Read saamia 1 Abakoriito 8 Bible Online

1 Abakoriito 8 - saamia bible

1 Abakoriito 8

¹Bulaanu ebidiira hu byohulya biyaaniirwe emisaambwa: efwe humanyire huti, “efwe fweesi huli neende obumanyirifu.” “Obumanyirifu” buhuduumbasaanga, nae obuheeri bwombahaanga.

²Omuundu yeesi n'achaaka ohubaasirisa sa ati amanyire esiindu syoosi, haba saaba naamanyire koti lu aba n'ahoyeere ohumanya.

³Nae omuundu yeesi owaheera Nasaae, yamanyihana nae.

⁴Mani sakira, ohuloondehana neende ohulya ebyohulya biba nibiyaaniirwe emisaambwa, efwe humanyire huti, “omusaambwa haba sikuli neende ohubaao hw'elalira daawe,” haandi huti, “Nasaae ali mulala yeeng'ene.”

⁵Olwohuba kata naaba naanyala ohuba naaliwo abo abanyala ohuba nibalaangwa mbwe banasaae Muukulu oba hu syaalo huno, koti mubwadyeeri bweene baliwo “banasaae” abaangi haandi neende “abaami” abaangi

⁶kata katyo, eyiri efwe, Nasaae ali mulala yeeng'ene, oli Seefwe, owahola ebiindu byoosi, haandi oyo yi hubeerao abalamu, haandi Omwaami mulala yeeng'ene, Yesu Kristo, yi biindu byoosi byabitiramo hu byaloongwa, yi hubitiramo hu hwaaba abalamu.

⁷Kata katyo, abaandu boosi haba sibali neende obumanyirifu buno daawe. Nae abaandi, ohubitira muhunaliirira ohuba neende ebiloongaloongwe, balichaanga ebyohulya bi babaasirisa bati bimalire ohuyaaniirwa omusaambwa; mani ebibaaso byaabwe, koti lu biri ebikata, binyaaswa.

⁸Nae kata katyo ebyohulya haba sinibyo ebirituyira eyiri Nasaae daawe. Efwe haba sihuba nihuli bubi muno mu moni wa Nasaae nikali mbwe haba sihulya esiindu syoosi, haandi kata sihunyala ohuhirao obulai nihulya.

⁹Ohutusaho mbwe muhoyere ohwehaliirisa, hu bulehuule bweeng'we buno buhaye ohunyala ohweehola esiindu syegumulwaho neende abo abali abakata mu fukiirira.

¹⁰Olwohuba mani omuundu yeesi niyeecha yaahubona ewe omuundu oliho neende obumanyirifu, nooli ohuliira mu nyuumba y'emisaambwa, mani haba saaba achia ohunyoola amaani, kata neende ebibaaso byae nibiba nibiri ebikata, ohulichaanga ebyohulya biba nibiyaaniirwe ebiloongaloongwe?

¹¹Mani sakira ohutulana neende obumanyirifu bwao buno, omuundu mukata wuno aba achia ohusihiriswa, omwaana waasyeeng'we oyo yi Kristo aba niyanyala ohufwiira.

¹²Esyeekesa mbwe, ohuholeraanga abasyeeng'we ebibi, haandi neende ohuchuunianga ebibaaso byaabwe bikata bityo, muba muli ohwonoonaanga mu moni wa Kristo.

¹³Mani sakira, nikali mbwe ebyohulya nibyo ebiba nibikera owasyaange ohukwa, ese siimba njia ohulyaaho enyama, takera owasyaange yaakwa.