Read saamia 2 Abakoriito 10 Bible Online

2 Abakoriito 10 - saamia bible

2 Abakoriito 10

¹Ese Paulo, omweene mbekweeda, neende obukwalaafu neende obuloonga bwa Kristo Ese oli omuloonga ni ndi naang'we, nae omusimbiifu yi muli ni ndi eyale!

²Mbasa endi ni mba niinjicha, mutakera ndaaba omwaalaba neende ohwehahasa koti lundesiima ninyiinga abaandu baandi abatubaasirisaanga ohuba nihweebisira mu ngira ch'esyaalo.

³Olwohuba kata neende nihuba nihwamenya mu syaalo muno, haba sihuli ohulwaana ebiita by'esyaalo,

⁴olwohuba ebilwaaniro by'ebiita byeefwe, haba siby'esyaalo nae biri neende amaani k'omwooyo akanyala ohusihirisa obwaami buungi obw'amaani.

⁵Husihirisa amayiingani neende buli sy'ohwewulira situkayira syoosi ohumanya Nasaae, haandi huwaamba buli bibaaso byaatya Kristo,

⁶nihuli abeetekefu ohusaandya buli butawulira, obuwulisi bweeng'we nibwolereere.

⁷Mwewunje esyo esiri mu moni weeng'we. Omuundu yeesi naaba omwomiifu ati ali owa Kristo, lehe yeyichulise omweene ati koti lwali owa Kristo, nilwo fwesi lu huli.

⁸Olwohuba kata ni mba nindesiima hooho muno hulw'obunyala bweefwe, bu Omwaami yatuba hulwohuboombaha nae ataali hulw'ohubasihirisa, haba simba njia ohudiirwa esoni.

⁹Siindaha ohufwaana koti oli ohubatisaanga neende amabbarwa.

¹⁰Olwohuba bali ohuboolaanga bati, “Ebbarwa chae nendinyu muno haandi nyomeranu, nae omubiri kwae nakwo mukata, haandi neende enomanoma yae haba siindayi.”

¹¹Lehe abaandu bafwaana batyo bamanye bati, bi huboola mu bbarwa nihutaaliwo, nibyo bi huhola nihuliwo abeene.

¹²Ataali ohuboola mbwe huli ohukoonya engaasi, oba oti huli ohwekeraanianga hu baandu baandi abesiima abeene. Nae nibaba nibali ohwekeraanga abeene hu basyaabwe, haandi nibeekeraania abeene-na-beene, nga mbao mani basiru sa.

¹³Nae haba sihuchia ohwefumia ohubitiirisa esikero, nae huchia ohwaakama hu sikero si Nasaae yatuba, esyakera hwanyala kata ohuboolaho.

¹⁴Olwohuba sihuli ohweyeneeresaanga muno, koti abatanyala ohuboolaho; niifwe abataangira ohwiicha abeene yi muli neende emboosi ndai ya Kristo.

¹⁵Haba sihwesiimira hu mirimo ky'abaandu baandu ohubita esikero; nae esuubi lyeefwe liri mbwe koti lu fukiirira yeeng'we yemeeda ohuhula, obweyaango bweefwe ohubaholamo emirimo buhoyere ohubaambaliya,

¹⁶hu hunyale ohuyaala emboosi ndai ohwoola mu byaalo biri eyale naang'we, ataali ohwesiimira hu mirimo kyamala ohuholwa mu bweyaango bw'omuundu wuundi.

¹⁷ “Lehe oyo owesiima, yesiime hulw'Omwaami.”

¹⁸Olwohuba haba si muundu owesiimaanga omweene ofukiirirwaanga, nae omuundu oyo yi Omwaami asiima.