Read saamia 1 Abakoriito 7 Bible Online

1 Abakoriito 7 - saamia bible

1 Abakoriito 7

¹Bulaanu ebidiira hu biindu bi mwanyandiikira. Silai omusaacha obutadeehya.

²Nae ohweema hu siteemo sy'obuyirani, buli musaacha ahoyere ohuba neende omuhasi wae haandi buli muhasi yesi ohoyere ohuba neende omusaacha wae.

³Omusaacha ahoyere ohwooseresaanga omulimo kwae kw'esisaacha eyiri omuhasi wae haandi nilwo nasilala lu muhasi yesi ahoyere ohwooseresaanga omulimo kwae kw'esihasi eyiri omusaacha wae.

⁴Olwohuba omuhasi haba saali neende obunyala hu mubiri kwae omweene, nae omusaacha wae niye okutuka; haandi nilwo nasilala, lu musaacha yesi ataali neende obunyala hu mubiri kwae omweene, nae omuhasi wae niye okutuka.

⁵Abadeehisania, muteemanaanga abeene-na-beene daawe, ohutusaho awuundi abeene nimufukiirisaanie hulw'esiha sidiidi sa, hu munyale abeene ohunyoola esiha sy'ohulaama; nae nimumalire, mukobolaneengeho haandi, ataali ao, Sitaani anyala ohubateema hulw'ohutaba neende amaani k'ohweliinda abeene.

⁶Mboola endyo ninjoomere ohubeekesa sa, ataali ohubaberesa elako.

⁷Ndahekoombere ohubona endi abaandu boosi bali sa koti lu ndi. Nae buli muundu ali neende esiyaanwa syae sikabuhaane ohutula eyiri Nasaae, owuundi aba neende esy'engeri ndala, nae owuundi yaaba neende esy'engeri yiindi.

⁸Eyiri abasisiiri ohudeehisania, neende abahasi bafwiirwe, mboola endi, syahabeere esilai badoong'e boong'ene koti sa lu ndi.

⁹Nae nibatanyala ohweliinda abeene, bahoyere ohudeeha. Olwohuba silai muno ohudeeha ohuhira ohunyaahana neende obwekoombi bw'omubiri.

¹⁰ Eyiri abadeehisania, haba siniise obaberesa elako, nae niye Omwaami mweene obaberesa, mbwe omuhasi haba s'ahoyeere ohuloba omusaacha wae,

¹¹(nae niwiichuhira yaaloba wamwe, lehe adoong'e yeeng'ene ataali ao, lehe akobole eyiri wamwe oyo) haandi omusaacha ateerusaanga omuhasi wae.

¹²Eyiri badoong'ereyo, ese ataali Omwaami mboola endi, nabaao owaasyeefwe yeesi oli neende omuhasi, otaali omufukiiriri, mani omuhasi yaafukiirira ohumenya nae, owaasyeefwe oyo ateerusaanga omuhasi otaali omufukiiri oyo.

¹³Omuhasi yeesi owadeehera omusaacha otaali omufukiiriri, nae omusaacha oyo yafukiirira ohumenya nae, omuhasi w'engeri eyo ataboyaanga ebyae aloba omusaacha otaali omufukiiriri oyo.

¹⁴Olwohuba omusaacha otaali omufukiiriri aba alabiswa ohubitira mu muhasi wae oyo, haandi omuhasi otaali omufukiiriri alabiswa ohubitira mu musaacha wae mufukiiriri. Ataali ao, abaana beeng'we sibachia ohuba aboolerefu, nae koti lu siri abaana abo aboolerefu nibo.

¹⁵Nae omuundu otaali omufukiiri niyoola yekoomba ohukabuhana, lehe sibe koti lwaadaha; mu ngeri yino, owaasyeefwe mufukiiriri chana, omusaacha oba omuhasi, aba ali omulehuule. Olwohuba Nasaae yatulaanga hube neende omuleembe.

¹⁶Muhasiiwe, omanyiire siina awuundi niiwe owahaonie omusaacha wao? Musaacha-ewe, omanyiire siina awuundi niiwe owahaonie omuhasi wao?

¹⁷Mani siri mbwe, muleheenge buli muundu anyala ohuba mu bulamu bu Omwaami aba niyamutekehera, haandi bu Nasaae aba yamulaangiramo. Lino nilyo elako lyaange li ndaha libe mu mikaanda ky'abafukiiriri boosi.

¹⁸Aliwo omuundu yeesi hweeng'we esiha si yalaangirwamo owali niyamala ohuhebwa? Mulehe omuundu koti oyo atanyaahana ohwemalaho embala ch'ohuhebwa daawe. Mani aliwo omuundu yeesi hweeng'we esiha si yalaangirwamo owali n'asisiiri ohuhebwa? Mulehe omuundu koti oyo atanyaahana ohuhebwa daawe.

¹⁹Olwohuba ohuhebwa haba sihuliho neende amahuluundu koosi, oba kata ohutahebwa, nae esiri neende amahuluundu muno ni ohwooseresaanga amalako ka Nasaae.

²⁰Buli muundu yeesi ahoyere adoong'enge mu bulamu bu yalimo n'alaangwa.

²¹Wali nooli omuwaambe esiha si walaangirwamo? Otafwaayo daawe. Nae nooba noonyala, lwaana obe omulehuule, wekoonyere omweene ehabi eyo.

²²Olwohuba oyo yeesi oba niyalaangwa mu Omwaami naali omuwaambe, bulaanu ali omulehuule ow'Omwaami. Nasilala bityo, oyo yeesi owali omulehuule naalaangwa, bulaanu muwaambe wa Kristo.

