Read saamia 2 Abakoriito 4 Bible Online

2 Abakoriito 4 - saamia bible

2 Abakoriito 4

¹Mani sakira, nga lu huli neende obuhalaabani buno ohweema hu sisa sya Nasaae, haba sihuwaamo omwooyo daawe.

²Hwamala ohwebwaaba ebiindu by'esoni byoosi, neende engira ch'ebyaama choosi; hukaana ohuhola eby'obubacha byoosi oba ohuteemaho ohukaluuhania emboosi ya Nasaae, nae ohubitira mu nomanoma njahaahu y'obwadyeeri, huchia ohwesiimira mu bibaaso bya buli muundu mu moni wa Nasaae.

³Haandi kata neende emboosi ndai yeefwe niyiba niyebwiihaho esitaambaya, yiba yebwiihaho eyiri abo boong'ene abachia ohusihirira.

⁴Mu mbaasa yaabwe nasaae w'esyaalo sino yamala ohuwofusa ebibaaso by'abatafukiirira, hwaabakayiire ohunyala ohubona obulafu bw'emboosi ndai ey'oluyaali lwa Kristo, oli efwaani ya Nasaae.

⁵Olwohuba esyo sihuyaala haba sinisyo efwe abeene, nae ni Yesu Kristo koti Omwaami, neende efwe beene koti abahalaabani bawaambe beeng'we hulwa Yesu.

⁶ Olwohuba ni Nasaae mweene niye owaboola ati, “Lehe obulafu bwaaduhe mu siirima,” oyo owaaduha mu myooyo kyeefwe ohuberesa obulafu bw'ohumanya oluyaali lwa Nasaae mu bweeni bwa Kristo.

⁷Nae efwe huli neende obunyali buno mu bibiihiro by'eloba, ohweekesa mbwe amaani k'aakulu ka Nasaae nae haba sikeefwe daawe.

⁸Efwe huchuunisibwa mu buli ngeri yoosi, nae haba sihunyoobolwanga daawe; hudoondobaniswa, nae haba sihukatayala;

⁹husaandisibwa, nae haba sihulehwa; huhubbwa aasi, nae haba sihusihirisirwa elalira;

¹⁰buli siha nihukiingire mu mibiri kyeefwe ohufwa hwa Yesu, hu bulamu bwa Yesu bunyale ohubonehanira mu mibiri kyeefwe.

¹¹Olwohuba kata neende nihuba nihuli abalamu, buli siha huteebwa mu hufwa hulwa Yesu, hu bulaanu obulamu bwa Yesu bunyale ohubonehera mu mibiri keefwe kifwa kyino.

¹²Sakira ohufwa huli hu mulimo mweefwe, nae obulamu buli mweeng'we.

¹³ Koti lu huli neende mwooyo w'efukiirira, koti y'oyo owandiika ati, “Ndafukiirira, mani nilwo lu ndalomaloma,” fwesi hutyo hufukiirira, mani nilwo lu hulomaloma,

¹⁴nihumanyire huti oyo owasyuuhisa Omwaami Yesu, achia ohutusyuusa fwesi alala neende Yesu mani atuleete alala naang'we mu moni wae.

¹⁵Olwohuba bino byoosi biri bityo hulweeng'we, hu bulaanu koti lu mbabaasi chisuda nichoola hu baandu baangi, chihoyere ohuhola abaandu bemeeda ohweebasaanga mu hulaama hwaabwe, hulw'oluyaali lwa Nasaae.

¹⁶Mani sakira efwe haba sihuwaamo omwooyo daawe. Kata neende obulamu bweefwe bw'ohumukulu abwahaba nibuli ohuweerera, obulamu bweefwe bw'omuukati, buli ohukaluuhanisibwaanga obuyaaha buli ludaalo.

¹⁷Olwohuba obuchuuni budiidi obw'esiha sidiidi sino, buli ohututekehera obusito buungi obw'oluyaali lutaakama olutahakeraanisibwaho hu siindu syoosi,

¹⁸olwohuba efwe haba sihuliingaalanga ebibonehana, nae huliingalaanga ebiindu bitabonehana; olwohuba ebiindu bibonehana biwaao, nae ebiindu bitabonehana by'endaalo choosi.