Read saamia 1 Abakoriito 14 Bible Online

1 Abakoriito 14 - saamia bible

1 Abakoriito 14

¹Mweedinye muno ohubona muti muli neende obuheeri, haandi mwekoombere elalira ebiyaanwa bya mwooyo, ohuhirira elalira esiyaanwa sy'ohuyaalanga emboosi ya Nasaae.

²Olwohuba oyo olomaloma mu nimi, haba saalomalomera abaandu nae Nasaae; olwohuba abulao omuundu oba naamuwulira, nae aba atuumbula sa eby'omuungiso byomu Mwooyo.

³Nae ebuleka yiindi, oyo oyaala emboosi ya Nasaae, aba alomalomera abaandu hu banyale ohuhula, ohwoombahwa, neende ohulemesebwa emyooyo.

⁴Oyo olomaloma mu lulimi luundi aba yehoonya omweene, nae oyo oyaala emboosi ya Nasaae aba ahoonya omukaanda kw'abafukiiriri kwoosi.

⁵Bulaanu ese ndaha eng'we mulomalome mu nimi, nae ndahadahire ohuhirao muyaaleenge emboosi ya Nasaae. Oyo oyaala emboosi ya Nasaae muhunuufu muno ohuhira oyo olomaloma mu nimi, ohutusaho omuundu wuundi naaba n'aliwo onyala ohutuumbula amahuluundu k'enimi chana, hu bafukiiriri banyale ohuhoonywa.

⁶Bulaanu, basyaange, niinjicha yi muli ninomanoma mu nimi, mba njia ohubahoonya endye, ohutusaho niimba nimbaleetera ohubwiihulirwa oba obumanyirifu oba amayaalo, oba ameeko?

⁷Kata ebihubba bitaalimo obulamu, koti elere oba endoongo, nibitatusa amakono kawuliirihana, omuundu yahamanya atye esiba nisiri ohuubbwa?

⁸Nae ehoombi niyitusa ekono litawuliirihana bulai, naanu mweene oba achia ohweetekehera ebiita?

⁹Sakira kata mwesi; nimuba nimulomaloma enimi echitaamanyihaane, omuundu aba achia ohumanya atye esiba nisiboolerwe? Olwohuba muba muchia ohuba sa koti abalomalomera emiyaka.

¹⁰Ataali ohukana-kana aliwo enimi enyiingi mu syaalo, nae abulao olutaalimo amahuluundu;

¹¹nae niimba nitaamanyire amahuluundu ak'olulimi lwoosi, mba njia ohuba omukeni eyiri omulomalomi, haandi omulomalomi oyo aba achia ohuba omukeni yi ndi.

¹²Sakira kata mwesi; koti lu muli neende amaofu ohubona ebihole bya Mwooyo, mulwaanirire ohwemeeda mu hwoombaha abafukiiriri.

¹³Sakira, oyo olomaloma mu lulimi lukeni, ahoyere ohulaama Nasaae yaamuba amaani k'ohutuumbula amahuluundu kabyo.

¹⁴Olwohuba ninaama mu lulimi lukeni olwo, omwooyo kwaange nikwo okuba nikulaama, nae ebibaaso byaange haba sibiba biri neende obuhoonyi bwoosi.

¹⁵Siina syeene si mba hole? Njia ohulaama neende omwooyo, haandi njia ohulaama neende ebibaaso byosi; njia ohweemba neende omwooyo, haandi njia ohweemba neende ebibaaso byosi.

¹⁶Ataali ao, nooba niweebasa Nasaae neende omwooyo, omuundu oba naali mu bweyaango bw'omuundu werwanyi, aba achia ohuboola ati, “Amiina” hu esaala y'ohweebasa hwao naaba nataamanyire byooba n'oboolaanga?

¹⁷Olwohuba onyala ohuba niweebasire Nasaae bulai muno, nae omuundu wuundi oyo haba saaba nahoonyiibwe.

¹⁸Ese ndeebasa Nasaae endi nomanomaanga mu nimi ohuhira eng'we mweesi;

¹⁹kata katyo, mu bafukiiriri, sihirira ohulomaloma kata emboosi chitaanu choong'ene mu bibaaso, hu nyale ohukolola abaandi, ohuhira emboosi elifu ehumi mu lulimi lutaamanyihaane.

²⁰Basyaange, mutaba abayere mu hubaasa hweeng'we; mube abadoto mu bibi, nae mu hubaasa, mube abaangafu.