²³Eng'we mwamala ohukulwa hu bukusi; mani muteecha haandi mwaakanya ohweehola abawaambwa sa neende abaandu.

²⁴Mani sakira, eng'we basyaange, abyahaba mbwe ni mu bulamu siina buli muundu hweeng'we aba niyali n'alaangwa, adoong'e sa mu bweene obwo naali neende Nasaae.

²⁵Bulaanu ohudiira hu baandu bataadeehisania, ese haba si ndi neende elako litula eyiri Omwaami daawe, nae ese nyala ohutusa esibaaso syaange omweene, ni ndi koti oyo owanyalirwa neende esisa sy'Omwaami ohuba omuundu owesikiha.

²⁶Ese ndi ohubaasa endi ohweema hu bidinyu biriwo endaalo chino, silai nisyo omuundu ohudoong'a sa koti lu ali.

²⁷Oli neende omuhasi yi wadeehya yeesi? Mani otamweetusaho daawe. Ewe haba sooliho neende omuhasi yeesi yi wadeehya? Mani otakoonyaho yoonyala ohudeehya daawe.

²⁸Nae niwiichuhana waadeehya, ao haba sooba wonoonereho kata, haandi kata omuhaana otaadeeha yeesi niyoola yaadeeha, yesi haba saaba niyonoonereho daawe. Kata katyo abo boosi abadeehisania, paka bachia ohunyoolaanga ebidinyu by'ohusyaalo huno, nae ndahadahire ohubawonia mweesi ebidinyu ebyo.

²⁹Ese esiindu si ndi ohweekesa nisyo sino basyaange, esiha syateebwao simalire ohuduuduya muno; ohutula enyaanga yino ohuchia mu moni, mulehe abo boosi abali neende abahasi babadeehya bachaake ohumenyaanga koti abo abatadeehya hooho,

³⁰nae abo abali ohuliraanga, bamenye koti abo abataali ohuliraanga daawe, nae abo abali ohusangalaanga, bamenye koti abo abatasangaalaho, nae abo abali ohukulaanga, bamenye koti abo ababulaho kata neende esiindu syoosi,

³¹nae abo abali ohuholeganaanga neende esyaalo, bamenye koti abo abataaliho neende ohuholegana hwosi neende esyaalo daawe. Olwohuba emera y'esyaalo sino eyiriwo yino, yicha niyiwaao.

³²Ese ndaha eng'we mumenye nimutaali neende ebibelalihirisa byoosi. Omusaacha otaadeehya, yelalihirira ebiindu bidiira hu Omwaami byoong'ene, koti nga lu anyala ohusaangaasa Omwaami;

³³nae omusaacha wadeehya yelalihirira sa ebiindu by'ohusyaalo huno, koti lu anaasangaase omuhasi wae,

³⁴mani ebibaaso byae byaadoong'a sa nibyakabuhanamo. Nae omuhasi otaadeeha oba omuhaana otaamanyireho eby'abasaacha, abaao niyelalihirira sa hu biindu bidiira hu Omwaami byoong'ene, koti lu yahadoong'a naali omwoolerefu mu mubiri neende mu mwooyo. Nae omuhasi wadeeha, abaao niyelalihirira hu biindu bidiira hu syaalo huno byoong'ene, koti lu yahasangaasa wamwe.

³⁵Ese ndi ohuboolaanga bino byoosi hulw'obulai bweeng'we, nitadahaho kata nabudiidi ohubadwiihaho ebidinyu byoosi daawe, nae ohunyala ohuniinia ehola ndai haandi neende ohunyala ohuwonia obuheeri bweeng'we bw'Omwaami buhaye ohukabuhanisibwamo.

³⁶Omuundu yeesi naaba n'amanyire ati haba saali ohweyiraanga bulai mu moni w'omuhasi yi baba nibafukiirisaanie ohudeehisania nae, obwekoombi bwae nibuba nibuli obuungi muno, koti sa lu sihoyere ohuba, mumulehe omweene ahole sa koti lwaaba n'adaha: mubalehe badeehisanie, haba sisiba siri esyonoono daawe.

³⁷Nae oyo oba n'amaliirire sa mu mwooyo kwae, nataaliho ohuyiikwa hwoosi daawe, ohutusaho sa koti lu mweene aba nanyalire ohuhira obwekoombi bwae amaani, haandi omweene amaliriire ohuba atyo mu mwooyo kwae, ohumuliinda sa naali atyo koti oyo yafukiirisaanie nae ohudeehya, aba aholere bulai sa.

³⁸Mani sakira oyo yeesi owoola ohudeehya yaaba niyapaatana nae, aba anabeechaanga naaholere esiindu silai muno; nae oyo onyala ohweliinda yaahaya ohudeehyaho aba anabeechaanga nanyalire ohuhola esihiramo obulai.

³⁹Omuhasi yeesi owadeeha, aba aasi w'obunyala bw'omusaacha oba niyamudeehya ohwoola lu musaacha oyo afwiira. Omusaacha wae oyo niyoola yaafwa, omuhasi oyo aba ali omulehuule ohudeehera omusaacha wuundi yaaba n'adahire, nae nibadeehisanisirya mu Omwaami byoong'ene.

⁴⁰Nae ohweema hu hubaasa hwaange, omuhasi koti oyo atyo, aba achia ohuba omusaangaafu ohuhirao nikali mbwe aheengao ohudoong'a koti lu aba naali. Nimboola endyo mbaasa endi syesi ndi neende Mwooyo wa Nasaae.