Read saamia Abagalatia 2 Bible Online

Abagalatia 2 - saamia bible

Abagalatia 2

¹ Mani emyaaka ehumi neende kine nikyabitao, ndakobola Yerusalemu neende Bbarinabba, alala neende Tito.

²Ndachia olwohuba ndabwiihulirwa neende Nasaae endi hoyeere ohuchia. Mani nindali ni njihaale neende abeemeresi nihuli fweeng'ene, ndabeekesa Emboosi Ndai yi ndayaaliraanga Abateende. Sindadaha omulimo kwaange kwa hale oba okwa bulaanu kube okw'ebihaya.

³Tito yi ndali nae, ayahaba niyali Omugiriki, haba si yayiikwa ohuhebwa.

⁴Kata katyo, abaandu baandi bali nibadaha mbwe ahebwe. Abaandu bano beebachirisa baaba koti abafukiiriri basyeefwe, mani beyiingisa mu mukaanda kweefwe nihutaamanyire ohutuhema bamanye ebidiira hu deembe li shuli nalyo mu Kristo Yesu nibadaha ohutukobosa mu buwaambe,

⁵Nae haba sihwafukiiriraho echaabwe kata nabudiidi hwaadaha ohubaliindira obwadyeeri bw'Emboosi Ndai.

⁶ Nae abo abali koti abeemeresi, ese esyo haba sisindiiraho olwohuba Nasaae abulaho abaandu b'akwiiraanga. Abeemeresi abo sibulao esiindu siyaaha sibameedaho.

⁷Nae babona bati Nasaae yandiisa omulimo kw'ohuyaalira Abateende Emboosi Ndai, koti lu Petero yabereswa omulimo kw'ohuyaala Emboosi Ndai eyiri Abayudaaya.

⁸Hulw'obunyala bwa Nasaae, ndeehola Omutume w'Abateende, koti sa lu Petero yeehola Omutume w'Abayudaaya.

⁹Nae Yakobbo, Petero neende Yowaana, abali koti abeemeresi baamanya omulimo kukabuhaane ku Nasaae yali yambereese, mani baatuheesa mu mahono, ese alala neende Bbarinabba, ohweekesa bati hwali esiindu silala nabo, abo abahalaabana mu Bayudaaya neende efwe abahalaabana mu Bateende.

¹⁰Ohutusaho batusaba ohwiichulisaanga abaandu baabwe bamanani, esiindu si ndali nindekoomba ohuhola muno neende omwooyo mulala.

¹¹Petero niyeecha mu Atiokia, ndamukololosa mu lwichuule, olwohuba yali omuhyamu mweene.

¹²Abaandu baandi abatula eyiri Yakobbo nibali nibasisiiri ohwiicha, Petero yaba naaliraanga alala neende Abateende. Nae abaandu bano niboola sa bati, Petero yekabula yahaya ohulya neende Abateende, olwohuba yali atiire abo abali nibasiiri ohuhebwa.

¹³Mani Abayudaaya ba yali nabo bamweyambaaniaho, beebachirisa koti abati, koti lu Petero yahola, Bbarinabba yesi yahola nasilala atyo.

¹⁴Mani nindabona endi mubwadyeeri bweene haba sibali nibaloondakana neende Emboosi Ndai, ndaboolera Petero mu lwichuule endi, “Ewe oli Omuyudaaya, nae obeere niweyira mu saambo ch'Abateende echitaali ech'Abayudaaya. Mani onyala otye ohuyiika Abateende ohweyira koti Abayudaaya?”

¹⁵Efwe huli Abayudaaya beene mu hwiibulwa, sihuli Abateende bahola-mbi, koti lu balaangwa.

¹⁶ Nae humanyire huti omuundu aba omuluungifu mu moni wa Nasaae ohweema hu fukiirira mu Yesu Kristo, ataali ohwooseresa bi Malako ka Musa kadaha. Fwesi hwafukiirira mu Kristo Yesu, hu hweemeo hube abaluungifu mu moni wa Nasaae ohubitira muhufukiirira hweefwe mu Kristo, nae ataali ohwooseresa bi Malako ka Musa kadaha. Olwohuba abulao omuundu onyala ohuba omuluungifu mu moni wa Nasaae hulw'ohwooseresa bi Malako ka Musa kadaha.

¹⁷Nae bulaanu koti luhuteemaho ohuba abaluungifu mu moni wa Nasaae ohweema hu bulala bw'efwe neende Kristo, mani hwenyoola huti fwesi huli sa abahola-mbi koti Abateende lu bali, mani sino siba syeekesa siti Kristo ahalaabanira abahola-mbi? Sisiri sityo kata nabudiidi!

¹⁸Mani ni mba ninjaaka ohusiira ehola y'Amalako ka Musa yindasakuula, ao mba ndeeyekesa omweene koti omuundu muhalaki w'amalako.

¹⁹Nae ebidiirana neende amalako, ese ndafwa-ndetwa neende amalako keene, hu nyale ohumenya ohubao omulamu hulwa Nasaae. Ndabaambwa hu musalabba alala neende Kristo.

²⁰Mani obulamu bu ndi nabwo, haba sibwaange-hu-bwaange, ohutusaho Kristo niye omulamu mweese. Mani obulamu bu ndi nabwo bulaanu, ndi nabwo hulw'ohufukiirira mu Omwaana wa Nasaae, owandaha mani yeyaanayo obulamu bwae hulwaange.

²¹Siindi hwekaana embabaasi cha Nasaae, nae abaandu nibaba abaluungifu mu moni wa Nasaae hulw'ohwooseresa ebyo bi Malako ka Musa kadaha, esyo syeekesa siti Kristo aba niyafwiira bihaya byeene sa.