulu. Haandi njia ohubeekesa haandi engira yihiramo obulai.