Read saamia 1 Abakoriito 5 Bible Online

1 Abakoriito 5 - saamia bible

1 Abakoriito 5

¹ Mubwadyeeri bweene biri ohweeboola mbwe aliwo esifwaabi mweeng'we, haandi esyeengeri kata eyitanyala ohunyoolehanaho neende mu bakafiiri beene; mbwe bi musaacha akona sa omuhasi wa laatang'ene.

²Nihaandi mubulaho kata esoni! Eng'we haba simwahahoyeere ohuba nimulira bulira hulw'esifwaabi sino? Mulehe oyo owahola sino yeerusibwe ohutula mweeng'we.

³Olwohuba andahaba mbwe si ndi alala naang'we mu mubiri, nae ndi alala naang'we mu mwooyo, haandi sa koti lu ndahaholere ni nduwo, malire ohutuumbula eheengao yaange

⁴mu liita ly'Omwaami Yesu eyiri omusaacha oyo owahola esiindu sifwaana sityo. Mani nimunaba nimuhung'aanire alala, omwooyo kwaange kwosi nikuli alala naang'we, nikuli neende amaani k'Omwaami weefwe Yesu,

⁵muhoyere mwebwaabe omusaacha oyo achie eyiri Sitaani anyale ohusihiriswa omubiri kwae hu mwooyo kwae kunyale ohuwonisibwa hu ludaalo lw'Omwaami Yesu.

⁶Ohweniinia hweeng'we ohwo, haba sinohulayi daawe. Eng'we haba simumanyire muti, otumera tudiidi sa tunyala twabbaaha esiniho siingi?

⁷ Mweetusemo emera hale, hu mweemeo munyale ohuba esiniho siyaaha, koti lu muli abataali ababbaahe. Olwohuba Kristo, ekoondi lyeefwe lya Paasaka, lyamala ohuyaanwa.

⁸ Mani mulehe efwe hweliire esidyaalo, nihutaali neende emera hale, emera y'ehiinda neende obubi, nae neende omugaati kutabbaahirwe okw'obuluungifu neende obwadyeeri.

⁹Ese ndabaandiikira hale mu bbarwa yaange endi mutaholeraanga alala neende abaandu b'esifwaabi daawe;

¹⁰nae nimboola endyo sindaliho hu baandu b'omufuto bomu syaalo muno, oba ab'okuliira neende abanyaka, oba ab'emisaambwa, hulwohuba nibyahabeere bityo biba byahabadahiise ohutulira elalira mu syaalo muno.

¹¹Nae kata katyo, ese ndabaandiikira hale endyo obutaholeganaangaho neende oyo yeesi owelaanga ohuba mulala hweefwe, nikali mbwe anyoolehaane ohuba neende omufuto oba okuliira, oba naaba naali ow'emisaambwa, oba omuchalaasi, omumeesi, oba omunyaka kata obutalichaangaho neende omuundu ofwaana atyo daawe.

¹² Olwohuba si mulimo kwaange ohuheengera omusaango abo abali erwaanyi. Mani simubaasa muti naabo ababa nibali mu Kristo nibo booba ohoyere ohuheengera omusaango?

¹³Nasaae niye oheengeraanga abo abali erwaanyi omusaango. “Mwiirusire elalira ow'esifwaabi oyo abatulemo.”