Read saamia 1 Abakoriito 13 Bible Online

1 Abakoriito 13 - saamia bible

1 Abakoriito 13

¹Niimba ninomanomaanga mu nimi ch'abaandu kata neende echa bamalaika, nae haba si ndi neende obuheeri, ese mba ndi sa koti edebe lihubba oluyoka oba endeke yichaangalya.

² Haandi niimba neende amaani k'ohutusaanga obunabbi, haandi neende ak'ohufumbulaanga eby'omuungiso byoosi haandi neende obumanyirifu bwoosi, haandi niimba neende efukiirira yoosi, eyinyala yaakera ndaanyalaanga ohwiyaka engulu, nae mbula obuheeri, mba ndi ebihaya.

³Niingaba ebiindu byoosi bi mba nabyo, haandi kata nindaayo omubiri kwaange kusaambwe, nae haba si ndi neende obuheeri, sibulao si nyoola.

⁴Obuheeri bwesimiirisaanga haandi bw'esisa nibwo; obuheeri haba sibw'esihali-hali oba ohweewulira;

⁵haba sibudyaabuhaanga haandi sibweetima. Obuheeri haba sibwiimanaanga; haba sibuchuunianga oba ohusinyiha lwaangu; haandi obuheeri haba sibubiihaanga amabi mu mwooyo;

⁶haba sibusaangaaliraanga esibi, nae busaangaaliraanga mu silai.

⁷Obuheeri bwesimiirisaanga ebiindu byoosi, bufukiiriraanga ebiindu byoosi, busuubiraanga ebiindu byoosi, buyiingiraanga ebiindu byoosi.

⁸Obuheeri haba sibwaakamaanga; amayaalo, kachia ohuwa; enimi, chichia ohwaakama; obumanyirifu, bucha ohuwa.

⁹Olwohuba obumanyirifu bweefwe haba sibuluungifu bweene, haandi amayaalo keefwe koosi haba simaluungifu keene;

¹⁰nae ebiluungifu byeene nibichia ohwiicha, ebitaali ebiluungifu bichia ohuwaao.

¹¹Nindali nisisiiri omuyere, ndalomalomaanga koti omwaana muyere, ndabaasaanga koti omwaana muyere, ndakerakaanga koti omwaana muyere; nae ni ndeehola omusaacha, ndaleha ebiindu by'oluyere.

¹²Olwohuba bulaanu, huli ohubonera mu monero amabuulyeesi, nae esiha esyo huchia ohubonana emoni-hu-moni. Bulaanu manyireho ebituundu; esiha esyo njia ohumanya mu bwiichufu, kata neende koti lu ndamala ohumanyihana mu bwiichufu.

¹³Sakira efukiirira, esuubi, obuheeri bidoong'a bidatu bityo; nae esihiramo obuhunuufu mu bino byoosi nisyo obuheeri.