Read saamia 1 Abakoriito 15 Bible Online

1 Abakoriito 15 - saamia bible

1 Abakoriito 15

¹Bulaanu njia ohubeechulisa basyaange, engeri siina yi mbayaalirangamo emboosi ndai, yi mwanyoola, yi mweemeremo,

²eyibawonia, nikali mbwe muyidiira mwayomiisa ohutusaho nikali mbwe ohufukiirira hweeng'we hubulamo esifune.

³ Olwohuba ndabaleetera koti esihuluundu sihiramo byoosi, esyo si syesi ndanyoola, esiri mbwe, Kristo yafwiira ebyonoono byeefwe ohweema koti lu byandiiko byoolerefu biboola,

⁴biti yasiihwa, biti yasyuhisibwa hu ludaalo lwohudatu ohweema koti lu byandiiko byoolerefu biboola,

⁵ haandi biti yabonehera Keefa, neende ehumi-na-babiri bala.

⁶Haandi yaabonehera abafukiiriri babita emia chitaanu ehabi lala, abahira obuungi hu bo basisiiri abalamu, kata neende abaandi nibamala ohufwa.

⁷Haandi yabonehera Yakobbo, neende abatume boosi.

⁸ Olumaliiriha lweene, koti eyiri oyo oteebulwa koti abaandi beebulwaanga, syesi yambonehera.

⁹ Olwohuba ese niise ohiramo obudiidi oluyaali, otahoyera kata ohulaangwa omutume, olwohuba ndasaandyaanga abafukiiriri ba Nasaae.

¹⁰Nae hulw'embabaasi cha Nasaae, mbano ndi koti lu ndi, haandi embabaasi chae echo eyiri ese haba sichali echeebihaya. Ebuleka yiindi, ndahalaabana muno ohuhira abo boosi, kata neende nitaali ese omweene, nae embabaasi cha Nasaae chi ndi nacho.

¹¹Kata neende nindali ese oba abeene abo, huyaala hutyo, haandi mwesi mufukiirira mutyo.

¹²Bulaanu nikali mbwe Kristo ayaalwa koti oyo owasyuuhisibwa ohutula mu bafu, omuundu wuundi nae anyala atye ohuboola ati, abulao ohusyuuha hw'abafu?

¹³Nae nikali mbwe abulao ohusyuuha hw'abafu, mani kali mbwe Kristo haba siyasyuuhisibwa;

¹⁴nae nikali mbwe Kristo haba siyasyuhisibwa, mani kali mbwe ohuyaala hweefwe hw'ebihaya, haandi efukiirira yeng'we yosi y'ebihaya.

¹⁵Huba hunyoolehana nihutahihirira Nasaae bulai, olwohuba hweekesaanga huti Nasaae niye owasyuuhisa Kristo, yaatasyuusa nikali mbwe bwadyeeri mbwe abafu haba sibasyuuhisibwa.

¹⁶Olwohuba nikali mbwe abafu haba sibasyuuhisibwa, mani kali mbwe Kristo haba siyasyuhisibwa.

¹⁷Nikali mbwe Kristo haba siyasyuhisibwa, efukiirira yeeng'we yiba yibula obuhoonyi, mani musisiiri mu bibi byeeng'we.

¹⁸Mani abo bosi abamala ohufwa nibali mu Kristo baba basihirira sa.

¹⁹Nikali mbwe ni hulw'obulamu buno bwoong'ene nilwo lu hwasuubiriraho Kristo, mani mu baandu boosi niifwe abo abahoyere ohusaasirwa muno.

²⁰Nae mubwadyeeri bweene, Kristo yasyuuhisibwa ohutula mu bafu, ohuba ebyaamo bitaangira eby'abo abamala ohufwa.

²¹Olwohuba koti lu hubitira mu muundu ohufwa hweecha, haandi ohubitira mu muundu ohusyuuha ohw'abafu, hwosi hwamala ohwiicha.

²²Olwohuba koti mu Adamu abaandu boosi bafwa, mani lwosi mu Kristo, abaandu boosi balamusibwa.

²³Nae buli muundu ohweema hu hutekeherwa hwae: Kristo ebyaamo bitaangira, mani hulw'ohwiichira hwae, baloondeho aba Kristo.

²⁴Mani enjakamo huyaheeche, niyahabe n'adiisa obwaami eyiri Nasaae Omuloongi n'amalire ohusihirisa buli butuki haandi neende buli bunyala neende amaani.

²⁵ Olwohuba ahoyere ohutuka ohwoola lwaalimala ohuta abasuku bae boosi aasi w'amakulu kae.

²⁶Omusuku olimaliirihayo ohusihiriswa niye efwa.

²⁷ “Olwohuba Nasaae yamala ohuta ebiindu byoosi aasi w'obunyala bwae mu makulu kae.” Nae nikaboolwa kati, “Ebiindu byoosi bicha ohuteebwa aasi w'obunyala bwae,” siba siboneha alafu mbwe omweene aba saali silala hu biindu biba nibichia oteebwa aasi wae.

²⁸Ebiindu byoosi nibimalire ohuteebwa aasi w'obunyala bwae, ao niwo yi mwaana mweene yesi achia ohuteebwa aasi w'obunyala bwae oyo oba niyata ebiindu byoosi aasi wae, hu bulaanu Nasaae anyale ohutukira elalira buli siindu.

²⁹Ataali ao, abaandu baba nibeekesaanga siina nibabatiisibwa hulw'abafwa? Nikali mbwe abafwa haba sibasyuuhiswaho kata, lwasiina abaandu babatiisibwaanga hulwaabwe?

³⁰Lwasiina ese mweene ndi mu luumbe buli siha?

