Read saamia 2 Abakoriito 12 Bible Online

2 Abakoriito 12 - saamia bible

2 Abakoriito 12

¹Hoyeere ohwefumia; kata katyo abulao engaanga yinyoolamo. Nae njia ohulomaloma hu huboneherwa neende ohubwiihulirwa hw'Omwaami.

²Manyire omufukiiri wuundi yi myaaka ehumi neende chine chibitire, owayiribwa muukulu lyohudatu, haba siimanyire oba yayirwa neende omubiri kwae, oba daawe, Nasaae niye omanyire.

³Haandi manyire endi omuundu wuno yayiribwa abuundu w'ohwehoyeramo, simanyire oba yayiribwa neende omubiri kwae, oba haba, Nasaae niye omanyire

⁴mani yawulira ebiindu bi tahalomwalomwa, bi muundu atahanyala ohutuumbula.

⁵Hulw'omuundu wuno, njia ohwefumia, nae hulwaange omweene haba siinjia hweefumia, ohutusaho njia ohwefumia mu biindu byeekesa obukata bwaange.

⁶Kata nindahadahire ohwefumia, sindahabeere omusiru, olwohuba mba njia ohulomaloma obwadyeeri. Nae hasyekaane, hu bulaanu omuundu yeesi ahaye ohubaasa ati hira biyaambonamo oba bi yawulira nimboola.

⁷Nae ohuungayira ohweniinia hulw'ohubwiihulirwa huungi hu ndanyoola, ndafumitwa ewa mu mubiri, wamwaanda wa Sitaani ohunjuunia, yanjakamie ohweniinia muno.

⁸Ndekweeda Omwaami amahabi kadatu endi esiindu sino sihoyere siinduleho;

⁹nae yamboolera ati, “embabaasi chaange chihumala, olwohuba amaani kaange kabonehera elalira mu bukata bwao.” Njia ohwemeeda ohweniinia mu bukata bwaange, hu maani ka Kristo kanyale ohumbaaho.

¹⁰Mani hulwa Kristo, bulaanu sangaalira obukata, ohunyekwa, obudinyu, ohusaandisibwa, neende ebidinyu bikabuhaane; olwohuba ni mba omukata ao niwo yimbeera owa amaani.

¹¹Mbao ndeehola koti omuundu musiru! Haandi ning'we abakera ndaaba endyo. Olwohuba niing'we abali bahoyere ohusiima. Olwohuba ndali ninjaaka sa neende abatume baandi, andahaba nitahoyera.

¹²Obulolero bw'omutume wadyeeri bwaholerwa neende ohwesimiirisa huungi mweeng'we, nibibonehera mu bulolero, mu by'amayia neende emirimo ky'amaani.

¹³Siina syeene simutanyoola sibafukiiriri baandi banyoola, ohutusaho mbwe ese omweene haba sindadaha ohubadwiiha omugugu kwoosi? Mani mundeheremo hulw'esisobyo sino!

¹⁴Mbano ndi omwetekefu ohwiicha yi muli ehabi lyohudatu. Mani haba siinjia huba omugugu yi muli, olwohuba singoonya ebiindu bi muli nabyo ohutusaho eng'we abeene; olwohuba abaana haba sibahoyere ohuhalaabanira abeebusi nae abeebusi nibo abahalaabanira abaana baabwe.

¹⁵Njia ohusangaala nindehoonyera buli siindu syoosi siindi nasyo, kata omweene ohweyaanayo ohuwonia emyooyo kyeeng'we. Mani nimbaheera muno, niise oba hoyera ohutaheerwa mu ngeri nasilala eyo?

¹⁶Mumanyire muti ese haba sindali omusiigo yi muli, nae muboola muti ndali omubalabalanu, ndaabateka mani ndaabadiira.

¹⁷Mwaabo ba ndabatumira aliwo yeesi yi ndehoonyera ohubatusaho esiindu?

¹⁸Ndekweeda Tito ohwiicha yi muli, mani ndamutuma neende omufukiiriri waasye. Mani Tito yabatusahooho esiindu syoosi? Siyahola koti lu ese ndahola? Haba sihweyira sa mu ngeri nasilala?

¹⁹Mubereenge nimusibaasa ebiha ebyo byoosi muti efwe huli ohudebaanga hu bulamu bweefwe abeene mu moni weeng'we? Mu moni wa Nasaae, hubeere nihulomaloma ebiindu bino mu liita lya Kristo haandi byoosi hulw'ohwoombaha eng'we abaheerwa.

²⁰Olwohuba ndi ohutya endi nyala ohwiicha mani ndabakaana nimutaali koti lu ndaha haandi mwanjakaana koti lu mutadaha; haandi awuundi wabaao ohusoolana, ebihali-hali, etima, omutoolyo, obulekeeresani, ohumoonyana, ohwehuduumbasa, neende ohuchokaana.

²¹Haandi ndi ohutya endi niinjicha haandi Nasaae waange achia ohundiisa esoni mu moni weeng'we, haandi nyala ndaalira hulw'abaandu baangi abahola ebyonoono mani bahaya ohweyolobya eby'obucheke, obuyirani, neende obwekoombi bu bahola.