Read saamia 2 Abakoriito 11 Bible Online

2 Abakoriito 11 - saamia bible

2 Abakoriito 11

¹Ndahadahire mwandesimiirisaho mu busiru bwaange budiidi buno! Mundesimiirise!

²Mbawulirira esihali-hali sya Nasaae, olwohuba niise owabamanyisa eyiri Kristo ohubataayo nimuli koti abagole bachweenufu eyiri omusaacha wae yeeng'ene.

³ Nae ndi neende obuti endi koti lu ndemo yabachirisa Efa neende obukodyo bwae, ebibaaso by'eng'we bichia ohukosebwa ohutula hu hutya Kristo hwadyeeri, haandi ohuchweenufu.

⁴Olwohuba omuundu wuundi niyeecha mani yabayaalira Yesu wuundi ataali oyo yi hwayaalira, oba nimunyoola mwooyo okabuhaane neende oyo yi mwanyoola, oba nimufukiirira emboosi ndai yikabuhaane neende eyo yi mwafukiirira, mbulira endi munyala mwayikwiiraho amaofu maangi muno.

⁵Ese mbaasa endi haba sindiho kata budiidi owa aasi muno niwungeraania neende abatume baandi bano.

⁶Kata neende nitaali omumanyirifu muno mu hulomaloma bulai, haba siindi endyo mu makesi; olwohuba mu buli ngeri yoosi, huteemereho ohubeekesera alafu hutyo mu buli siindu syoosi.

⁷Hane ndonoona muhweyisa aasi hu munyale ohuniinisibwa, koti lu ndayalaanga emboosi ndai ya Nasaae nimutaanduunga esiindu syoosi?

⁸Hane ndanyakanga abafukiiriri baandi koti lu ndabatusaangaho obuhoonyi ohubahoonya?

⁹ Haandi koti lu ndalichiingi ni ndi naang'we, haandi nimbula ebiindu bindehoonyera, nitasidoyeraanga omuundu yeesi, koti lu biindu bi ndehoonyeraanga byatulaanga sa mu basyaange batula mu Makedonia. Nilwo lu ndahaya haandi nilwo lu njia ohuhaya ohubadwiiha omugugu mu ngeri choosi.

¹⁰Koti lu bwadyeeri bwa Kristo buundimo, ohwefumia hwaange huno haba sihuchia ohukayirwa mu syaalo sya Akaya syoosi.

¹¹Haandi lwasiina? Olwohuba mbwe haba sindabaheera kose? Nasaae amanyire ati ndabaheera!

¹²Mani esyo siindi ohuhola, njia ohwemeeda ohusihola, hu nyale ohuchalaasa enomanoma y'abaandu bahadahire ohuboola bati, mu buhalaabani bwaabwe bw'ohweefumia obwo, bahalaabanira mu luyaali lwaakana neende lu fwesi huhalaabaniramo.

¹³Olwohuba abaandu bafwaana batyo batume bobubacha nibo, abahalaabani babacha, abali ohweehola ohufwaana koti abatume ba Kristo sa.

¹⁴Ataali ohukana-kana, Sitaani yesi yeholaanga afwaana koti malaika w'obulafu.

¹⁵Mani haba sisikeni eyiri abahalaabani bae bosi ohweehola bafwaana koti abahalaabani b'obuluungifu. Enjakamo yaabwe yicha ohufwaanana neende ebihole byaabwe.

¹⁶Ndi ohuloondamo endi, lehe omuundu yeesi atabaasaangaho ati ese ndi omusiru; nae kata nimuhola mutyo, mani munjire koti omuundu musiru, hu syesi nyale ohwefumiaho budiidi.

¹⁷(Siina syeene siindi ohuboola? Haba simboola neende obunyala bw'Omwaami nae mboola koti omusiru, mu hwesiima hwaange hwomiifu huno;

¹⁸koti lu baandi bali ohwefumianga hu biindu byomu syaalo, mani syesi njia ohwefumia.)

¹⁹Olwohuba musangaalira muno ohwesimiirisira abasiru, kata neende abeene nimuli abakesi!

²⁰Olwohuba eng'we mwesimiirisira omuundu obahola mwaaba koti abahalaabani bawaambe bae, oba obalya, oba obehoonyera bihaya, oba obalekeeresa, oba obapaama mu bweeni.

²¹Esoni chindiira ohuboola endi, efwe hane hwali abakata muno abatahoyera ohuholerwa batyo! Nae esiindu syoosi si muundu yeesi achia ohuteemaho ohwesiimiraho.Nomanoma koti omusiru syesi njia ohwenyiira ohwesiimira hu syeene esyo.

²²Bayudaaya nibo, kose? Syesi nilwo lundi. Baisiraeli nibo, kose? Syesi nilwo lundi. Beechuhulu ba Abburahamu, kose? Syesi nilwo lundi.

²³ Bahalaabani ba Kristo, kose? Ese naange mbahira eyale. Nomanoma koti omulalu, kose haandi ni ndi neende emirimo mibitiirifu, neende ohuboyebwa hubitiirifu, neende ohuhuywa embariki hutabaliha, haandi neende amahabi ka butoli-toli akohuwona ohufwa.

²⁴ Amahabi kataanu amalaamba ndamala ohuhuyibwaangaho embariki amahumi kadatu neende chitaanu-na-chine buli habi.

²⁵ Amahabi kadatu amalaamba ndamala ohuhuywaho neende embariki ch'ewaaya; Ehabi lala ndahubbwaho amakina. Amahabi kadatu amalaamba ndachuhwaho mu nyaanja neende emeeri; ndabeengaho hu nyaanja esiro silala neende esideete silala;

²⁶ hu ngeendo nyiingi, ndalichiingi mu masira k'ohufwiira mu myaalo, amasira k'ohukwa mu banyaka, amasira k'abaandu baange beene, amasira k'Abateende, amasira mu biko bihuluundu, amasira mu bichiimi, amasira mu nyaanja, amasira k'abaasyange bataali ab'obwadyeeri;

²⁷mu hutubuha oluuya neende obulamu bwoomu, ohubita mu biro biingi muno ebitakonehamo endoolo, mu njala neende mu buluwo, amahabi maangi nitalichaangaho, mu mboo neende alwaanyi.

²⁸Haandi n'otatereho ebiindu biindi, buli ludaalo omusiigo kuundiho okw'ohudaha ohumanya koti abafukiiriri boosi bamenyere.

²⁹Naanu mweene ojoong'a, ndaahaya syesi ohujoong'eraho? Naanu mweene oyiirwa mu syonoono ese ndaahaya ohwewunamira?

³⁰Nikali mbwe hoyeere ohwefumia, ndahabeere nindesiimira hu biindu byeekesa obukata bwaange.

³¹Nasaae haandi Laatang'ene Omwaami Yesu, oyo ow'oluyaali endaalo choosi, amanyire ati ese haba siindi hubacha.

³² Ni ndi mu Damasiko, gafana owali aasi w'omutuki olaangwa mbwe Areta yaliinda esiko sya Damasiko anyale ohundiira,

³³nae ndeehirisirwa mu simweero nimbisirwa mu dirisa ly'ohusida sy'erwaanyi, mani ndaona amahono kae.