Read saamia 2 Abakoriito 13 Bible Online

2 Abakoriito 13 - saamia bible

2 Abakoriito 13

¹ Lino bulaanu nilyo ehabi lyohudatu niinjicha yi muli. Omusaango kwoosi kuhoyere ohwomiiswa nikuli neende esifune sy'abaloli babiri oba badatu.

²Nindali naang'we ehabi lyohubiri, ndalabula abo abahola ebyonoono hale alala neende abaandi boosi, haandi bulaanu mbalabula nitaali naang'we, mani niinjicha haandi awuleo omuundu yeesi yindehera.

³Mbao mudaha ohubona esyomiisa siti Kristo yanomanomeraangamo. Kristo oyo haba simukata n'aholera alala naang'we ohumalaho yekesa amaani kae mweeng'we.

⁴Olwohuba mu bukata yabaambwa, nae aliwo omulamu hulw'amaani ka Nasaae. Olwohuba efwe fwesi huli abakata mu Kristo, nae mu huholera alala nae yi huchia ohuba abalamu nae hulw'amaani ka Nasaae.

⁵Buli muundu yelingaale mu mwooyo, abone nikali n'asyomiirire hu fukiirira yeeng'we. Mwelingaale abeene. Haba simubona muti Yesu Kristo ali mweeng'we? Ohutusaho nga bibahayiire elalira ohwelingaala!

⁶Suubira endi muchia ohubona muti haba sibituhaire.

⁷Nae husaba Nasaae huti mutaholaho obubi ataali ohudaha ohweyekesa huti hwahola bulai, ohutusaho mbwe eng'we muhole esihoyera, kata neende nihubonehana koti abahaywa.

⁸Olwohuba sihunyala ohuhola esiindu syoosi esiyiingania obwadyeeri ohutusaho huhola ohulwaanirira obwadyeeri.

⁹Efwe husangaala nihuba abakata nae eng'we nimuba ab'amaani. Sihubalaamira eyiri Nasaae nihwo ohuhula-hulana hweeng'we.

¹⁰Nyandiika bino nisisiiri ohwiicha yi muli, mani ni mba niinjichire, hu bulaanu niinjicha, haye ohuba omwaalaba nindehoonyera obunyala bu Omwaami yamberesa obwohwombaha obutaali obwohulikula.

¹¹Mani basyaange esimaliirihayo, nisyo ohubaseebula. Tereese obulamu bweeng'we, diire amaliro kaange, fukiirisanie abeene-na-beene, menye neende omuleembe, mani Nasaae w'obuheeri neende omuleembe achia ohuba naang'we.

¹²Heesanie abeene-na-beene nimukwiichana mu birifu nimweekesa ohuheerana hweeng'we.

¹³Aboolerefu boosi babaheesa.

¹⁴Embabaasi ch'Omwaami Yesu Kristo, neende obuheeri bwa Nasaae neende obulala bwa Mwooyo Mwoolerefu, bibe naang'we mweesi.