Read saamia 2 Abakoriito 7 Bible Online

2 Abakoriito 7 - saamia bible

2 Abakoriito 7

¹Koti lu huli neende ebisuubise bino, abaheerwa, mulehe hweeyoseho buli syonoono sy'omubiri neende esy'omwooyo, mani huhole obwoolereere mu hutya Nasaae.

²Mutwikulire emyooyo kyeeng'we; haba sihwakoseraho omuundu yeesi, haba sihwanyaasaho omuundu yeesi, haba sihwabayiraho hu muundu yeesi.

³Haba si ndi ohuboola bino ohubafunaana, olwohuba ese malire ohuboola hale endi eng'we muli mu myooyo kyeefwe, oba hufwiira alala, oba humenya alala.

⁴Ndi neende obwomiifu bubitiirifu mweeng'we; mbesuungiramo muno; ndalemesebwa omwooyo muno. Alala neende ohuchuunisibwa hweefwe ohwo, ndi neende esangaalo ebibitiirifu.

⁵ Olwohuba kata neende nihweecha mu Makedonia, emibiri kyeefwe haba sikyawuluuhaho daawe, nae kyachuunisibwaanga buli luwaande, ohulwaanakana erwaanyi, nae obuti mukati.

⁶Nae Nasaae, oyo olemyaanga emyooyo ky'abaandu beelalihiriire, yatulemya emyooyo neende ohwiicha hwa Tito,

⁷nae haandi haba sihwiicha hwae hwoong'ene, nae neende ohulemesebwa omwooyo humwali nimumulemeese, koti lu yatuboolera hu hwekoomba hweeng'we, ohulira hweeng'we, ohufwiira humufwiira, ohwoola lu ndemeeda ohusangaala haandi ohubitiirira.

⁸Mani kata ni mba nindabeelalihirisa neende ebbarwa yaange, haba siindi hwesiinduha haba daawe, (kata neende nindesiinduha) olwohuba ndi ohubona endi ebbarwa eyo yabanyoolesa muno, kata neende niyahola yityo hulw'esiha esidiidi muno.

⁹Nae koti lu siri, ese naange sangaala sa, ataali mbwe mwanyoolera, nae olwohuba mwanyoolesebwa ohwoola muhweeyolobya; olwohuba mwawulira ohunyoolera hw'omwooyo, mani haba sisiriwo simwafwiirwa ohutula hweefwe daawe.

¹⁰Olwohuba ohunyoolera hutula hu Nasaae hwiibulaanga ohweyolobya hwoosa omuundu hu buwonia, mani haba sihuleetaanga ohwesiinduha hwoosi daawe, nae ohunyoolera hw'esyaalo hwiibulaanga ohufwa.

¹¹Olwohuba muboneho obwadyeeri bweene bu hunyoolera hutula hu Nasaae hwibuule mweeng'we, maofu siina akadaha mwetereese abeene, hwesiisinia siina, luwungu siina, maofu siina, hufwiira siina, ohuboneresebwa siina! Hu buli mboosi yoosi, mwanyala ohwewosaho neende ohwekesera elalira koti lumutaaliho esyonoono mu siindu syoosi.

¹²Mani kata neende nindabaandiikira, haba sibyali nibyeemere hw'oyo owali niiholere esyonoono, kata haba sihweema hw'oyo owanyaaliha ohutula hu syonoono esyo, nae byali huhutufwiira hweeng'we hweemeo hubonehane yi muli mu moni wa Nasaae.

¹³Mani sakira efwe hulemesebwe emyooyo. Nae haandi n'otulire hu hulemesebwa emyooyo hweefwe, hwasangaala haandi muno hu sangaalo lya Tito, olwohuba ebibaaso byae byaamalire ohunyalirwa ohuwuluusibwa naang'we mweesi.

¹⁴Olwohuba kata neende nindamweekesa ohubewuliiriramo hwaange, haba sibyaswaasa daawe; nae koti sa buli siindu sihwalomaloma hweeng'we syali esyadyeeri, nilwo luhwesiima hweefwe mu moni wa Tito hwosi hwamanyisibwa ohuba nihwali ohwadyeeri.

¹⁵Sakira obuheeri bwae busyemeeda sa ohwiingiya yi muli, niyechulisa koti eng'we mweesi mwali abeetekefu ohuwulira amakerako kae neende niyeechulisa obutiiririrwa neende ohutengereha humwamubukaanira nahwo.

¹⁶Ese sangaala olwohuba ndi neende obwomiifu bweene mweeng'we.