Read saamia Abagalatia 1 Bible Online

Abagalatia 1 - saamia bible

Abagalatia 1

¹Ohutula eyiri Omutume Paulo otalaangwa neende abaandu, oba obunyala bw'abaandu, nae owalaangwa neende Yesu Kristo mweene neende Nasaae Seefwe, owamusyuuhisa ohutula mu bafu.

²Ese alala neende abasyaange boosi ba ndi nabo. Hwandiikira eng'we abafukiiriri ba Kristo abali mu Galatia:

³Nasaae Seefwe, alala neende Omwaami weefwe Yesu Kristo bababerese embabaasi, haandi bababerese omuleembe.

⁴Kristo mweene yeyaanayo hulw'ebibi byeefwe, hwaanyale ohutununula mu syaalo sya bulaanu sibi sino koti lu Nasaae weefwe haandi Seefwe adaha.

⁵Nasaae oyo ohoyere ohubereswa oluyaali endaalo neende endaalo choosi. Amiina.

⁶Ese mbauka muno! Mu biha bidiidi bino, mumalire ohutula hw'oyo owabalaanga hulw'embabaasi cha Kristo mani mwaachaaka ohuwulira Emboosi Ndai yiindi.

⁷Mubwadyeeri bweene abulao “Emboosi Ndai” yiindi, ohumalaho aliwo abaandu baandi abali ohubanyaasa-nyaasa nibateemaho ohuhyaamya Emboosi Ndai ya Kristo.

⁸Kata nihuba nihuli efwe, oba malaika ohutula Muukulu, n'abayaalira Emboosi Ndai eyikabuhaane neende eyo yi hwabayaalira, lehe abwaabwe.

⁹Ndi ohuboola haandi koti lu hwaboola hale endi: Niwiichuhana omuundu yeesi yabayaalira Emboosi Ndai yikabuhaane neende eyo yi mwafukiirira hale, ahoyere ohubwaabwa.

¹⁰Mani bulaanu mubaasa muti ndi ohuteemaho ohusiimwa neende abaandu, kose Nasaae? Haba daawe. Mubaasa muti ndi ohuteemaho ohusangaasa abaandu? Ni mba nisichiiririra ohusangasaanga abaandu sa, ao siimba niihoyera ohuba omuhalaabani wa Kristo.

¹¹Basyaange, ndaha mumanye muti, Emboosi Ndai yi njaala haba si yitula hu muundu sa.

¹²Olwohuba haba sindayinyoola ohutula hu muundu yeesi, oba omuundu yayiinjekesa bweekesa. Nae Yesu Kristo mweene niye owayimbwiihulira.

¹³ Mwawulira ebidiira hu bulamu bwaange koti lu ndalichiingi, ninoondekana neende ediini y'Esiyudaaya, haandi mwawulira koti lu ndalwaaniaanga muno ataali ohukwiira esisa emikaanda ky'abafukiiriri, haandi koti lu ndateemaho lu nyala ohukisihirisa.

¹⁴ Ndali hirira elalira Abayudaaya basyaange bandahula nabo mu hudiira emiduunga kya bakuuka yeefwe eky'ediini y'Esiyudaaya.

¹⁵ Nae Nasaae mu mbabaasi chae yaandoola nisisiiri ohwiibulwa, mani yanaanga ohumuhalaabanira.

¹⁶Mani niyaheengao ohumbwihulirao Omwaana wae hu nyale ohuyaala Emboosi Ndai yi mudiiraho, eyiri Abateende, haba sindachiaaho eyiri omuundu yeesi ohumweteebaho,

¹⁷oba haba sindachiaaho Yerusalemu ohubona abo abandaangirira ohuba Abatume. Nae ohutusaho ndachia bwaangu mu Buwaraabbu mani ndakobola Damasiko.

¹⁸ Nae emyaaka kidatu nikyabitao, ndachia Yerusalemu ohubona Keefa, mani ndaamenya nae embaka y'ejuma chibiri.

¹⁹Nae sindabonanaho neende omutume wuundi ohutusaho, Yakobbo mwaanang'ina Omwaami weefwe.

²⁰Bi ndi ohwandiika bino byadyeeri. Nasaae yesi amanyire ati haba si ndi ohubacha.

²¹Nindamala endyo, ndaachia mu bituundu bya Siria neende Silisia.

²²Esiha esyo, abaandu bafukiiriri mu Kristo ab'e Yudea bali nibasisiiri ohuumanya.

²³Bali nibawuliraanga buwulira bati: “Oyo owatulwanisaanga bulaanu niye oli ohuyalaanga efukiirira yi yali naateemaho ohusihirisa!”

²⁴Mani baakinia Nasaae hulwaange.