Read saamia 2 Abakoriito 6 Bible Online

2 Abakoriito 6 - saamia bible

2 Abakoriito 6

¹Mani nihuli ohuholera alala nae, huli ohubekweeda obutanyoola sa embabaasi cha Nasaae bihaya.

² Olwohuba omweene aboola ati, “Esiha syali nisihoyera nisyoola, ndabatekeeresaanga, haandi neende ohubahoonya hu ludaalo lw'obuwonia.” Boneho, bulaanu nisyo esiha sihoyera; boneho, nyaanga yino nilwo oludaalo lw'obuwonia.

³Haba sihuli ohuta esiindu sikayira mu ngira y'omuundu yeesi, hu bulaanu abulao esisobyo si nyala ohunyoolehana mu buhalaabani bweefwe,

⁴nae koti abahalaabani ba Nasaae, hwesiima mu buli ngira, ohubitira mu hweesimiirisa hw'amaani, mu huchuunisibwa, mu bidinyu biingi, mu masira,

⁵ ohuhuywa, ohuboywaanga, esiisi, emirimo midinyu, ohuliindirira, enjala;

⁶ohubitira mu siroonyo, obumanyirifu, ohweliinda, esisa, Mwooyo Mwoolerefu, obuheeri bwadyeeri,

⁷enomanoma yadyeeri, haandi neende amaani ka Nasaae; neende bilwaaniso by'obuluungifu bw'omuhono muluungi neende omuhono mukaada;

⁸mu hutiiswa neende mu hubachwa, mu liita ebi neende mu liita lai. Hubukulwa koti abohwetaaho, nihaandi nilwo lu huli;

⁹koti abataamanyihaane, nihaandi hwamanyihana muno; koti abafwa, nae boneho, huliwo abalamu; koti abasaandisibwa, nihaandi haba sihwiitwa;

¹⁰koti abelalihirifu, nae abasangaafu esiha syoosi; koti abamanani, nae nihuhola abaangi ohuyiindiyala; koti abataali neende esiindu syoosi, nihaandi huli neende buli siindu syoosi.

¹¹Omunwa kweefwe kwaasamiriire yi muli, eng'we Abakoriiti; omwooyo kweefwe kwahaaha.

¹²Haba simukayirwa naafwe daawe, nae mukayirwa neende obwekoombi bweeng'we abeene.

¹³Mu hukobolamo, ninomanoma koti olomaloma neende abaana baange, mboola endi yikule emyooyo kyeeng'we mwesi.

¹⁴Muteengisaniaanga neende abakafiiri. Olwohuba bulala siina obuliwo akati w'obuluungifu neende omufuto? Oba sangirani siina obuliwo akati w'obulafu neende esiirima?

¹⁵Huwuliirisania siina ohuliwo akati wa Kristo neende Sitaani? Oba siindu siina esiriwo esifwaanania omufukiriri neende otali omufukiriri?

¹⁶ Huwuliirisania siina ohuliwo akati w'enyuumba ya Nasaae neende enyuumba y'ebiloongaloongwe? Olwohuba efwe huli enyuumba ya Nasaae mulamu; lu Nasaae yaboola ati, “Njia ohubamenyamo haandi ohubakeendamo, mani njia ohuba Nasaae waabwe, nabo bachia ohuba abaandu baange.

¹⁷ Mani sakira mubatulemo, mukabuhane nabo, Omwaami aboolere, haandi mutadiiraangaho hu siindu sitafukiirirwa neende ediini; ao niwo yinjiira ohubabukaanira.

¹⁸ Njia ohuba laata yeeng'we, nae eng'we muchia ohuba abahaana baange neende abasyaani baange Omwaami w'Obunyala bwosi aboolere.”