²¹ Syandiikwa mu malako ka Musa siti, “Omwaami aboola ati, nindehoonyera abaandu b'enimi ngeni, haandi nindehoonyera eminwa ky'abakeni, njia ohulomalomera abaandu bano, nae haandi kata katyo, sibachia ohundekeeresa.”

²²Sakira, enimi nicho ahalolero eyitaali abafukiirira nae eyiri abatafukiirira, nae ohuyaala emboosi ya Nasaae sihuli hutyo eyiri abatafukiirira, nae eyiri abafukiirira.

²³Mani, nikali mbwe abafukiiriri boosi nibebuusa mani boosi balomalomaanga mu nimi, nae abaandu b'erwaanyi oba abataali abafukiiriri beengira, haba sibaba bachia ohuboola bati muli abalalu?

²⁴Nae boosi nibaba nibayaala, nae omuundu otaali omufukiiriri oba omuundu w'erwaanyi yeengira, aba achia ohweekeswa omusaango kwae neende abaandu abo boosi, aba achia ohuhubbirisibwa neende abaandu abo boosi,

²⁵eby'omuungiso byomu mwooyo kwae biba bicha ohukisulwa; mani bikere, akwiire aasi obweeni bwae, nalaama Nasaae haandi n'aboola ati hane Nasaae abalimo.

²⁶Mani siina syeene siindi ohuboolaanga, basyaange? Nimuba nimwebuusire, omuundu wuundi abecheenge neende olweembo, owuundi neende esomo, owuundi ohubwiihulirwao, owuundi olulimi, oba ohweekesa amahuluundu. Muleheenge buli siindu siholwa hulw'ohwoombaha abafukiiriri.

²⁷Nikali mbwe owuundi alomaloma mu lulimi lukeni, muleheenge abaao abaandu babiri, oba abatabita badatu, haandi buli muundu amaleenge huyekulira owaasye; haandi muleheenge abaao omuundu wuundi otuumbula amahuluundu k'olulimi olwo.

²⁸Nae naaba n'abulao omuundu oba naanyala ohutuumbula amahuluundu keene ako, muleheenge boosi bawuleera sa nibali mu bafukiiriri, mani beelomalomeraanga buli otula omweene, neende Nasaae wae.

²⁹Leheenge abayaali babiri kata badatu balomalomaanga, mani abaandi badoong'a nibakeraania buli siba nisiboolerwe.

³⁰Nikali mbwe ohubwiihulirwa hwoola hu muundu wuundi oba niyehaale aambi ao, muleheenge oba nataangiire awuleera mberi.

³¹Olwohuba mweesi munyala ohuyalaanga sya mulala-mulala, hu baandu boosi banyale ohweeka mani boosi bagumisibwa;

³²mani emyooyo ky'abayaali chihoyere ohutukwaanga neende abayaali beene.

³³Olwohuba Nasaae haba si Nasaae ow'ohutabuhana, ataali ni Nasaae w'omuleembe. Koti lu siri mu mikaanda ky'abafukiiriri kyoosi,

³⁴abahasi bahoyere ohuwuleeraanga nibali mu mihung'aano ky'abafukiiriri. Olwohuba haba sibafukiirirwa ohulomalomaanga, nae bahoyere ohuba abawulisi, koti sa lu malako ka Musa kaboola.

³⁵Nikali mbwe aliwo esiindu syoosi sibadaha ohumanya, muleheenge bachia bateebera bawamwaabwe engo. Olwohuba sy'esoni omuhasi ohulomalomaanga mu muhung'aano kw'abafukiiriri.

³⁶Siina syeene? Mani emboosi ya Nasaae yachaakira mweeng'we, oba ning'we mweng'ene bayoolaho?

³⁷Nikali mbwe omuundu yeesi abaasa ati ali omuyaali, oba yeechula Mwooyo, ahoyere ohwomiisa ati, si ndi ohubaandiikira sino n'elako ly'Omwaami.

³⁸Nikali mbwe omuundu yeesi haba saamanyire sino, mani haba yesi saamanyihaane daawe.

³⁹Mani, basyaange, mwahekoombere bulai bweene ohuyaala, nihaandi mutakayiraanga ohulomalomaanga mu nimi ngeni;

⁴⁰nae buli siindu sihoyere ohuholwaanga neende esiroonyo haandi mu ndekeha ndai.