Read saamia 2 Abakoriito 5 Bible Online

2 Abakoriito 5 - saamia bible

2 Abakoriito 5

¹Olwohuba efwe humanyire huti, nikali mbwe esikaali syohu syaalo sihumenyeremo sino nisyahakaangululwe, huli neende enyuumba yene eyitula eyiri Nasaae, enyuumba yitoombahwa neende amahono, nae eyiri aakulu Muukulu.

²Abweene ano hubiinduha sa, nihwekoomba ohwefwaala obumenyo bweefwe bwo muukulu,

³hu nihuba nihubwefwaalire, hu huhaye ohunyoolehana nihuli syeekenye.

⁴Olwohuba nihuba nihusisiiri mu sikaali sino, hwayuuya nihuli neende si hudaha huhole; ataali mbwe hunyala hwafwaalulwa, nae mbwe hwahahoyere ohufwaalwa ebihiraho ao, hu bulaanu esyo esiba nisiri esiwaao, sinyale ohumiribwa neende obulamu.

⁵Oyo owatutekehera esiindu syeene sino niye Nasaae, oyo owatuberesa Mwooyo oyo ohuba esyomiisa.

⁶Mani sakira efwe hwamenya nihwomiirira elalira; humanyire huti kata nihuba nihuli ango mu mubiri, huli eyale ohutula eyiri Omwaami,

⁷olwohuba efwe hukeenda neende efukiirira nae haba sihukeenda nihwewuunjire ebibonehana.

⁸Huli neende ohwomiira hulai, mani haandi syahabeere esilai nihwahabeere nihuli eyale ohutula hu mubiri nae hwaaba ango neende Omwaami.

⁹Mani sakira kata nihuba nihuli ango oba eyale, esichiiririrwa syeefwe siba ohumusangaasa.

¹⁰ Olwohuba fweesi huhoyere ohuchia mu moni w'esisaala sy'ohuheengeraho emisaango esya Kristo, hu bulaanu buli muundu anyale ohunyoola ebilai oba ebyonoono, ohweema hw'esyo syaaba niyahola naali mu mubiri.

¹¹Mani sakira, nihuba nihumanyire ohutya Omwaami, hu serera abaandu; nae esyo abeene si huli simanyihaane neende Nasaae, haandi suubira endi syosi syamanyihana mu bibaaso byeeng'we.

¹²Haba sihuli ohwesiimira hweeng'we haandi, nae huli ohubabechaanga esifune syohweninisirya hweefwe, hu mweemeo munyale ohukobola mwaabo abali ohwewuliraanga abeene ohweema hu fwaani y'omuundu nae haba sihweema hu mwooyo kwae.

¹³Olwohuba nikali mbwe huli abalalu, mani ni hulwa Nasaae; nae nikali mbwe huli mu bibaaso byeefwe bilai, ni hulweeng'we.

¹⁴Olwohuba obuheeri bwa Kristo nibwo obututuka, olwohuba efwe hwamala ohumanya huti, omuundu mulala yafwiira abaandu boosi; mani abaandu boosi hane bafwa hale.

¹⁵Mani yafwiira abaandu boosi, hu bulaanu abo boosi ababa nibali abalamu batahoyere obutabaao haandi hulwaabwe abeene, nae hulwae oyo ohweema hulw'obulai bwaabwe, yafwa mani yaasyuhiswa.

¹⁶Mani ohutula enyaanga yino ohuchia mu moni, abulao omuundu yeesi yi hwewuunja koti abaandu; kata neende hale hwewunjaanga Kristo koti omuundu, haba sihusiimwewunja hutyo haandi.

¹⁷Mani sakira omuundu yeesi naaba naali mu Kristo, aba ali esiloonge siyaaha; esihale siba syamala ohuwaao, boneho, esiyaaha simalire ohwiicha.

¹⁸Bino byoosi bitula eyiri Nasaae, ohubitira mu Kristo owatusasaania nae omweene mani yatuberesa obuhalaabani bw'ohusasaania;

¹⁹esyo nisyo mbwe, mu Kristo Nasaae yali naali ohusasaanianga esyaalo neende omweene, natababaliraho ebyonoono byaabwe, haandi n'atudiisa emboosi eyohusasaania.

²⁰Mani sakira efwe huli bawamwaanda ba Kristo, Nasaae niyoobba omulaanga n'abisira mweefwe. Hubekweeda hulwa Kristo, mwesasaanie neende Nasaae.

²¹Olwohuba hulweefwe, yamuhola yaaba esyonoono otaholaho esyonoono syoosi, hu bulaanu ohubitira mu mweene oyo, hunyale ohweehola obuluungifu bwa Nasaae.