Read saamia 2 Abakoriito 2 Bible Online

2 Abakoriito 2 - saamia bible

2 Abakoriito 2

¹Olwohuba ese ndaheengao ohutabatekehera olukeendo luundi olunyala ohubachuunia.

²Olwohuba niwiichuhana ndabachuunia, ni naanu mweene oba anaasangaasa, nimutaba eng'we ba mba ninjuuniisye?

³Mani ndandiika koti lu ndaandiika endyo, hu bulaanu ni mba niinjicha eyo, tanyala ohuchuunisibwa neende abo abahahoyeere ohusangaasa, olwohuba ndali nimbeesika mweesi, endi esangaalo lyaange lyahahoyeere lyaaba esangaalo lyeeng'we mweesi.

⁴Olwohuba ndabandiikira ninyemere hu huchuunisibwa neende ohwekanyiirisa hw'omwooyo haandi neende amasika amaangi, nitachiiririra ohubachuunia nae ohukera mumanye nga lu ndabaheera neende obuheeri bubitiirifu.

⁵Nae omuundu yeesi n'aba n'achuuniise owaasye, haba saaba niyaholeere ese syeeng'ene, nae mu siha siindi eyiri eng'we mweesi. (Mboola sino nitadaha ohuboomesera muno obulamu.)

⁶Olwohuba omuundu ofwaana atyo, esibonereso sy'abaandu bahira obuungi siba simala sa;

⁷sakira eng'we muhoyere mwakaluuhana mwamulehera, haandi mwamulemya omwooyo, awuundi aba achia ohuyiingirwa neende ohwelalihirira hubitiirifu.

⁸Sakira mbekweeda mumwichuliseenge ohumuheera hweeng'we.

⁹Olwohuba sino nisyo esyakera niyaandiika, hu nyale ohubahema mani nyemeo nyale ohumanya nimuli abawulisi mu buli siindu syoosi.

¹⁰Omuundu yeesi yo lehera, syesi mba ndamulehera. Esyo si mba nimalire ohulehera, ni mba nindeheere omuundu yeesi esiindu syoosi, siba syeemere hweeng'we mu moni wa Kristo,

¹¹ohunyala ohukayira Sitaani ohunyoola obweyaango ohutufubulira; olwohuba efwe humanyire ebibaaso byae koti lu biri.

¹² Nindeecha mu Turoasi ohuyaala emboosi ndai ya Kristo, omulyaango kwaanjikuhira sa mu Omwaami;

¹³nae ebibaaso byaange haba sibyakwalaala olwohuba haba sindakaana Tito mwaanaama naaliyo. Sakira ndeecha ndaabatulaho mani ndaamala ndaachia Makedonia.

¹⁴Nae Nasaae yebasibwe muno, oyo obitiraanga mu Kristo atwimiriraanga mu huyiingira, haandi ohubitiraanga mw'efwe, asalaanianga esing'aari sy'ohumumanya buli abuundu.

¹⁵Olwohuba efwe niifwe esing'aari sya Kristo eyiri Nasaae mwaabo abali ohuwonisibwaanga, haandi mwaabo abali ohusihiriranga,

¹⁶eyiri owuundi ni esing'aari sy'ohutula mu hufwa ohuchia mu hufwa, nae eyiri owuundi ni esing'aari situla mu bulamu ohuchia mu bulamu. Ni naanu mweene oyera bino byoosi?

¹⁷Olwohuba efwe haba sihuyera, koti sa abaandu baangi bali, abaonianga emboosi ya Nasaae; nae koti abaandu b'obwadyeeri, koti abatumwa neende Nasaae, mu moni wa Nasaae hulomalomera mu Kristo.