Read saamia 1 Abakoriito 16 Bible Online

1 Abakoriito 16 - saamia bible

1 Abakoriito 16

¹ Bulaanu ebidiira hubisoloserwa aboolerefu: koti lu ndaboolera abafukiiriri bali mu Galatia, nilwo lu mwesi muhoyere ohuhola.

²Hu ludaalo lutaangira mu juma, buli mulala hweeng'we ahoyere ohukabulaanga esiindu endulo, mani asibiiha, koti lu mweene aba nanyaliirwe, hu bulaanu yihaye ohubaao ohusolosa niimba nimalire ohwiicha eyo.

³Mani nindahoole, ndahatume abo bamusiima neende ebbarwa ohukiinga ebiyaanwa byeeng'we babiyire Yerusalemu.

⁴Nisiicha syabonehana ohuba esy'amakesi endi syesi njiireho, baba bachia ohuchia naange.

⁵ Njia ohubakeniya nimalire ohuhalakania Makedonia, olwohuba suubira ohuhalakania mu Makedonia,

⁶mani awuundi njihaleho naang'we oba awuundi male hooyo etoocho yoosi, hu munyale ohuuhoonya nyanguyeho mu lukeendo lwaange, yoosi yi mba njia ohuchichaanga.

⁷Olwohuba siindaha ohubabonaho sa mabita; Suubira ohubaaho naang'we hulw'esiha sileeyi hooho, Omwaami naakanya.

⁸ Nae njia ohwiihala mu Efeso ohwoola hu Pentekosti,

⁹olwohuba omulyaango mutabaafu kumalire ohunjikulirwao ohuhola omulimo kw'amaani, haandi baliyo abaanyiingania abaangi.

¹⁰ Timoteo niyeecha, mubonaanga muti mumuliinda bulai, olwohuba ali ohuhola omulimo kw'Omwaami koti lu ndi ohuhola.

¹¹Mani mumanyaanga omuundu yeesi atamulekeeresaho daawe. Mumwanguyaangaho hu lukeendo lwae mu muleembe, hwaanyale ohukobola eno yi ndi; olwohuba mwesuubire ohwiicha neende abafukiiriri baasye.

¹²Nae ohuloondana neende omusyaani weefwe Apolo, ndahamwekweeda amahabi maangi muno endi abakeniiyeho neende abasyeefwe baandi, nae omweene haba saaliho omwaangu ohwiicha eyo bulaanu kata budiidi. Achia ohwiicha naanaabe n'anyoolere obweyaango.

¹³Mube meeso, mweeme mwomiire mu fukiirira yeeng'we, mube abagumu, mube ab'amaani.

¹⁴Mulehe ebyo byoosi bi muba nimuhola biholerweenge mu buheeri.

¹⁵ Bulaanu, basyaange, mumanyire muti edaala lya Sitefaana nilyo elyataangira ohukaluuhanira Omwaami mu Akaya, mani lyeyanaayo muno ohuhalaabanira aboolerefu;

¹⁶Mbekweeda endi mwiiseenge oluyaali mu baandu bafwaana batyo, haandi buli muhalaabani neende omuhalaabani waasyeng'we.

¹⁷Sangaaliire ohwiicha hwa Sitefaana neende Fotunaato neende Akaiko, olwohuba bachia ohwiichusa ohutabaao hweeng'we;

¹⁸olwohuba bajoong'olosa omwooyo kwaange haandi neende okweeng'we. Mwiichulisaanga abaandu bafwaana batyo.

¹⁹ Abafukiiriri bali mu Asia babatumira amaheeso. Akwiila neende Purisiila, alala neende abafukiiriri bali mu daala lyaabwe, babatumira amaheeso komu mwooyo bweene mu Omwaami.

²⁰Abasyeefwe bali eno boosi babatumira amaheeso. Heesanie neende ohukwiichana mu birifu hwoolerefu.

²¹Ese, Paulo, nyandiika ohuheesa huno neende omuhono kwaange kweene.

²²Nikali mbwe abaao omuundu yeesi otaheera Omwaami, aba ahoyere ohubwaabwa. Omwaami weefwe yicha!

²³Embabaasi ch'Omwaami Yesu chibe naang'we.

²⁴Obuheeri bwaange bube naang'we mweesi mu Kristo Yesu. Amiina.