Read saamia 2 Abakoriito 1 Bible Online

2 Abakoriito 1 - saamia bible

2 Abakoriito 1

¹ Ohutula eyiri Paulo, omutume wa Kristo Yesu ohweema hu hudaha hwa Nasaae, haandi ohutula eyiri Timoteo omwaana weefwe. Ohuchiira abafukiiriri ba Nasaae abali mu Koriiti, haandi ohuchiira abaandu ba Nasaae boosi abali mu Akaya mwoosi.

²Embabaasi chibe yi muli neende omuleembe kutula eyiri Nasaae Seefwe, neende Omwaami Yesu Kristo.

³Abereswe oluyaali Nasaae haandi laatang'ene Omwaami weefwe Yesu Kristo, Nasaae w'esisa siingi haandi Nasaae omulemisi w'emyooyo kyoosi,

⁴oyo otulemyaanga emyooyo mu husaanda hweefwe hwoosi, hu fwesi hunyale ohulemya emyooyo abo ababa nibali mu husaanda hwoosi, neende ohulemya omwooyo fwesi ohutulemyaanga emyooyo neende Nasaae.

⁵Olwohuba koti lu fwesi hukabanira elalira mu bwiichufu mu husaanda huungi hwa Kristo, nilwo fwesi muhubitira mu Kristo oyo hukabanira elalira mu bwiichufu mu hulemya omwooyo ohwo.

⁶Nihuba nihuchuunisibwa, ni hulw'ohulemesebwa emyooyo hweeng'we neende ohuwonisibwa; nae nihuba nihulemesebwa emyooyo, ni hulw'ohulemesebwa emyooyo hweeng'we, hu munyoola nimuba nimunyala ohwesimiirisa nimugumire ohusaanda hu fwesi husaanda ohwo.

⁷Esuubi lyeefwe mweeng'we lyomiifu; olwohuba humanyire huti koti lu mwesi muli ohukabana mu husaanda hweefwe huungi, muchia mwesi ohukabana hu hulemesebwa omwooyo hweefwe.

⁸ Olwohuba efwe haba sihudaha mube nimutaamanyire, basyeefwe, ohuchunisibwa hu hwanyoola nihuli mu Asia; olwohuba hwanyooberwa elalira ohubita esikero ohwoola lu hwebwaabira elalira obulamu.

⁹Hulwasiina, nae hwali nihumalire ohumanya huti hwali nihumalire ohuheengerwa omusaango kw'ohufwa; nae esyo syali esituhola hwahaya ohweesikana abeene-na-beene, nae ohweesika Nasaae oyo osyusaanga abafu;

¹⁰yatununula ohututusa mubuchuuni bwiita sa obwo, mani achia ohutununula haandi; hu mweene oyo, nihwo hu huteere esuubi lyeefwe huti achia ohutununula ehabi liindi.

¹¹Eng'we mwesi muhoyere ohutuhoonya neende ohusabaanga esaala, hu baandi baangi banyale ohwoola ohutwebasira hulw'esisa si huba nihwabeereswa ohweema hu masaayo maangi.

¹²Olwohuba ohwefumia hweefwe, nihwo huno mbwe, ohubaasa hweefwe huhwebisiiremo mu syaalo muno, neende ohumeedaho eng'we mwesi, alala neende obwoolerefu neende obwadyeeri bw'ediini, nihuteehoonyera amakesi k'esyaalo, nae ohweema hu mbabaasi cha Nasaae.

¹³Olwohuba efwe sihubandiikira esiindu siindi ohutusaho ebyo bi munyala ohusoma haandi mwamanya; mbaasa endi muchia ohumanyira elalira mu bwiichufu,

¹⁴koti lu mwali mwamanyaho bidiidi, hu munyale ohutwesiimiramo koti lu hunyala fwesi ohubesiimiramo, hu ludaalo lw'Omwaami Yesu.

¹⁵Olwohuba ndali nisuubira sino, ndadaha ohutaangira ohwiicha yi muli, hu munyale ohunyoola esangaalo ly'amahabi kabiri;

¹⁶ Ndadaha ohubakeniya ni ndi hu lukeendo lwaange luchia Makedonia, haandi ohubakobolera nindula Makedonia hu nyale ohukera muhoonye ninjia hu lukeendo lwaange lw'ohuchia mu Buyudaaya.

¹⁷Mani ndali nindondoobaane muhudaha ohuhola endyo? Mani ese holaanga endekeha chaange koti omuundu womu syaalo sa, nindetekeehe ohuboola endi Eee haandi endi haba esiha silala esyo?

¹⁸Mu bwomiifu bweene koti lu Nasaae ali omweesikwa, emboosi yeefwe yi hubaboleere haba siyibeere niyiri Eee haandi haba.

¹⁹ Olwohuba Omwaana wa Nasaae, Yesu Kristo, yi hwabayalaangamo, Silifaano, Timoteo neende ese, haba siyali “Eee” haandi “haba”; nae mu mweene oyo buli siha ni “Eee”.

²⁰Olwohuba ebisuubise bya Nasaae binyolaanga “Eee” yabyo mu mweene oyo. Mani sakira huboolaanga huti Amiina nihubitira mu mweene oyo, hulw'oluyaali lwa Nasaae.

²¹Nae ni Nasaae niye otechaanga efwe naang'we mu Kristo, haandi yamala omweene ohututuma;

²²yamala ohututaaho esilolero syae neende ohutuberesa Mwooyo wae mu myooyo kyeefwe ohuba esyomiisa.

²³Nae ndi ohulaanga Nasaae yeeche abe omuloli waange mbwe ndali nindaha ohubaleha sa nisyo esyakera ndahaya ohwiicha eyomu Koriiti.

²⁴Ataali mbwe hwadaha ohubadwiiha sa ohuhema efukiirira yeeng'we; olwohuba huholeraanga alala naang'we hulw'esangaalo lyeeng'we, olwohuba mwomiira mu fukiirira yeeng'we.