Read saamia 1 Abakoriito 4 Bible Online

1 Abakoriito 4 - saamia bible

1 Abakoriito 4

¹Yino niyo engeri yi muundu yeesi ahoyere ohubaasiramo: Huli abahalaabani ba Kristo, haandi ababiihi b'ebyaama bya Nasaae.

²Nae haandi kali mbwe syeenyeha siti, buli mubiihi yeesi ahoyere ohunyoolehana naali owesikiha.

³Nae ese hulwaange, n'esiindu esidiidi muno ohubona mbwe ndi ohuhalakirwa omusaango naang'we, oba neende esiina sy'abaandu sa. Kata omweene haba siinyala ohwehalakira omusaango.

⁴Ese haba siimanyire esiindu syoosi esinjooma haba daawe, nae kata katyo sisyeekesa mbwe ohweema hu esyo, haba siinyala ohuba omulehuule daawe. Omwaami mweene niye oli neende obunyala bw'ohuhalakira omusaango.

⁵Sakira mutateemaho ohwetuliirisa ohuheengera omuundu omusaango esiha nisisisiiri ohwoola, Omwaami natoola ohwiicha, oyo ochia ohuleeta mu bulafu ebiindu byakiswa mu siirima, haandi ochia ohutuumbula ebibaaso biri mu myooyo ky'abaandu byoosi. Ao niwo yi buli muundu yeesi achia ohunyoolera si ahoyera ohunyoola ohutula eyiri Nasaae.

⁶Ese mbao ningaasire ebiindu bino byoosi eyiri ese omweene neende eyiri Apolo hulw'obulai bweeng'we, baana beefwe, hu mweemeo munyale ohweeka nimutuboneraho efwe mutanyala ohuchalaaliha mwaabita ebyo ebyandiikwa byoong'ene, hu bulaanu abuleo mweeng'we omuundu yeesi onyala ohufwiimbikitana niyechuule ohukwiira mulala yeeng'ene ohuhiraho owuundi.

⁷Olwohuba ni naanu mweene oli neende obunyala bw'ohubona esiindu syoosi esikeni mweeng'we? Siina syeene si muli nasyo si mutaberesebwa? Nikali mani mbwe mwabereswa, lwasiina muli ohweniinia koti lu sitaali esiyaanwa syebihaya yi muli?

⁸Mbao hane mwamala ohwiikuta! Mbao hane mwamala ohweehola abayiinda! Kata efwe nihusisiiri, nae eng'we mbao mwamala ohweehola abatuki! Mani muhoya mwaaba nimuli neende ohutuka, hu fwesi hwanyala ohukabanira alala naang'we obutuki obwo!

⁹Olwohuba ese ndi ohubaasa endi, Nasaae yamala ohutuhola efwe abatume hwafwaana koti abamaliirihayo mu baandu boosi, haandi koti abaandu bamala ohuheengerwa omusaango kw'ohufwa; olwohuba hwamala ohweehola esyohuboneraho eyiri esyaalo, eyiri malaika neende eyiri abaandu.

¹⁰Efwe huli koti abasiru hulwa Kristo, nae eng'we mweehola abakesi mu Kristo. Efwe huli koti abakata, nae eng'we muli ab'amaani. Eng'we mwanyoola oluyaali, nae efwe hwalekeereswa.

¹¹Ohwoola bulaanu buti, efwe huwoonga enjala haandi hulumwa obuluwo, hwefwaala sa ebicheere, hutoochwa, haandi hwaahaywa ohuba neende amadaala,

¹² haandi hudidiihana neende emirimo, nihwehoonyera amahono keefwe keene kano. Nihubwaabwa, efwe husabira ehabi; nihusaandisibwa, efwe hweesimiirisa sa;

¹³nihunyekwa, efwe hweduuduyia sa mu makaluso keefwe; humalire ohweehola, nihaandi mbao bulaanu huli, koti ebikoha hu syaalo, ebiindu bihira ohusyuulibwa.

¹⁴Ese haba si ndi ohwandiika bino endyo mbwe hu nyale ohubadiisa esoni, nae ohubeekesa koti ndaheekesa abaana baange baheerwa muno.

¹⁵Olwohuba amwahaba mbwe muli neende abakeraki abatabaliha mu Kristo, haba simuli neende balaata yeeng'we abaangi daawe. Olwohuba ese ndeehola hale seeng'we mu Kristo Yesu ohubitira mu mboosi ndai.

¹⁶ Mani ese ndi ohubekweeda endi mubonere hweese.

¹⁷Mani sakira ese ndatuma Timoteo, omuheerwa waange muno haandi omwaana waange mweesikwa muno mu Omwaami, ohubeechulisa koti obulamu bwaange bufwaana mu Kristo, koti mbasomesaanga buli yi njiira mu buli mukaanda kw'abafukiiriri.

¹⁸Abaandu baandi hweeng'we beeholere ab'esuunga, oti fwaana ese haba simbeere ninjia ohwiicha yi muli daawe.

¹⁹Nae mbao ndi ohwiicha eyo bwaangu, Omwaami naakanya, mani hu haye ohubonera enomanoma neende amaani k'abaandu b'esuunga abo.

²⁰Olwohuba obwaami bwa Nasaae haba sibuboneheraanga mu hulomaloma sa nae mu maani.

²¹Siina syeene si mudaha? Mudaha njiche yi muli neende olubbariki, kose neende obuheeri mu mwooyo kw'obuloonga sa?