³¹Ese nyiingana, basyaange, neende esuunga yaange mweeng'we, yi ndi nayo mu Kristo Yesu Omwaami weefwe, fwa sa buli ludaalo!

³² Siina syeene si mba ninyoola, mu hulomaloma hwa buli ludaalo, ndalwaana neende esolo njalaba muno mu Buwefeeso? Nikali mbwe abafu haba sibasyuuhiswa, “Mulehe hweliire, haandi hweeng'weere, olwohuba muchuli huchia ohufwa.”

³³Mutabachwaanga: “Emikaanda mibi kinyaasanga ebiima bilai.”

³⁴Mukobolemo amakesi, mani muhaye ohwonoona haandi. Olwohuba abaandi mweeng'we haba sibamanyireho Nasaae. Mboola sino ohubayaambia esoni.

³⁵Nae omuundu wuundi anyala ohuteeba ati, “Abafu basyuhisibwaanga batye? Basyuhisibwaanga neende omubiri kwa ngeri siina?”

³⁶Omusiru ewe! Esiindu syotaaka, haba sisimeraanga ohwoola lu sifwa.

³⁷Haandi esiindu syotaaka haba sinikwo omubiri kumeraanga, nae n'olumwo lwoong'ene, awuundi olwengaano oba olw'emere yiindi.

³⁸Nae Nasaae yaaluba omubiri koti lu omweene yeenya, haandi hu buli ngeri y'olumwo, omubiri kwalwo kweene.

³⁹Olwohuba enyama choosi haba sichifwaanana, nae yiriwo ndala ey'abaandu, eyiindi ey'ebisolo, eyiindi ey'amayoni, nae eyiindi ey'eng'eeni.

⁴⁰Aliwo emibiri kyo Muukulu, haandi aliwo emibiri kyohu syaalo; nae oluyaali lw'emibiri kyo Muukulu lukabuhaane neende olw'emibiri kyohu syaalo.

⁴¹Aliwo oluyaali lw'elyuuba, haandi neende oluyaali luundi olw'omwoosi, haandi oluyaali luundi olw'eng'ining'ini; olwohuba buli ng'ining'ini yikabuhaane neende eyaasye mu luyaali.

⁴²Mani syosi siri sityo neende ohusyuuha hw'abafu. Esitaakwa sisihirira, nae esyo esisyuuhisibwa haba sisinyaasiha.

⁴³Sitaakwa nisilekeereeswe, nae sisyuuhisirwa mu luyaali. Sitaakirwa mu budehere, nae sisyuuhisirwa mu maani.

⁴⁴Sitaakwa nisiri omubiri kuboneha, nae sisyuuhisibwa nisiri omubiri kwa mwooyo. Nikali mbwe kuliwo omubiri kubonehana, mani haandi kuliwo omubiri kwa omwooyo.

⁴⁵ Mani sakira syandiikwa siti, “Adamu omuundu wataangira yeehola esiindu silamu”; Adamu wamaliirihayo, yeehola mwooyo okaba obulamu.

⁴⁶Nae haba esy'omwooyo sinisyo esitaangira, nae esibonehana nisyo esitaangira, mani hu sy'omwooyo syaaloondaho.

⁴⁷Omuundu wataangira yatula mu loba, omuundu otula mu lufu; omuundu wohubiri nae atula Muukulu.

⁴⁸Koti lu muundu w'olufu yali, nilwo lu abo abatula mu lufu bali; haandi koti muundu wo muukulu ali, nilwo lu abo abomu Kulu bali.

⁴⁹Koti sa lu hwanyoola esifwaanani sy'omuundu w'olufu, huchia haandi ohunyoola esifwaanani sy'omuundu wo Muukulu.

⁵⁰Mbaboolera sino, basyaange: enyama neende amabaanga haba sibinyala ohunyoola obwaami bwa Nasaae, kata ebiindu bisihirira byosi sibinyala ohunyoola ebitasihirira.

⁵¹ Eee, mutekeerese mbaboolere esyaama. Fweesi haba sihuchia ohufwa, nae fweesi huchia ohukaluuhanisibwa,

⁵²mu siha sidiidi muno, koti mu hukwiisa emoni, hu huubbwa hw'eturumbete humaliirihayo. Olwohuba eturumbete yichia ohuubba, mani abafu bachia ohusyuuhisibwa, bahae ohufwaaho haandi, mani hu fweesi hukaluuhanisibwe.

⁵³Olwohuba obulamu bweefwe bwaakama buno, buhoyere ohwefwaala obutaakama, haandi emibiri kyeefwe kifwa kino, kihoyere ohwefwaala obutafwa.

⁵⁴ Ohunyaasiha nihumala hwafwaala ohutanyaasiha, haandi mani ohuwaao hwaamala hwefwaala ohutawaao, ao niwo aliba ohwoolerera ohw'enomanoma yaandiikwa yiti: “Ohufwa humirirwe mu huyiingira.”

⁵⁵ “Aaa ewe ohufwa, ohuyiingira hwao huli yeena? Aaa ewe ohufwa, obuluungu bwao buli yeena?”

⁵⁶Obuchuuni bw'ohufwa buli mu syonoono, haandi amaani k'esyonoono kali mu malako ka Musa.

⁵⁷Nae Nasaae atyo muno, oyo otuberesaanga obuyiingiri ohubitira mu Omwaami weefwe Yesu Kristo.

⁵⁸Mani sakira, basyaange baheerwa, mube abomiifu, abatadeengaanisibwa, buli siha nimuhayiire hu mulimo kw'Omwaami, nimumanyire muti mu Omwaami oyo, obuhalaabani bweeng'we haba sibwebihaya daawe.