Read saamia Abagalatia 3 Bible Online

Abagalatia 3 - saamia bible

Abagalatia 3

¹Eng'we Abagalatia basiru! Wiina mweene owabaloka? Mweekeswa bulai bweene mani mwabona koti Yesu Kristo yafwiira hu musalabba.

²Ndaha mumboolereho sino syoong'ene: Mwanyoola Mwooyo wa Nasaae hulw'ohwooseresa bi Malako ka Musa kadaha, oba hulw'ohuwulira Emboosi Ndai mani mwayifukiirira?

³Munyala mutye ohusiruwala mutyo? Eng'we abachaakira mu maani ka Mwooyo Mwoolerefu, munyala mutye ohumaliirisira mu maani k'eng'we beene?

⁴Ebidinyu bi mwabitamo ebyo byoosi byali byabuhaya? Mubwadyeeri bweene sibyali ebyabuhaya!

⁵Nasaae obakaba Mwooyo wae, haandi ohola eby'amayia mweeng'we ahola ebyo olwohuba mwoseresa ebyo bi Malako ka Musa kadaha, oba olwohuba eng'we mwawulira mani mwafukiirira Emboosi Ndai?

⁶ Ebyakwa hu Abburahamu kuuka yeefwe; koti ebyandiiko byoolerefu biboola biti, “Abburahamu yafukiirira mu Nasaae, mani ohweema hu fukiirira yae Nasaae yamufukiirira koti omuluungifu mu moni wae.”

⁷ Mani mubone muti abo abali neende efukiirira nibo abeechuhulu ba Abburahamu.

⁸ Mani ebyandiiko byoolerefu, byabona mu moni biti Nasaae achia ohuhola Abateende babe abaluungifu mu moni wae ohubitira mu fukiirira. Mani sakira ebyandiiko byoolerefu byeekesa Abburahamu hale Emboosi Ndai yiboola yiti, “Ohubitira mu ewe, Nasaae achia ohuberesa ehabi abaandu boosi.”

⁹Mani sakira, abo boosi abali neende efukiirira babeereswa ehabi koti lu Abburahamu owali neende efukiirira yabeereswa ehabi.

¹⁰ Abo abeesika ohwooseresa bi malako ka Musa kadaha, babwaabwe. Olwohuba ebyandiiko byoolerefu biboola biti, “Oyo yeesi otoseresaanga buli siindu syandiikibwa mu sitabo sy'Amalako ka Musa, Nasaae yamubwaaba!”

¹¹ Bulaanu simanyihaane siti, abulao omuundu yeesi onyala ohuba omuluungifu mu moni wa Nasaae hulw'ohwooseresa ebyo bi Malako ka Musa kadaha; olwohuba ebyandiiko byoolerefu biboola biti, “Omuundu wahaone niye oyo yeeng'ene ochia ohuba omuluungifu mu moni wa Nasaae ohweema hu fukiirira.”

¹² Nae Amalako ka Musa haba sikeemehwa hu fukiirira. Ohutusaho koti lu byandiiko byoolerefu biboola biti, “Oyo yeesi owoseresa bi Malako ka Musa kadaha niye ochia ohuwona ohweema hu Malako keene ako.”

¹³ Kristo ohweehola esibwaabo hulw'efwe, yatununula ohututusa mu sibwaabo si Malako ka Musa kaleeta. Olwohuba ebyandiiko byoolerefu biboola biti, “Oyo yeesi owaanihibwa hu musaala Nasaae aba yamubwaaba.”

¹⁴Kristo yetaaho esibwaabo esyo hu habi yi Nasaae yalaka Abburahamu yinyale ohubeereswa Abateende hulwa Kristo Yesu, haandi hulw'ohufukiirira hunyale ohunyoola Mwooyo Mwoolerefu yi Nasaae yasuubisa.

¹⁵Basyaange, njia ohwehoonyera esyohuboneraho sya buli ludaalo: abaandu babiri nibahola Endagaano, mani bayaandiika, abulao omuundu onyala ohuyihalaka oba yayimeedaho esiindu syoosi.

¹⁶Bulaanu, Nasaae yahola ebisuubise byae eyiri Abburahamu neende omwichuhulu wae. Ebyandiiko byoolerefu haba sibiboola biti “Abeechuhulu bae” nibyeekesa abaandu baandi, nae biboola biti “Omwichuhulu wae” nibyeekesa omuundu mulala yeeng'ene, oyo niye Kristo.

¹⁷ Si mboola nisyo sino endi, Nasaae yahola Endagaano neende Abburahamu mani yasuubisa ohuyoseresa. Amalako ka Musa, akeecha emyaaka emia chine neende amahumi kadatu nikibitireo, haba sikanyala humalao Endagaano yomiisibwa neende Nasaae koti esisuubise eyiri Abburahamu.

¹⁸ Olwohuba nikali mbwe esiyaanwa esyo syeema hu Malako ka Musa, mani sisiba nisisyeema hu sisuubise syae. Nae Nasaae yasiba Abburahamu ohweema hu sisuubise syae.

¹⁹Nae esifune sy'Amalako ka Musa syali siina? Amalako kemeedaho hu huhola ebibi hunyale ohumanyihana, haandi kali ak'ohubao ohwoola hu hwiicha hw'omwichuhulu wa Abburahamu owasuubisibwa. Amalako ka Musa kaleetwa neende bamalaika, omuundu naahola koti wamwaanda.

²⁰Nae wamwaanda saadahibwa nisidiira hu muundu mulala yeeng'ene; haandi Nasaae ali mulala yeeng'ene.

²¹Nae sino syeekesa siti Amalako ka Musa kayiingania ebisuubise bya Nasaae? Haba sisinyalihana daawe! Nae mani Amalako ka Musa kaba niko akaleetera abaandu obulamu, ao buli muundu yahabeere omuluungifu mu moni wa Nasaae olwohukooseresa.

²²Nae ebyandiiko byoolerefu biboola biti, Esyaalo syoosi siri mu maani k'Esibi, mani sakira esiyaanwa esyasuubiswa, syeema hu fukiirira mu Yesu Kristo mani sibeereswa abo abafukiirira.

²³Nae endaalo ch'efukiirira nichali nichitoola, Amalako ka Musa katuliindaanga nihuli koti ababoye, ohwoola lu fukiirira yahamanyihane.

²⁴Mani sakira Amalako ka Musa katuliinda ohwoola lu Kristo yeechera, hu hunyale ohuba abaluungifu mu moni wa Nasaae ohubitira mu fukiirira.

²⁵Nae bulaanu, ohufukiirira koti lu hwamala ohwiicha, haba sihusisiiri mu butuki bw'Amalako ka Musa.

²⁶Olwohuba ohubitira mu fukiirira, eng'we mweesi muli abaana ba Nasaae mu Yesu Kristo.

²⁷Olwohuba eng'we mweesi mwabatiisibwa mu Kristo, mani bulaanu mwefwaala Kristo.

²⁸Abulao engabuhana akatikaati w'Abayudaaya Abateende, akatikaati w'abawaambe neende abalehuule, akatikaati w'abasaacha neende abahasi; mweesi muli nasilala mu Kristo Yesu.

²⁹ Koti lu muli abaandu ba Kristo, muli abeechuhulu ba Abburahamu, mani muchia ohunyoola si yasuubisabwa.