Read saamia 2 Abakoriito 8 Bible Online

2 Abakoriito 8 - saamia bible

2 Abakoriito 8

¹ Hudaha mumanye, basyeefwe, ebidiira hu mbabaasi cha Nasaae cheekeswa mu mikaanda ky'abafukiiriri ekiri mu Makedonia,

²olwohuba nibali mu huteemwa hululu muno, esangaalo lyaabwe bitiirifu neende obumanani bwaabwe bubitiirifu byabonehera mu huwaana hwaabwe.

³Olwohuba bayaana ohweema hu funi yaabwe koti yalichingi, koti lu ese nyala ohuboola, haandi ohubita efuni yaabwe koti yalichingi, ohweema hu hudaha hwaabwe abeene,

⁴nibatwekweedera elalira ohufukiirirwa ohubaaho neende sibahola esidiira hu buhoonyi buchiira aboolerefu

⁵mani sino, ohuhira koti lu hwali nihubaasa, nae muhutaangira bewaayo abeene eyiri Omwaami mani hubewaayo eyiri efwe, mu hudaha hwa Nasaae.

⁶Abweene ao hwekweeda Tito huti koti luyali n'amalire ohuchaaka ohuhola, ahoyere lwosi ohumaliirisa omulimo mulai kuno.

⁷Bulaanu koti lu muli ohuholaanga nimubitiirisa esikero, mu fukiirira, mu hulomaloma, mu bumanyirifu, mu bweesikwa bwoosi, haandi neende mu hutuheera hweeng'we mubone muti muhola mwabitiirisa neende mu mulimo mulai kuno kwosi.

⁸Mboola sino ataali koti esilagiro, nae ohwomiisa obuluungifu bw'abaandu baandi endi ohuheera hweeng'we hwosi n'ohwobwadyeeri.

⁹Olwohuba mumanyire embabaasi ch'Omwaami weefwe Yesu Kristo, mbwe kata niyali omuyiinda, yehola omumanani hulweeng'we, hu anyale ohubahola abayiinda ohubitira mu bumanani bwae.

¹⁰Mani mu siindu sino, ndi ohukeraka endi, silai muno hulweeng'we ohumaliirisa esyo simwachaaka ohuhola neende ohubaasa ohuhola omwaaka omulaamba kubitire,

¹¹hu bulaanu obweetekefu bweeng'we muhudaha ohusihola, hwahanyala hwachiana neende ohusimaliirisa neende ebyo bi muba nimuli nabyo.

¹²Olwohuba obweetekefu ohuhola nibuba nibuliwo, hufukiirirwa ohweema hu biindu bi buli muundu aba ali nabyo, ataali ohweema hubyataali nabyo.

¹³Haba si ndi huboola endi sakira mani abaandu baandi baanguyisirwe nae abaandi basidoyeerwe sa.

¹⁴Nae mboola endi, muhwaakaniaakania, obuungi bw'ebiindu bi muli nabyo esiha sino, bihoyere ohuba nibinyala ohubahoonya bi baba nibadaha, hu bulaanu obuungi bw'ebiindu byaabwe byosi binyale ohuhoonya obudahano bweeng'we luunyuma, hwabeeo ohwakanilisa hulai.

¹⁵ Koti lu syandiikwa siti, “Oyo owakesa ebiingi haba siyaliho neende ebiindi biyadoong'ia, haandi oyo owakesa ebidiidi haba siyali neende si yekoomba.”

¹⁶Nae Nasaae yebasibwe oyo otechaanga obuliindi bweenyehana mu myooyo kyeeng'we hulwa Tito.

¹⁷Olwohuba haba siyafukiirira omulaanga kweefwe koong'ene, nae olwohuba omweene yesi yali omuundu muluungifu, mbao yeecha yi muli muhudaha hwae sa.

¹⁸Alala nae mbao huchia ohubatumira omwaana weefwe mumanyirifu muno mu mikaanda ch'abafukiiriri miingi choosi hulw'ohuyaala emboosi ndai hwae;

¹⁹nae haandi haba sineebyo byoong'ene, nae yaloboolwe neende emikaanda ch'abafukiiriri miingi ohukeenda naafwe mu mulimo kw'oluyaali kuno ku huli ohuhola, hulw'oluyaali lw'Omwaami haandi neende ohweekesa obulai bw'emyooyo kyeefwe.

²⁰Huli ohudaha huti omuundu yeesi atatufunaana hulw'omulimo kw'ohweyaanayo kuno ku huli ohwooseresaanga,

²¹ olwohuba efwe huchiiririra ohuhola esiindu esy'oluyaali ataali mu moni w'Omwaami yeeng'ene, nae mu moni w'abaandu mwosi.

²²Mani mbao huli ohubatumira abasyeefwe beecha alala nabo, ba hwamala ohuteemaho muno haandi nihwamala ohubanyoola ohuba abaandu beesikwa ohuhiraho abaandi boosi, hulw'ohubeesika hwae huungi muno.

²³Nae Tito, omuhalaabani wasyaange, yi hubahalaabanira nae; nae abasyeefwe abo nibo bawamwaanda b'abafukiiriri, oluyaali lwa Kristo.

²⁴Mani mweekese obuheeri bweeng'we eyiri abafukiiriri neende ohubesuungiramo hweefwe yi bali.